ଶ୍ରାବଣର ଦ୍ୱିତୀୟ ସୋମବାରରେ ଭକ୍ତଙ୍କୁ ନିରାଶା: ବନ୍ଦ ହେଲା ବାବା ପଞ୍ଚଲିଙ୍ଗେଶ୍ୱରଙ୍କ ଦର୍ଶନ ଓ ସ୍ପର୍ଶ

ବାଲେଶ୍ୱର: ଶ୍ରାବଣ ମାସର ଦ୍ୱିତୀୟ ସୋମବାରରେ ଉତ୍ତର ଓଡ଼ିଶାର ପ୍ରସିଦ୍ଧ ଶୈବପୀଠ ବାବା ପଞ୍ଚଲିଙ୍ଗେଶ୍ୱରରେ ଭକ୍ତମାନେ ନିରାଶ ହୋଇ ଫେରିଛନ୍ତି। ଲଘୁଚାପଜନିତ ଲଗାଣ ବର୍ଷା ଯୋଗୁ ପାହାଡ଼ିଆ ଝରଣାରେ ଜଳସ୍ତର ବୃଦ୍ଧି ପାଇଥିବାରୁ ସୁରକ୍ଷା ଦୃଷ୍ଟିରୁ ମନ୍ଦିରର ଦର୍ଶନ ଓ ସ୍ପର୍ଶ ବ୍ୟବସ୍ଥାକୁ ସାମୟିକ ଭାବେ ବନ୍ଦ କରାଯାଇଛି। ବାଲେଶ୍ୱର ଜିଲ୍ଲାର ନୀଳଗିରି ପାହାଡ଼ ପାଦଦେଶରେ ଅବସ୍ଥିତ ବାବା ପଞ୍ଚଲିଙ୍ଗେଶ୍ୱର ଶୈବପୀଠରେ ଲଘୁଚାପ ବର୍ଷା ପ୍ରଭାବରେ ପାହାଡ଼ିଆ ଝରଣାର ଜଳପ୍ରବାହ ହଠାତ୍ ବଢ଼ିଯାଇଛି। ଫଳରେ ମନ୍ଦିରକୁ ଯାଉଥିବା ରାସ୍ତା ଓ ଲିଙ୍ଗ ସ୍ପର୍ଶ କରିବା ସ୍ଥାନରେ ବିପଦ ସୃଷ୍ଟି ହୋଇଥିବାରୁ ଟ୍ରଷ୍ଟ ବୋର୍ଡ ପକ୍ଷରୁ ମୁଖ୍ୟ ଗେଟ୍‌ରେ ତାଲା ପକାଇ ଦିଆଯାଇଛି। ଆଜି ଶ୍ରାବଣ ମାସର ଦ୍ୱିତୀୟ ସୋମବାର ହୋଇଥିବାରୁ ହଜାର ହଜାର କାଉଡ଼ିଆ ଓ ଶିବଭକ୍ତ ଜଳାଭିଷେକ କରିବା ପାଇଁ ପଞ୍ଚଲିଙ୍ଗେଶ୍ୱରରେ ପହଞ୍ଚିଥିଲେ। ମାତ୍ର ସୁରକ୍ଷାକୁ ପ୍ରାଥମିକତା ଦେଇ ଟ୍ରଷ୍ଟ ବୋର୍ଡ ପକ୍ଷରୁ ଦର୍ଶନ ବନ୍ଦ କରାଯାଇଥିବାରୁ ଭକ୍ତମାନେ ମନ୍ଦିର ପରିସରରୁ ନିରାଶ ହୋଇ ଫେରିଯାଇଛନ୍ତି। ଟ୍ରଷ୍ଟ ବୋର୍ଡ ପକ୍ଷରୁ କୁହାଯାଇଛି ଯେ, ଜଳସ୍ତର ସ୍ୱାଭାବିକ ହେବା ପରେ ପରିସ୍ଥିତିର ସମୀକ୍ଷା କରାଯିବ। ଭକ୍ତମାନଙ୍କ ସୁରକ୍ଷାକୁ ଆଖି ଆଗରେ ରଖି ଏହି ପଦକ୍ଷେପ ନିଆଯାଇଥିବା ବେଳେ ପରିସ୍ଥିତି ସୁଧୁରିଲେ ପୁଣି ଦର୍ଶନ ବ୍ୟବସ୍ଥା ସ୍ୱାଭାବିକ କରାଯିବ। ଶ୍ରାବଣ ସୋମବାରରେ ବାବା ପଞ୍ଚଲିଙ୍ଗେଶ୍ୱରଙ୍କ ଦର୍ଶନ ଓ ଜଳାଭିଷେକ କରିବା ପାଇଁ ଆସିଥିବା ଅନେକ ଭକ୍ତ ଦର୍ଶନ ନ ପାଇ ନିରାଶ ହୋଇ ଫେରିଥିବା ଦେଖିବାକୁ ମିଳିଛି।