ଖୁବଶିଘ୍ର ଶ୍ରୀମନ୍ଦିରରେ ଧାଡ଼ି ଦର୍ଶନ-ଘଣ୍ଟାକୁ ଦର୍ଶନ କରିବେ ୧୦ ହଜାର ଭକ୍ତ!

ଶ୍ରୀମନ୍ଦିରରେ ଧାଡ଼ି ଦର୍ଶନ ବ୍ୟବସ୍ଥା ନେଇ ପୁଣି ତତ୍ପର ହୋଇଛନ୍ତି ସରକାର । ଘଣ୍ଟାକୁ ୮ରୁ ୧୦ ହଜାର ଭକ୍ତ ଯେପରି ସୁରୁଖୁରୁରେ ମହାପ୍ରଭୁଙ୍କ ଦର୍ଶନ କରିପାରିବେ, ସେନେଇ ଯୋଜନା ପ୍ରସ୍ତୁତ ହେଉଛି । ୩ରୁ ୪ ମାସ ମଧ୍ୟରେ ଏହି ବ୍ୟବସ୍ଥା କାର୍ଯ୍ୟକାରୀ ହେବ ବୋଲି ଲୋକସେବା ଭବନରେ ଉଚ୍ଚସ୍ତରୀୟ ବୈଠକ ପରେ ସୂଚନା ଦେଇଛନ୍ତି ଆଇନମନ୍ତ୍ରୀ ପୃଥ୍ବୀରାଜ ହରିଚନ୍ଦନ ।  ମହାପ୍ରଭୁଙ୍କ ଦର୍ଶନ ପାଇଁ ପୁରୀକୁ ଦିନକୁ ଦିନ ବଢ଼ୁଛି ଭକ୍ତଙ୍କ ଆଗମନ । ଭିଡ଼ ନିୟନ୍ତ୍ରଣ ସହ ଭକ୍ତଙ୍କୁ ଅଧିକ ସୁଗମ ଓ ଶୃଙ୍ଖଳିତ ଦର୍ଶନ ଦେବା ପାଇଁ ଧାଡ଼ି ଦର୍ଶନ ବ୍ୟବସ୍ଥା ଉପରେ ଜୋର ଦିଆଯାଉଛି । ଏନେଇ ଆଇଆଇଟି ଭୁବନେଶ୍ୱର ପକ୍ଷରୁ ବିଭିନ୍ନ ବୈଷୟିକ ବିକଳ୍ପ ଉପସ୍ଥାପନ କରାଯାଇଛି । ଏପରିକି ଏହାର ପାଇଲଟ୍ ମଡେଲ ମଧ୍ୟ ପ୍ରସ୍ତୁତ ହୋଇଥିବା ସୂଚନା ମିଳିଛି । ପ୍ରସ୍ତାବିତ ବ୍ୟବସ୍ଥା ଅନୁସାରେ ଗରୁଡ଼ ସ୍ତମ୍ଭଠାରୁ ବାହାର କାଠ ପର୍ଯ୍ୟନ୍ତ ୫ଟି ରାମ୍ପ ନିର୍ମାଣ କରାଯିବ । ପ୍ରତ୍ୟେକ ରାମ୍ପରେ ଏକାସାଙ୍ଗରେ ପ୍ରାୟ ୫୦ ଜଣ ଭକ୍ତ ଦର୍ଶନ କରିପାରିବେ । ଏହାଦ୍ୱାରା ମନ୍ଦିର ଭିତରେ ଭିଡ଼ କମିବା ସହ ଭକ୍ତମାନେ ଅଧିକ ସୁବିଧାରେ ଦର୍ଶନ କରିପାରିବେ ବୋଲି ଆଶା କରାଯାଉଛି । ଯୋଜନା କାର୍ଯ୍ୟକାରୀ ହେଲେ ଘଣ୍ଟାକୁ ପ୍ରାୟ ୮ରୁ ୧୦ ହଜାର ଭକ୍ତ ସୁରୁଖୁରୁରେ ମହାପ୍ରଭୁଙ୍କ ଦର୍ଶନ କରିପାରିବେ । ଭକ୍ତଙ୍କ ସୁରକ୍ଷା ଓ ଶୃଙ୍ଖଳିତ ଦର୍ଶନ ଉପରେ ପୋଲିସ ପ୍ରଶାସନ ମଧ୍ୟ ପ୍ରାଧାନ୍ୟ ଦେଉଛି । ଧାଡ଼ି ବ୍ୟବସ୍ଥା ସହ ଭିଡ଼ ନିୟନ୍ତ୍ରଣ ଓ ସୁରକ୍ଷାକୁ ନେଇ ଆବଶ୍ୟକ ପଦକ୍ଷେପ ନିଆଯିବ ବୋଲି ପୁରୀ ଏସପି କହିଛନ୍ତି । କିନ୍ତୁ ଧାଡ଼ି ଦର୍ଶନକୁ ନେଇ ସେବାୟତଙ୍କ ଭିନ୍ନ ମତ। ଶ୍ରୀମନ୍ଦିରରେ ପ୍ରତିଦିନ ମହାପ୍ରଭୁଙ୍କ ବିଭିନ୍ନ ନୀତିକାନ୍ତି ରହିଥିବାରୁ ଧାଡ଼ି ଦର୍ଶନ ବ୍ୟବସ୍ଥାକୁ ପ୍ରଥମେ ପରୀକ୍ଷାମୂଳକ ଭାବେ କରାଯିବା ଦରକାର ବୋଲି ସେବାୟତମାନେ ମତ ରଖିଛନ୍ତି । ଏଥିସହ ସରକାର ସବୁ ସ୍ତରରେ ଆଲୋଚନା ଓ ବିମର୍ଶ କରି ଆଗକୁ ବଢ଼ିବା ଉଚିତ ବୋଲି କହିଛନ୍ତି । ଭକ୍ତଙ୍କ ସୁଗମ, ଶୃଙ୍ଖଳିତ ଓ ସୁରକ୍ଷିତ ଦର୍ଶନ ପାଇଁ ଧାଡ଼ି ବ୍ୟବସ୍ଥା କେତେଦୂର ସଫଳ ହେଉଛି, ତାହା ଆଗାମୀ ଦିନରେ ହିଁ ସ୍ପଷ୍ଟ ହେବ । ତେବେ ଶ୍ରୀମନ୍ଦିରର ପରମ୍ପରା, ନୀତିକାନ୍ତି ଓ ଭକ୍ତଙ୍କ ସୁବିଧାକୁ ସମନ୍ୱୟ କରି ସରକାର ନିଷ୍ପତ୍ତି ନେବ ବୋଲି ସାଧାରଣରେ ଆଶା ।