NTPC ପ୍ଲାଣ୍ଟରେ ମଧ୍ୟରାତ୍ରିରେ ଭୟଙ୍କର ବିସ୍ଫୋରଣ: ନିଆଁର ଶିଖା ଭିତରେ ଝୁଲସିଗଲେ ୫ ଶ୍ରମିକ, ୨ ଜଣଙ୍କ ଅବସ୍ଥା ଅତି ସଙ୍କଟାପନ୍ନ!

ଅନୁଗୋଳ : ଅନୁଗୋଳ ଜିଲ୍ଲା କଣିହାସ୍ଥିତ NTPC (ତାଳଚେର ସୁପର ଥର୍ମାଲ ପାୱାର ଷ୍ଟେସନ) ପ୍ଲାଣ୍ଟରେ ଏକ ଅଭାବନୀୟ ଓ ଭୟଙ୍କର ଦୁର୍ଘଟଣା ଘଟିଛି। ୟୁନିଟ୍-୧ ର ବଙ୍କର-ବି (Bunker-B) ରେ ହଠାତ୍ ବିସ୍ଫୋରଣ ଘଟି ୫ ଜଣ କାର୍ଯ୍ୟରତ ଶ୍ରମିକ ଗୁରୁତର ଭାବେ ଆହାତ ହୋଇଛନ୍ତି। ​ମିଳିଥିବା ସୂଚନା ଅନୁଯାୟୀ, ଗତକାଲି ବିଳମ୍ବିତ ରାତିରେ (ଶନିବାର ଭୋର ସମୟରେ) ବଙ୍କର-ବି ନିକଟରେ ଶ୍ରମିକମାନେ କାର୍ଯ୍ୟ କରୁଥିବା ସମୟରେ ହଠାତ୍ ଏହି ଶକ୍ତିଶାଳୀ ବିସ୍ଫୋରଣ ଘଟିଥିଲା। ବିସ୍ଫୋରଣର ତୀବ୍ରତା ଏତେ ଅଧିକ ଥିଲା ଯେ ଘଟଣାସ୍ଥଳରେ କାର୍ଯ୍ୟରତ ୫ ଜଣ ଶ୍ରମିକ ଗୁରୁତର ଭାବେ ଝୁଲସି ଯାଇଥିଲେ। ​ଦୁର୍ଘଟଣା ପରେ NTPCର ସୁରକ୍ଷା କର୍ମୀ ଓ ସ୍ଥାନୀୟ ଲୋକଙ୍କ ସହାୟତାରେ ଆହାତ ଶ୍ରମିକମାନଙ୍କୁ ତୁରନ୍ତ ଉଦ୍ଧାର କରାଯାଇ ପ୍ରଥମେ NTPC ସ୍ୱାସ୍ଥ୍ୟକେନ୍ଦ୍ର ଓ ପରେ ତାଳଚେର ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ତେବେ ୨ ଜଣ ଶ୍ରମିକଙ୍କ ଅବସ୍ଥା ଅଧିକ ସଙ୍କଟାପନ୍ନ ଥିବାରୁ ସେମାନଙ୍କୁ ଉନ୍ନତମାନର ଚିକିତ୍ସା ପାଇଁ ଭୁବନେଶ୍ୱରର ଏକ ହସ୍ପିଟାଲ କୁ ସ୍ଥାନାନ୍ତର କରାଯାଇଛି। ​ବିସ୍ଫୋରଣର ପ୍ରକୃତ କାରଣ ଏପର୍ଯ୍ୟନ୍ତ ଅସ୍ପଷ୍ଟ ରହିଛି। ଗ୍ୟାସ୍ ଲିକ୍ କିମ୍ବା ବୈଷୟିକ ତ୍ରୁଟି ଯୋଗୁଁ ଏହି ବିସ୍ଫୋରଣ ଘଟିଥାଇପାରେ ବୋଲି ପ୍ରାଥମିକ ଆକଳନ କରାଯାଉଛି। ଘଟଣାପରେ NTPC ର ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ପରିସ୍ଥିତିର ସମୀକ୍ଷା କରିବା ସହ ଦୁର୍ଘଟଣାର ଉଚ୍ଚସ୍ତରୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି।