ରାଜ୍ୟ ସରକାରଙ୍କ ପ୍ରତିଶ୍ରୁତି: ତ୍ରୁଟିଶୂନ୍ୟ ନୂଆ ପାଠ୍ୟପୁସ୍ତକ ଶୀଘ୍ର ପିଲାଙ୍କୁ ଯୋଗାଇ ଦିଆଯିବ

ଭୁବନେଶ୍ୱର : ରାଜ୍ୟ ସରକାର ସମସ୍ତ ସ୍କୁଲର ପ୍ରଥମରୁ ଅଷ୍ଟମ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀଙ୍କୁ ତ୍ରୁଟିଶୂନ୍ୟ ନୂଆ ପାଠ୍ୟପୁସ୍ତକ ଯୋଗାଇ ଦେବା ପାଇଁ ପ୍ରତିଶ୍ରୁତି ଦେଇଛନ୍ତି। ବିଦ୍ୟାଳୟ ଓ ଗଣଶିକ୍ଷା ସଚିବ ଏନ୍. ଥିରୁମାଲା ନାୟକ କହିଛନ୍ତି ଯେ ପୁସ୍ତକରେ ଥିବା ତ୍ରୁଟିଗୁଡିକର ତର୍ଜମା ଚାଲିଛି ଏବଂ ଖୁବଶୀଘ୍ର ପିଲାଙ୍କୁ ସଂଶୋଧିତ ନୂଆ ବହି ଦିଆଯିବ। କହିଛନ୍ତି, ନୂଆ ବହି ଆସିବା ପର୍ଯ୍ୟନ୍ତ SCERT ଓ OSEPA ମାଧ୍ୟମରେ ଜିଲ୍ଲା ଶିକ୍ଷା ଅଧିକାରୀମାନଙ୍କୁ ଦିଆଯାଇଥିବା ସଂଶୋଧିତ ସୂଚନା ଆଧାରରେ ପାଠପଢା ଚାଲିବ।  SCERT ଟିମ୍, ସମ୍ପାଦନା ମଣ୍ଡଳୀ ଓ ଶିକ୍ଷାବିତମାନେ ମିଶି ବହିର ଏହି ତ୍ରୁଟିଗୁଡିକୁ ପୁନଃତର୍ଜମା କରୁଛନ୍ତି ଏବଂ ସଂଶୋଧନ ପରେ ସମ୍ପୂର୍ଣ୍ଣ ନୂଆ ଓ ସଠିକ୍ ପୁସ୍ତକ ଉପଲବ୍ଧ କରାଯିବ ବୋଲି ସଚିବ ସୂଚନା ଦେଇଛନ୍ତି। ସଚିବ ଆହୁରି କହିଛନ୍ତି ଯେ “ଗୁରୁଚଣ୍ଡାଳ ତ୍ରୁଟି” ବୋଲି ଯେତେ ଆଲୋଚନା ହେଉଛି । ତେବେ ବାସ୍ତବରେ ସେତେ ତ୍ରୁଟି ନାହିଁ।  ଯେତିକି ତ୍ରୁଟି ଉପରେ ଚର୍ଚ୍ଚା ଆଲୋଚନା ହେଉଛି ସେତିକି ତ୍ରୁଟି ନାହିଁ ବୋଲି କହିଛନ୍ତି ବିଦ୍ୟାଳୟ ଓ ଗଣଶିକ୍ଷା ବିଭାଗ ସଚିବ । କିଛି ଶଦ୍ଦ, ବନାନକୁ ନେଇ ଭିନ୍ନ ଭିନ୍ନ ଦ୍ଵନ୍ଦ ରହିଛି । ପୂର୍ଣ୍ଣଚନ୍ଦ୍ର ଭାଷାକୋଷ ସହ ଅନ୍ୟ ଓଡ଼ିଆ ଅଭିଧାନକୁ ନେଇ ବହିରେ ଥିବା ଶଦ୍ଦ ଓ ବ୍ୟାକରଣ ଗତ ତ୍ରୁଟିର ସମୀକ୍ଷା ଚାଲିଛି । ଯଥାଶୀଘ୍ର ସମ୍ଭବ ଆମେ ପିଲାଙ୍କୁ ବହି ଯୋଗାଇ ଦେବାକୁ କାମ କରୁଛୁ ବୋଲି କହିଛନ୍ତି ଏନ୍. ଥିରୁମାଲା ।