କ୍ରାଇମ ସିନ୍ ରିକ୍ରିଏସନ ବେଳେ ଏନକାଉଣ୍ଟର, ଦୁଷ୍କର୍ମ-ହତ୍ୟା ମାମଲାର ମୁଖ୍ୟ ଅଭିଯୁକ୍ତ ମୃତ

କୋଲକାତା: ବାରୁଇପୁର ୧୨ ବର୍ଷୀୟ ନାବାଳିକା ଦୁଷ୍କର୍ମ ପରେ ହତ୍ୟା ମାମଲା । କ୍ରାଇମ ସିନ୍ ରିକ୍ରିଏସନ ବେଳେ ପୋଲିସ ଏନକାଉଣ୍ଟରରେ ମୁଖ୍ୟ ଅଭିଯୁକ୍ତର ମୃତ । ପଶ୍ଚିମବଙ୍ଗର ଦକ୍ଷିଣ ୨୪ ପରଗଣା ଜିଲ୍ଲାର ବାରୁଇପୁରରେ ଜଣେ ନାବାଳିକାଙ୍କ ଦୁଷ୍କର୍ମ ଓ ହତ୍ୟା ମାମଲାର ମୁଖ୍ୟ ଅଭିଯୁକ୍ତ ପ୍ରଭାସ ମଣ୍ଡଳଙ୍କ ମୃତ୍ୟୁ ଏନକାଉଣ୍ଟରରେ ଘଟିଥିବା ଦାବି କରିଛି ପୋଲିସ । ବୁଧବାର ଭୋରରେ କ୍ରାଇମ ସିନ୍ ରିକ୍ରିଏସନ ପାଇଁ ନିଆଯାଇଥିବା ବେଳେ ସେ ଜଣେ ପୋଲିସ କର୍ମଚାରୀଙ୍କ ସର୍ଭିସ ରିଭଲଭର ଛଡ଼ାଇ ଗୁଳି ଚଳାଇ ଫେରାର ହେବାକୁ ଉଦ୍ୟମ କରିଥିବା ଅଭିଯୋଗ କରିଛି ପୋଲିସ। ପୋଲିସ ସୂଚନା ଅନୁଯାୟୀ, ରାତି ପ୍ରାୟ ୧୨ଟା ୪୫ ମିନିଟ ସମୟରେ ବାରୁଇପୁର ପୋଲିସ ଷ୍ଟେସନରେ ୧୩୫୦/୨୬ ଅଧିନରେ ଯାଞ୍ଚ ଅଧିକାରୀ ନିଜ ଟିମ ଏବଂ ଅଭିଯୁକ୍ତ ପ୍ରଭାସ ମଣ୍ଡଳଙ୍କୁ ସୂର୍ଯ୍ୟାପୁର ଅଞ୍ଚଳକୁ ଘଟଣାସ୍ଥଳର ପୁନଃନିର୍ମାଣ (କ୍ରାଇମ ସିନ୍ ରିକ୍ରିଏସନ) ପାଇଁ ନେଇଥିଲା। ଏହି ସମୟରେ ଅଭିଯୁକ୍ତ ଜଣକ ପୋଲିସ କର୍ମୀଙ୍କ ବନ୍ଧୁକ ଛଡାଇ ପୋଲିସ ଉପରକୁ ଗୁଳିମାଡ଼ କରିଥିଲା । ଏହାର ଜବାବରେ ପୋଲିସ ଟିମ୍ ଏକ ରାଉଣ୍ଡ ଗୁଳି ଚଳାଇଥିଲା । ଗୁରୁତର ଆହତ ଅବସ୍ଥାରେ ପ୍ରଭାସଙ୍କୁ ବାରୁଇପୁର ହସ୍ପିଟାଲକୁ ନିଆଯାଇଥିଲେ ମଧ୍ୟ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହି ମାମଲାରେ ପ୍ରଭାସ ମଣ୍ଡଳଙ୍କ ସମେତ ତିନିଜଣଙ୍କୁ ପୂର୍ବରୁ ଗିରଫ କରାଯାଇଥିଲା। ଅଭିଯୋଗ ଅନୁଯାୟୀ, ନିଖୋଜ ହେବାର ପରଦିନ ୧୨ ବର୍ଷୀୟା ନାବାଳିକାଙ୍କ ମୃତଦେହ ଏକ ଅଖା ଭିତରେ ଭର୍ତ୍ତି ଅବସ୍ଥାରେ ସୂର୍ଯ୍ୟାପୁର ଅଞ୍ଚଳର ଏକ ପୋଖରୀରୁ ଉଦ୍ଧାର କରାଯାଇଥିଲା। ପ୍ରାଥମିକ ତଦନ୍ତ ପରେ ପୋଲିସ ମାମଲାରେ ଦୁଷ୍କର୍ମ, ଗଣଦୁଷ୍କର୍ମ, ହତ୍ୟା, ପ୍ରମାଣ ନଷ୍ଟ ଏବଂ ପୋକ୍ସୋ ଆଇନର ବିଭିନ୍ନ ଧାରା ଲାଗୁ କରିଥିଲା। ଏହି ଘଟଣାକୁ ନେଇ ବାରୁଇପୁର ସମେତ ବିଭିନ୍ନ ଅଞ୍ଚଳରେ ତୀବ୍ର ଜନଅସନ୍ତୋଷ ଦେଖାଦେଇଥିଲା। ଉତ୍ତ୍ୟକ୍ତ ଲୋକେ ରାସ୍ତା ଓ ରେଳପଥ ଅବରୋଧ କରିବା ସହ ଟାୟାର ଜାଳି ପ୍ରତିବାଦ କରିଥିଲେ ଏବଂ କିଛି ପୋଲିସ ଗାଡ଼ିକୁ କ୍ଷତିଗ୍ରସ୍ତ କରିଥିଲେ। ଏହି ଉତ୍ତେଜନା ମଧ୍ୟରେ ଇନ୍ଦ୍ରଜିତ ମଣ୍ଡଳ ନାମକ ଜଣେ ବ୍ୟକ୍ତିଙ୍କୁ ସନ୍ଦେହରେ ଉତ୍ତ୍ୟକ୍ତ ଲୋକେ  ପିଟିପିଟି ହତ୍ୟା କରିଥିଲେ। ପରେ ପୋଲିସ ସ୍ପଷ୍ଟ କରିଥିଲା ଯେ, ସେ ଏହି ମାମଲାରେ ସମ୍ପୃକ୍ତ ନଥିଲେ। ଘଟଣାର ତଦନ୍ତ ପାଇଁ ରାଜ୍ୟ ସରକାର ଅତିରିକ୍ତ ପୋଲିସ ସୁପରିଣ୍ଟେଣ୍ଡେଣ୍ଟ ପିନାକୀ ଦତ୍ତଙ୍କ ନେତୃତ୍ୱରେ ଏକ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଗଠନ କହିଥିଲେ । ମୁଖ୍ୟମନ୍ତ୍ରୀ ସୁବେନ୍ଦୁ ଅଧିକାରୀ ପୋଲିସ ମହାନିର୍ଦ୍ଦେଶକଙ୍କୁ ୭୨ ଘଣ୍ଟା ମଧ୍ୟରେ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେବା ସହ ତଦନ୍ତରେ କୌଣସି ଅବହେଳା ପ୍ରମାଣିତ ହେଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଥିଲେ । ସୂଚନାଯୋଗ୍ୟ, ପଶ୍ଚିମବଙ୍ଗ ଦକ୍ଷିଣ ପ୍ରଗଣା ଜିଲ୍ଲା ବରୁଇପୁରରେ ଜୁଲାଇ ୫ରେ ବାରୁଇପୁରର ସୂର୍ଯ୍ୟାପୁର ଅଞ୍ଚଳରୁ ୧୨ ବର୍ଷୀୟା ନାବାଳିକାଙ୍କ ମୃତଦେହ ଉଦ୍ଧାର କରାଯାଇଥିଲା। ନାବାଳିକାକୁ ଦୁଷ୍କର୍ମ କରିବା ପରେ ହତ୍ୟା କରାଯାଇଥିଲା । ଏହି ଘଟଣା ପରେ ସମଗ୍ର ପଶ୍ଚିମବଙ୍ଗରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା ଏବଂ ଶୁଭେନ୍ଦୁ ସରକାର ମାମଲାର ତଦନ୍ତ ପାଇଁ ନିର୍ଦେଶ କରିଥିଲେ। ଘଟଣାକୁ ନେଇ ସାରା ରାଜ୍ୟରେ ଦେଖାଦେଇଥିଲା ଆକ୍ରୋଶ । ଏହି ଘଟଣା ସାରା ଅଞ୍ଚଳରେ ଚାଞ୍ଚଲ୍ୟ ଖେଳିଯାଇଥିଲା । ଏହା ପରେ ପୋଲିସ ଏନକାଉଣ୍ଟର କରିଛି । ଦୋଷୀକୁ ଏଭଳି ଦଣ୍ଡ ଦିଆଯିବା ଉଚିତ୍ ବୋଲି ସ୍ଥାନୀୟ ଲୋକମାନେ ଦାବି କରିଛନ୍ତି ।