National Urban Conclave: ୨୦୩୬ ସୁଦ୍ଧା ଓଡ଼ିଶାକୁ ୫୦୦ ବିଲିଅନ୍ ଡଲାର ଅର୍ଥନୀତିରେ ପରିଣତ କରିବା ଲକ୍ଷ୍ୟ: ମୁଖ୍ୟମନ୍ତ୍ରୀ

ଭୁବନେଶ୍ୱର: ୨୦୩୬ ମସିହାରେ ଓଡ଼ିଶା ସ୍ୱତନ୍ତ୍ର ରାଜ୍ୟ ଗଠନର ୧୦୦ ବର୍ଷ ପୂରଣ କରିବାକୁ ଯାଉଥିବା ବେଳେ, ରାଜ୍ୟକୁ ୫୦୦ ବିଲିଅନ୍ ଡଲାର ଅର୍ଥନୀତିରେ ପରିଣତ କରିବା ସହ ଏକ ସମୃଦ୍ଧ ଓ ବିକଶିତ ଓଡ଼ିଶା ଗଠନ ଆମର ମୁଖ୍ୟ ଲକ୍ଷ୍ୟ ବୋଲି କହିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ଭୁବନେଶ୍ୱରରେ ଆୟୋଜିତ National Urban Conclave-2026ରେ ଯୋଗଦେଇ ସେ ଏହା କହିଛନ୍ତି। ମୁଖ୍ୟମନ୍ତ୍ରୀଙ୍କ ଅନୁଯାୟୀ, ବର୍ତ୍ତମାନ ରାଜ୍ୟର ସହରୀକରଣ ହାର ୧୭ ପ୍ରତିଶତ ଥିବାବେଳେ ୨୦୩୬ ସୁଦ୍ଧା ଏହାକୁ ୪୦ ପ୍ରତିଶତକୁ ବୃଦ୍ଧି କରିବାର ଲକ୍ଷ୍ୟ ରହିଛି। ଏଥିପାଇଁ ଆଧୁନିକ ଭିତ୍ତିଭୂମି, ସହରୀ ସୁବିଧା ଓ ଯୋଜନାବଦ୍ଧ ନଗର ବିକାଶ ଉପରେ ଗୁରୁତ୍ୱ ଦିଆଯାଉଛି। ପ୍ରଧାନମନ୍ତ୍ରୀଙ୍କ ‘ବିକଶିତ ଭାରତ ୨୦୪୭’ ଓ ‘ପୂର୍ବୋଦୟ’ ଦୃଷ୍ଟିକୋଣ ଅନୁସାରେ ଓଡ଼ିଶା ଦେଶର ଏକ ପ୍ରମୁଖ ଅର୍ଥନୈତିକ ବିକାଶ କେନ୍ଦ୍ର ଭାବେ ଉଭା ହେଉଛି। ଶିଳ୍ପ, ବନ୍ଦର, ପର୍ଯ୍ୟଟନ ଓ ସେବା କ୍ଷେତ୍ରରେ ନିବେଶ ବୃଦ୍ଧି ପାଉଥିବାବେଳେ ରାଜ୍ୟକୁ ୨୩ ଲକ୍ଷ କୋଟି ଟଙ୍କାର ନିବେଶ ପ୍ରସ୍ତାବ ମିଳିଛି। ଏଥିମଧ୍ୟରୁ ୩.୫ ଲକ୍ଷ କୋଟି ଟଙ୍କାର ନିବେଶ ସହ ୨୦୦ରୁ ଅଧିକ ଶିଳ୍ପ ପ୍ରକଳ୍ପର କାର୍ଯ୍ୟାନ୍ୱୟନ ଆରମ୍ଭ ହୋଇଛି।

ଭୁବନେଶ୍ୱର-କଟକ-ପୁରୀ-ପାରାଦୀପ ଇକୋନୋମିକ୍ ରିଜିଅନ୍ (BKPPER) ବିକାଶ ସହ ନୂତନ ସାଟେଲାଇଟ୍ ଟାଉନସିପ୍ ଗଠନ ଉପରେ କାର୍ଯ୍ୟ ଚାଲିଛି। ଏହା ସହିତ ୨୮ଟି ନୂତନ ଏନ୍‌ଏସି, ୭ଟି ମ୍ୟୁନିସିପାଲିଟି ଓ ଗୋଟିଏ ମ୍ୟୁନିସିପାଲ୍ କର୍ପୋରେସନ୍ ଗଠନ କରାଯାଇଛି। ସହରୀ ଜନକଲ୍ୟାଣ କ୍ଷେତ୍ରରେ PMAY-Urban ଅଧୀନରେ ୧.୫୩ ଲକ୍ଷ ଘର ନିର୍ମାଣ ହୋଇଛି। PMAY 2.0ର ‘PMAY Urban Bandhu’ କାର୍ଯ୍ୟକ୍ରମ ପାଇଁ ଆଗାମୀ ପାଞ୍ଚ ବର୍ଷରେ ୧,୬୧୫ କୋଟି ଟଙ୍କା ମଞ୍ଜୁର ହୋଇଛି। ସେହିପରି ସହରୀ ଭିତ୍ତିଭୂମି ପାଇଁ ୬,୦୦୦ କୋଟି ଟଙ୍କା ଏବଂ ‘ସ୍ୱଚ୍ଛ ଓଡ଼ିଶା ଯୋଜନା’ ପାଇଁ ୧,୬୦୦ କୋଟି ଟଙ୍କାର ବ୍ୟବସ୍ଥା ରହିଛି। ସମ୍ମିଳନୀର ମୁଖ୍ୟ ବିଷୟବସ୍ତୁ ‘ଚାଲିବାର ଅଧିକାର’ ଉପରେ ଗୁରୁତ୍ୱ ଦେଇ ମୁଖ୍ୟମନ୍ତ୍ରୀ ସୁରକ୍ଷିତ ଫୁଟପାଥ୍, ରାସ୍ତା ପାର ହେବାର ସୁବିଧା ଓ ସାର୍ବଜନୀନ ସ୍ଥାନର ଯୋଜନାବଦ୍ଧ ବିକାଶକୁ ଗୁରୁତ୍ୱ ଦେଇଥିଲେ। CRUT ଅଧୀନରେ ବର୍ତ୍ତମାନ ୭୭୦ଟି ବସ୍ ୧୩୮ଟି ରୁଟ୍‌ରେ ଚଳାଚଳ କରୁଛି। ଏହା ସହ PM E-Bus ସେବାରେ ୨୬ଟି ଇ-ବସ୍ ଆରମ୍ଭ ହୋଇଥିବାବେଳେ ଆଗକୁ ଅଧିକ ଇ-ବସ୍ ଯୋଡ଼ାଯିବ।

ନୀତି ଆୟୋଗର CEO ଅନୁରାଗ ଜୈନ କହିଥିଲେ ଯେ ୨୦୪୭ ସୁଦ୍ଧା ଭାରତର ୫୦ ପ୍ରତିଶତ ଜନସଂଖ୍ୟା ସହରାଞ୍ଚଳରେ ବସବାସ କରିବେ ଏବଂ ଦେଶର GDPର ୭୫ ପ୍ରତିଶତ ଯୋଗଦାନ ଦେବେ। ତେଣୁ ସୁସଂଗଠିତ ଓ ଯୋଜନାବଦ୍ଧ ସହରୀକରଣ ଅର୍ଥନୈତିକ ପ୍ରଗତି ପାଇଁ ଅତ୍ୟନ୍ତ ଜରୁରୀ ବୋଲି ସେ ମତ ଦେଇଥିଲେ। ଏହି ଅବସରରେ ମୁଖ୍ୟମନ୍ତ୍ରୀ ‘ଅଙ୍କୁର ହ୍ୟାଣ୍ଡବୁକ୍’, ‘ଟାଉନ୍ ପ୍ଲାନିଂ ହ୍ୟାଣ୍ଡବୁକ୍’ ଉନ୍ମୋଚନ କରିବା ସହ ନୂତନ ନଗର ଉନ୍ନୟନ ନୀତିର ଶୁଭାରମ୍ଭ କରିଥିଲେ।