ପଞ୍ଚାୟତ ନିର୍ବାଚନ ସମୟରେ ହେବ କି ନାହିଁ ସନ୍ଦେହ, ସରକାରଙ୍କୁ ଟାର୍ଗେଟ୍ : ସାରଦା ଜେନା

ଭୁବନେଶ୍ୱର: ବିଜେଡି ସମସ୍ତ ନିର୍ବାଚନ ପାଇଁ ସବୁବେଳେ ପ୍ରସ୍ତୁତ । ପଞ୍ଚାୟତ ନିର୍ବାଚନ ଠିକ୍ ସମୟରେ ହେବ କି ନାହିଁ, ତାହାକୁ ନେଇ ସନ୍ଦେହ ଥିବା କହିଛନ୍ତି ବିଜେଡି ବିଧାୟକ ସାରଦା ଜେନା। ସେ କହିଛନ୍ତି, ଓଡ଼ିଶାବାସୀଙ୍କ ସ୍ୱାର୍ଥ ପାଇଁ ବିଜେଡି ସବୁବେଳେ ସଂଗ୍ରାମ କରୁଛି। ତେବେ ନିର୍ବାଚନ କେବେ ହେବ, ସେ ନିଷ୍ପତ୍ତି ସରକାରଙ୍କ ଉପରେ ନିର୍ଭର କରୁଛି। ରାଜ୍ୟ ସରକାରଙ୍କୁ କଟାକ୍ଷ କରି ସାରଦା ଜେନା କହିଛନ୍ତି, ସରକାର କୌଣସି ଯୋଜନା ଘୋଷଣା କରିବା ପୂର୍ବରୁ ତାହାର ସଠିକ୍ ଅନୁଧ୍ୟାନ କରୁନାହାନ୍ତି। ଲୋକଙ୍କୁ ଆକର୍ଷିତ କରିବା ପାଇଁ କେବଳ ଭଲ ଶୁଣାଯାଉଥିବା ସ୍ଲୋଗାନ ଦିଆଯାଉଛି। ‘କେଜିରୁ ପିଜି ମାଗଣା ଶିକ୍ଷା’ ଭଳି ଘୋଷଣା ଶୁଣିବାକୁ ଭଲ ଲାଗୁଥିଲେ ମଧ୍ୟ ବାସ୍ତବରେ ତାହାର କୌଣସି ଫଳ ଦେଖିବାକୁ ମିଳୁନାହିଁ ବୋଲି ସେ ଅଭିଯୋଗ କରିଛନ୍ତି। ଦଳୀୟ ସଂଗଠନକୁ ନେଇ ସେ କହିଛନ୍ତି, ବିଭିନ୍ନ ନେତାଙ୍କ ସହ ଆଲୋଚନା କରାଯାଉଛି ଏବଂ ସଂଗଠନକୁ ଅଧିକ ସୁଦୃଢ଼ କରିବା ପାଇଁ ପଦକ୍ଷେପ ନିଆଯାଉଛି। ରାଜ୍ୟସଭା ନିର୍ବାଚନରେ ଯେଉଁ ବିଧାନସଭା କ୍ଷେତ୍ରରେ ଦଳ ବିପକ୍ଷରେ ମତଦାନ ହୋଇଥିଲା, ସେହି ସ୍ଥାନଗୁଡ଼ିକରେ କିଛି ନେତାଙ୍କୁ ଦାୟିତ୍ୱ ଦିଆଯାଉଥିବା ସେ ସୂଚନା ଦେଇଛନ୍ତି। ଦଳ ଭିତରେ କୌଣସି ବରିଷ୍ଠ ନେତା ଅସନ୍ତୁଷ୍ଟ ନଥିବା ଦାବି କରି ସାରଦା ଜେନା କହିଛନ୍ତି, ବିଜେଡି ସଭାପତି ନବୀନ ପଟ୍ଟନାୟକ ସ୍ପଷ୍ଟ କରିସାରିଛନ୍ତି ଯେ ୨୦୨୯ ନିର୍ବାଚନରେ ତାଙ୍କ ନେତୃତ୍ୱରେ ହିଁ ଦଳ ନିର୍ବାଚନ ଲଢ଼ିବ।