ବିରୋଧୀ ଦଳ ହିସାବରେ ବିଜେଡି ଯେତିକି ମାଇଲେଜ ନେବା କଥା ନେଇ ପାରିନାହିଁ: ବିଧାୟକ ବଦ୍ରି ପାତ୍ର

ଭୁବନେଶ୍ୱର: ରାଜ୍ୟ ସରକାରଙ୍କ ଦୋଷ ତ୍ରୁଟିକୁ ନେଇ ବିରୋଧୀ ଦଳ ହିସାବରେ ବିଜେଡ଼ି ଯେତିକି ମାଇଲେଜ ନେବା କଥା ଏଯାଏଁ ଆମେ ନେଇ ନାହୁଁ। ତଳ ସ୍ତରକୁ ଆମେ ପହଞ୍ଚି ପାରିନାହୁଁ । ଦଳର ଦଳକୁ ଛାଡି ପଳାଉଛନ୍ତି । ବିପର୍ଯ୍ୟୟ ଘଟୁଛି। ଦଳ ଦୁର୍ବଳ ହେଉଛି ଯାହାକୁ ନେଇ ନେତା ଓ କର୍ମୀଙ୍କ ମନବଳ ଭାଙ୍ଗୁଛି। ଦଳର ସଭାପତି ନବୀନ ପଟ୍ଟନାୟକ ଆସନ୍ତାକାଲି ପରାଜିତ ପ୍ରାର୍ଥୀଙ୍କ ସହିତ ବୈଠକ କରିବେ। କିନ୍ତୁ ବହୁ ଆଗରୁ ଏହା କରିବାର ଥିଲା। ବିଳମ୍ବ ହୋଇଯାଇଛି। ଆଜି ଏଭଳି କହି ଦଳୀୟ ପରିଚାଳନାକୁ ନେଇ ପୁଣି ଥରେ ଅସନ୍ତୋଷ ଜାହିର କରିଛନ୍ତି ବରିଷ୍ଠ ବିଜେଡି ନେତା ତଥା ବିଧାୟକ ବଦ୍ରି ନାରାୟଣ ପାତ୍ର । ବଦ୍ରି କହିଛନ୍ତି ଦଳ ଗୋଟେ ପରିବାର। ନେତାଙ୍କୁ ବିଶ୍ୱାସ ନ ନେଲେ,ଆଦର ନକଲେ ସେମାନେ ଛାଡି ପଳାଉଛନ୍ତି । ଟୋପେ ଟୋପେ ହେଇ ଦଳ ସମୁଦ୍ର ହୋଇଛି।  ଜଣେ ବି ଦଳ ଛାଡିଲେ କ୍ଷତି ହେଉଛି । ନେତା ଦଳ ଛାଡିଲେ ଯଦି ଆମେ କହିବା ଦଳ ସୁଦୃଢ଼ ଅଛି ତାହାଲେ ଠିକ୍ ନୁହଁ। ଯିଏ ଅସନ୍ତୁଷ୍ଟ ଅଛନ୍ତି ତାଙ୍କୁ ଡାକି ଆଲୋଚନା କରାଯାଇ ପାରିବ । ସେହିପରି ବିଜେଡିରେ ସୁଜାତାଙ୍କ ଏଣ୍ଟ୍ରି କଥା ଉଡ଼ା ଖବର ହୋଇଥାଇପାରେ ବୋଲି ବଦ୍ରି କହିଛନ୍ତି । ପାଣ୍ଡିଆନଙ୍କୁ ନେଇ କୋଉ କର୍ମୀ ଉତ୍ସାହିତ ଅଛନ୍ତି?  କିଏ ଜଣେ ଅଧେ କହିଦେଲେ ତାକୁ ନେଇ ଦଳର ମତ କୁହାଯାଇପାରିବ ନାହିଁ। ଦେବାଶିଷ ସାମନ୍ତରାୟ କହିଛନ୍ତି ବିପର୍ଯ୍ୟୟ ପାଇଁ ପାଣ୍ଡିଆନ ଦାୟୀ। ମୁଁ ବି ବହୁ ଆଗରୁ ଏହା କହିସାରିଛି ବୋଲି ବଦ୍ରି କହିଛନ୍ତି । ଅନ୍ୟପଟେ ରାଜ୍ୟ ସରକାରଙ୍କର ଦୁଇ ବର୍ଷ ପୂର୍ତ୍ତୀକୁ ନେଇ ବଦ୍ରି କ଼ଡା ସମାଲୋଚନା କରିଛନ୍ତି । କହିଛନ୍ତି ରାଜ୍ୟ ସରକାର ବଡ଼ ବଜେଟ୍ କରିଦେଲେ । ହେଲେ ଅର୍ଥ ନାହିଁ । ଏହାକୁ ଭରଣା କରିବା ପାଇଁ ଏବେ ସରକାର ପଞ୍ଚାୟତ ମୁହାଁ ହୋଇଛି । ଲୋକଙ୍କ ଠାରୁ କିଭଳି ଅଧିକରୁ ଅଧିକ ରାଜସ୍ୱ ସଂଗ୍ରହ ହେବ ସେଥିପାଇଁ  ଚେଷ୍ଟା ଚାଲିଛି । ପଞ୍ଚାୟତ କୁ ସେବା ଯୋଗାଇ ପୂର୍ବ ରୁ ରାଜସ୍ୱ ଆଦାୟ ହେଉ ନଥିଲା । ଏବେ ଆଦାୟ ହେଉଛି । ଏହା ଦ୍ବାରା ଗରିବ ଲୋକ ଙ୍କ ଉପରେ ଟିକସ ଭାର ପଡିବ। ସରକାର ବିଭିନ୍ନ କ୍ଷେତ୍ର ରୁ ରାଜସ୍ୱ ଆଦାୟ କରୁଛନ୍ତି । ତା ବାଦ ପୁଣି ପଞ୍ଚାୟତ ସ୍ତରରେ କାହିଁକି ଆଦାୟ କରୁଛନ୍ତି ସେ କଥା ଲୋକେ ବିଚାର କରିବେ । ସରକାର ଗୋଟିଏ ପଟେ ମାଗଣା ଚାଉଳ ବଣ୍ଟନ କରୁଛନ୍ତି ଅନ୍ୟ ପଟେ ରାଜସ୍ୱ ଆଦାୟ କରୁଛନ୍ତି ଏହା ଖାପ୍ ଖାଉନାହିଁ । ମହଙ୍ଗା ମାଡରେ ଲୋକେ ଅତିଷ୍ଟ ହେଲେଣି । ଦରଦାମ୍ ବୃଦ୍ଧି ଯୋଗୁଁ ସମାଜର ସବୁ ବର୍ଗର ଲୋକେ ହନ୍ତସନ୍ତ ହେଉଛନ୍ତି। ଏ ଦିଗରେ ସରକାର ସମ୍ବେଦନଶୀଳ ହେବା ଉଚିତ । ବିଜେପି ସରକାରଙ୍କ ଦୁଇ ବର୍ଷ ପୂରଣ ପ୍ରସଙ୍ଗରେ ପ୍ରତିକ୍ରିୟା ପ୍ରକାଶ କରି  ବଦ୍ରି ଆହୁରି କହିଛନ୍ତି ଯେ, ସରକାରଙ୍କ କଣ ଉପଲବ୍ଧି ତାହା ଏ ପର୍ଯ୍ୟନ୍ତ ଜଣା ପଡିନାହିଁ । ଅନେକ ପ୍ରକଳ୍ପରେ ଅର୍ଥ ଖର୍ଚ୍ଚ ହୋଇଛି ହେଲେ କାମ ହୋଇନାହିଁ । ଉନ୍ନୟନ କାମ ଠପ୍ ହୋଇଯାଇଛି । ସରକାର ପ୍ରତ୍ୟେକ ପଞ୍ଚାୟତରେ ତାଙ୍କ ଉପଲବ୍ଧି କରିବା କଥା କହୁଛନ୍ତି ତାହା ସ୍ୱାଗତ ଯୋଗ୍ୟ ପଦକ୍ଷେପ । ଓଡ଼ିଶାର ଭୋଟର ବଳଶାଳୀ ନୁହନ୍ତି । ତାଙ୍କୁ ସଶକ୍ତ କରିବାର ଆବଶ୍ୟକତା ରହିଛି । ପଞ୍ଚାୟତ ନିର୍ବାଚନ ପୂର୍ବରୁ ବିଜେଡିର ବରିଷ୍ଠ ବିଧାୟକଙ୍କ ଏଭଳି ସ୍ପଷ୍ଟୋକ୍ତି ଏବଂ ପାଣ୍ଡିଆନଙ୍କ ବିରୋଧରେ ଖୋଲା ଘୋଷଣା ଏବେ ରାଜନୀତିକୁ ଆହୁରି ସରଗରମ କରିଦେଇଛି। ଏବେ ଦଳୀୟ ସଂଗଠନକୁ ସଜାଡ଼ିବା ପାଇଁ ସଭାପତି ନବୀନ ପଟ୍ଟନାୟକ କି ପଦକ୍ଷେପ ନେଉଛନ୍ତି, ତାହା ଦେଖିବାକୁ ବାକି ରହିଲା।