ଶିବସେନା (UBT)ରେ ବିଦ୍ରୋହ ଆଶଙ୍କା, ବାଚସ୍ପତିଙ୍କ ଦ୍ୱାରସ୍ଥ ହେଲେ ଉଦ୍ଧବ ଗୋଷ୍ଠୀର ସାଂସଦ

ନୂଆଦିଲ୍ଲୀ: ମହାରାଷ୍ଟ୍ର ରାଜନୀତିରେ ପୁଣି ଶିବସେନାକୁ ନେଇ ରାଜନୈତିକ ହଲଚଲ ଜୋର ଧରିଛି। ଉଦ୍ଧବ ଠାକରେଙ୍କ ନେତୃତ୍ୱାଧୀନ ଶିବସେନା (UBT)ର କିଛି ସାଂସଦ ଏକନାଥ ସିନ୍ଦେଙ୍କ ଶିବସେନାରେ ସାମିଲ ହେବାକୁ ଯୋଜନା କରୁଥିବା ଚର୍ଚ୍ଚା ମଧ୍ୟରେ ଦଳର ବରିଷ୍ଠ ନେତାମାନେ ଲୋକସଭା ବାଚସ୍ପତି ଓମ୍ ବିର୍ଲାଙ୍କୁ ଭେଟି ହସ୍ତକ୍ଷେପ ଲୋଡ଼ିଛନ୍ତି। ଶିବସେନାର ସାଂସଦ ସଞ୍ଜୟ ରାଉତ, ଅନିଲ ଦେଶାଇ ଏବଂ ଅରବିନ୍ଦ ସାୱନ୍ତ ସଂସଦ ଭବନରେ ବାଚସ୍ପତି ଓମ୍ ବିର୍ଲାଙ୍କୁ ସାକ୍ଷାତ କରି ଏକ ଦାବିପତ୍ର ପ୍ରଦାନ କରିଛନ୍ତି।  ଦଳରେ ସମ୍ଭାବ୍ୟ ବିଭାଜନକୁ ନେଇ ଗଣମାଧ୍ୟମରେ ପ୍ରକାଶ ପାଉଥିବା ଖବର ସମ୍ପର୍କରେ ସେମାନେ ବାଚସ୍ପତିଙ୍କୁ ଅବଗତ କରାଇଛନ୍ତି। ବୈଠକ ପରେ ସାଂସଦ ଅରବିନ୍ଦ ସାୱନ୍ତ କହିଛନ୍ତି ଯେ, ଏପର୍ଯ୍ୟନ୍ତ କୌଣସି ସାଂସଦ ଆନୁଷ୍ଠାନିକ ଭାବେ ଦଳ ଛାଡ଼ିବା ସମ୍ପର୍କରେ ନ ଦଳକୁ, ନ ବାଚସ୍ପତିଙ୍କୁ ଜଣାଇଛନ୍ତି। ଯଦି ଏପରି କୌଣସି ପରିସ୍ଥିତି ସୃଷ୍ଟି ହୁଏ, ତେବେ ବାଚସ୍ପତି ସମ୍ବିଧାନ ଓ ଦଳ ବଦଳ ବିରୋଧୀ ଆଇନ (Anti-Defection Law) ଅନୁଯାୟୀ କାର୍ଯ୍ୟ କରିବା ଉଚିତ ବୋଲି ସେ କହିଛନ୍ତି। ସାଂସଦ ଅନିଲ ଦେଶାଇ କହିଛନ୍ତି ଯେ, କୌଣସି ଗୋଷ୍ଠୀ ବାଚସ୍ପତିଙ୍କ ନିକଟକୁ ଯାଇଥିଲେ ପ୍ରଥମେ ଦଳକୁ ସୂଚନା ଦିଆଯିବା ଆବଶ୍ୟକ। ଆଇନ ଅନୁଯାୟୀ କେବଳ ସମ୍ପୂର୍ଣ୍ଣ ରାଜନୈତିକ ଦଳର ମିଶ୍ରଣ ସମ୍ଭବ, କୌଣସି ପୃଥକ ଗୋଷ୍ଠୀର ସିଧାସଳଖ ମିଶ୍ରଣ ପାଇଁ ବ୍ୟବସ୍ଥା ନାହିଁ। ଅନ୍ୟପଟେ ସଞ୍ଜୟ ରାଉତ ଅଭିଯୋଗ କରିଛନ୍ତି ଯେ, ଶାସକ ମହାୟୁତି ମେଣ୍ଟ ଓ ବିଜେପି ପକ୍ଷରୁ କୋଟି କୋଟି ଟଙ୍କାର ପ୍ରଲୋଭନ ଦେଖାଇ ସାଂସଦମାନଙ୍କୁ ଦଳ ଛାଡ଼ିବାକୁ ଉତ୍ସାହିତ କରାଯାଉଛି। ତେବେ ବାଚସ୍ପତି ସମସ୍ତ ନିୟମ ଓ ସାମ୍ବିଧାନିକ ବ୍ୟବସ୍ଥା ଅନୁଯାୟୀ ପଦକ୍ଷେପ ନେବେ ବୋଲି ଆଶ୍ୱାସନା ଦେଇଥିବା ସେ କହିଛନ୍ତି। ରାଜନୈତିକ ମହଲରେ ଚର୍ଚ୍ଚା ହେଉଛି ଯେ, ଶିବସେନା (UBT)ର ୯ ଜଣ ଲୋକସଭା ସାଂସଦଙ୍କ ମଧ୍ୟରୁ ପ୍ରାୟ ୬ ଜଣ ସାଂସଦ ଏକନାଥ ସିନ୍ଦେଙ୍କ ଗୋଷ୍ଠୀରେ ଯୋଗଦେବାକୁ ପ୍ରସ୍ତୁତ ଅଛନ୍ତି। ଦଳ ବଦଳ ବିରୋଧୀ ଆଇନ ଅନୁଯାୟୀ ଦୁଇ-ତୃତୀୟାଂଶ ସାଂସଦଙ୍କ ସମର୍ଥନ ମିଳିଲେ ସେମାନଙ୍କ ସାଂସଦ ପଦ ଅକ୍ଷୁଣ୍ଣ ରହିପାରିବ। ଏହି ପରିସ୍ଥିତିକୁ ଦୃଷ୍ଟିରେ ରଖି ଦଳର ମୁଖ୍ୟ ସଚେତକ ଅରବିନ୍ଦ ସାୱନ୍ତ ସମସ୍ତ ସାଂସଦଙ୍କୁ ଗୁରୁବାର ହେବାକୁ ଥିବା ଜରୁରୀ ଦଳୀୟ ବୈଠକରେ ଉପସ୍ଥିତ ରହିବାକୁ ହୁଇପ୍ ଜାରି କରିଛନ୍ତି। ହୁଇପ୍ ଅମାନ୍ୟ କଲେ ସମ୍ପୃକ୍ତ ସାଂସଦଙ୍କ ବିରୋଧରେ ଆଇନଗତ ପଦକ୍ଷେପ ନିଆଯିବ ବୋଲି ଦଳ ପକ୍ଷରୁ ସତର୍କ କରାଯାଇଛି। ୨୦୨୨ ମସିହାରେ ମହାରାଷ୍ଟ୍ର ବିଧାନସଭାରେ ଘଟିଥିବା ବଡ଼ ରାଜନୈତିକ ବିଦ୍ରୋହର ପୁନରାବୃତ୍ତି ସଂସଦରେ ନ ହେଉ, ସେଥିପାଇଁ ଉଦ୍ଧବ ଠାକରେଙ୍କ ଶିବସେନା ପୂର୍ବରୁ ସତର୍କ ହୋଇ ବାଚସ୍ପତିଙ୍କ ଦ୍ୱାରସ୍ଥ ହୋଇଛି। ବର୍ତ୍ତମାନ ସମସ୍ତଙ୍କ ନଜର ଗୁରୁବାରର ଦଳୀୟ ବୈଠକ ଓ ବାଚସ୍ପତିଙ୍କ ପରବର୍ତ୍ତୀ ପଦକ୍ଷେପ ଉପରେ ରହିଛି।