ଏପ୍ରିଲ-ମେ’ରେ ହୋଇପାରେ ପଞ୍ଚାୟତ ନିର୍ବାଚନ; SIR ପରେ ଚୂଡ଼ାନ୍ତ ନିଷ୍ପତ୍ତି

ଭୁବନେଶ୍ୱର: ପଞ୍ଚାୟତ ନିର୍ବାଚନ ନେଇ ବଡ଼ ସୂଚନା ଦେଇଛନ୍ତି ରାଜ୍ୟ ନିର୍ବାଚନ କମିଶନଙ୍କ ସଚିବ ସନ୍ତୋଷ କୁମାର ଦାଶ। ଚଳିତ ଥର ପଞ୍ଚାୟତ ନିର୍ବାଚନରେ ସାମାନ୍ୟ ବିଳମ୍ବ ହୋଇପାରେ। ଆସନ୍ତା ଏପ୍ରିଲ କିମ୍ବା ମେ’ ମାସ ମଧ୍ୟରେ ନିର୍ବାଚନ କରାଯିବା ନେଇ ସୂଚନା ମିଳିଛି। ସନ୍ତୋଷ କୁମାର ଦାଶ କହିଛନ୍ତି । ରାଜ୍ୟରେ ଚାଲିଥିବା SIR (Special Intensive Revision) କାର୍ଯ୍ୟ ମାର୍ଚ୍ଚ ପ୍ରଥମ ସପ୍ତାହ ପର୍ଯ୍ୟନ୍ତ ଚାଲିବ। ଭୋଟର ତାଲିକା ପ୍ରସ୍ତୁତି କାମ ଶେଷ ହେବା ପରେ ବର୍ଷା ପୂର୍ବରୁ ପଞ୍ଚାୟତ ନିର୍ବାଚନ କରାଯିବା ନେଇ ଯୋଜନା ରହିଛି। ବିଜ୍ଞପ୍ତି ପ୍ରକାଶ ପାଇବାର ୪୫ ଦିନ ମଧ୍ୟରେ ନିର୍ବାଚନ ପ୍ରକ୍ରିୟା ଶେଷ ହେବ ବୋଲି ସେ ସୂଚନା ଦେଇଛନ୍ତି। ଆଗାମୀ ୨୦୨୭ ମସିହାରେ ରାଜ୍ୟରେ ପଞ୍ଚାୟତ ଓ ପୌର ନିର୍ବାଚନ ହେବ। ଏନେଇ ପ୍ରସ୍ତୁତି ସ୍ୱରୂପ RDC ଓ ସମସ୍ତ ଜିଲ୍ଲାପାଳଙ୍କ ସହ ବୈଠକ ହୋଇସାରିଛି। ଆସନ୍ତା ୨୧ ତାରିଖରେ ମଧ୍ୟ ଏକ ରୁଟିନ୍ ସମୀକ୍ଷା ବୈଠକ ହେବ। ନିର୍ବାଚନ ପାଇଁ ଭୋଟର ତାଲିକା ପ୍ରସ୍ତୁତି ପ୍ରକ୍ରିୟାରେ ମଧ୍ୟ ପରିବର୍ତ୍ତନ କରାଯାଇଛି। ପୂର୍ବରୁ ଟେବୁଲ୍ ଉପରେ ବସି ଇଲେକ୍ଟୋରାଲ ରୋଲକୁ ୱାର୍ଡ ଅନୁସାରେ ବିଭକ୍ତ କରାଯାଉଥିଲା। କିନ୍ତୁ ଏଥର ଘର ଘର ବୁଲି (Door to Door Visit) ଯାଞ୍ଚ କରି ଭୋଟର ତାଲିକା ପ୍ରସ୍ତୁତ କରାଯିବ।ରାଜ୍ୟରେ ମୋଟ ୬,୭୯୪ଟି ପଞ୍ଚାୟତ ରହିଥିବାବେଳେ ୯୧,୯୩୦ଟି ୱାର୍ଡ ବା ବୁଥ୍ ରହିଛି। ସୁଚାରୁ ଭାବେ ନିର୍ବାଚନ ପରିଚାଳନା ପାଇଁ ନିର୍ବାଚନ କମିଶନ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଛି।