ପୀତବାସ ପଣ୍ଡା ହତ୍ୟା ମାମଲା: ତିନି ଅଭିଯୁକ୍ତଙ୍କ ଡିସଚାର୍ଜ ପିଟିସନ ଶୁଣାଣି ୩୦ରେ

ବ୍ରହ୍ମପୁର: ଆଇନଜୀବୀ ପୀତବାସ ପଣ୍ଡା ହତ୍ୟା ମାମଲାରେ ତିନିଜଣ ଅଭିଯୁକ୍ତଙ୍କ ଡିସଚାର୍ଜ ପିଟିସନ ଉପରେ ଆଜି ଶୁଣାଣି ହୋଇଛି। ମାମଲାର ପରବର୍ତ୍ତୀ ଶୁଣାଣି ଆସନ୍ତା ୩୦ ତାରିଖରେ ହେବ ବୋଲି ମାନ୍ୟବର ତୃତୀୟ ଅତିରିକ୍ତ ଜିଲ୍ଲା ଜଜ୍ କୋର୍ଟ ତାରିଖ ଧାର୍ଯ୍ୟ କରିଛନ୍ତି। ଗତ ଜୁନ୍ ୨୫ ତାରିଖରେ ପୁଲିସ ଏହି ମାମଲାର ୩୯୬ ପୃଷ୍ଠାର ଫାଇନାଲ୍ ଚାର୍ଜସିଟ୍ ସହ ୧୬ଟି ପେନ୍‌ଡ୍ରାଇଭ୍‌ରେ ଡିଜିଟାଲ୍ ପ୍ରମାଣ କୋର୍ଟରେ ଦାଖଲ କରିଥିଲା। ସରକାରୀ ଓକିଲଙ୍କ ପକ୍ଷରୁ ଫାଇନାଲ୍ ଚାର୍ଜସିଟ୍ ଦାଖଲ ହୋଇଥିବା ନେଇ କୋର୍ଟଙ୍କୁ ଅବଗତ କରାଯାଇଥିଲା। ଏହି ହତ୍ୟା ମାମଲାରେ ବ୍ରହ୍ମପୁରର ପୂର୍ବତନ ବିଧାୟକ ବିକ୍ରମ କୁମାର ପଣ୍ଡା, ପୂର୍ବତନ ମେୟର ଶିବ ଶଙ୍କର ଦାଶଙ୍କ ସମେତ ମୋଟ ୧୬ ଜଣ ଗିରଫ ହୋଇ ଜେଲରେ ଅଛନ୍ତି। କେବଳ ରାଜେନ୍ଦ୍ର କୁମାର ସାହୁଙ୍କୁ ଜାମିନ ମିଳିଛି। ପୂର୍ବରୁ ସୁନୀଲ ହୋତା, ବିପିନ ସ୍ୱାଇଁ ଓ ସୀମାଞ୍ଚଳ ନାୟକଙ୍କ ଡିସଚାର୍ଜ ପିଟିସନ ଉପରେ ଶୁଣାଣି ହୋଇଥିଲା। ଏହାର ପରବର୍ତ୍ତୀ ଶୁଣାଣି ଆସନ୍ତା ୩୦ ତାରିଖରେ ହେବ ବୋଲି ସ୍ୱତନ୍ତ୍ର ସରକାରୀ ପିପି କାଳୀଚରଣ ମିଶ୍ର ସୂଚନା ଦେଇଛନ୍ତି।