ମନୀଷା ମିତ୍ତଲ ହତ୍ୟାକାଣ୍ଡ: ଶିମଲାରେ ଚର୍ଚ୍ଚିତ ମାମଲାର ତଦନ୍ତରେ ନୂଆ ମୋଡ଼

ଶିମଲା: ଚର୍ଚ୍ଚିତ ମନୀଷା ମିତ୍ତଲ ହତ୍ୟାକାଣ୍ଡ ମାମଲାର ତଦନ୍ତ । ହିମାଚଳ ପ୍ରଦେଶର ରାଜଧାନୀ ଶିମଲାର ଜଣେ ପ୍ରତିଷ୍ଠିତ ବେସରକାରୀ ସ୍କୁଲର ସଞ୍ଚାଳିକା ମନୀଷା ମିତ୍ତଲଙ୍କୁ ଦିନ ଦ୍ବିପହରରେ ଗୁଳି କରି ହତ୍ୟା କରାଯାଇଛି। ଏହି ମାମଲାରେ ଦୁଇ ସୁଟର ଗିରଫ  । ଦୁଇ ଶୁଟରଙ୍କୁ ହରିୟାଣାରୁ ଶିମଲା ଅଣାଯାଇଥିବା ବେଳେ ସେମାନଙ୍କୁ କୋର୍ଟ ଚଲାଣ କରଜାଇଛି। ପୋଲିସ ଏହି ଦୁଇ ଅଭିଯୁକ୍ତଙ୍କୁ ରିମାଣ୍ଡରେ ନେବା ପାଇଁ ଆବେଦନ କରିବା ସହ ଦୁଇ ଅଭିଯୁକ୍ତଙ୍କୁ ସାମ୍ନାସାମ୍ନି ବସାଇ ପଚରାଉଚରା କରିବା ସହ ହତ୍ୟା ପଛରେ ଥିବା ମାଷ୍ଟରମାଇଣ୍ଡ କିଏ,ସୁପାରି ରାଶି, ଷଡଯନ୍ତ୍ରରେ ସାମିଲ ବ୍ୟକ୍ତି ଏବଂ ପ୍ରମାଣ ନଷ୍ଟ କରିବା ଉଦ୍ୟମ ସମ୍ପର୍କରେ ଅଧିକ ତଥ୍ୟ ସଂଗ୍ରହ କରିବାକୁ ଚେଷ୍ଟା କରିବ। ପୋଲିସ ସୂତ୍ର ଅନୁସାରେ, ଘଟଣା ପରେ ଦୁଇ ସୁଟର ରାଜ୍ୟ ବାହାରକୁ ଫେରାର ହୋଇଯାଇଥିଲେ। ବିଭିନ୍ନ ରାଜ୍ୟର ପୋଲିସ  ସହଯୋଗରେ ସେମାନଙ୍କୁ ହରିୟାଣାରୁ ଗିରଫ କରାଯାଇଛି। ପୋଲିସର ସନ୍ଦେହ ଯେ ଧରାପଡ଼ିଥିବା ଦୁଇ ଜଣ କେବଳ ଭଡ଼ାଟିଆ ସୁଟର ଏବଂ ଏହି ହତ୍ୟାକାଣ୍ଡ ପଛରେ ଅନ୍ୟ କୌଣସି ପ୍ରଭାବଶାଳୀ ବ୍ୟକ୍ତି କିମ୍ବା ମାଷ୍ଟରମାଇଣ୍ଡର ହାତ ଥାଇପାରେ।  ମନୀଷା ମିତ୍ତଲଙ୍କ ହତ୍ୟା ପଛରେ କ’ଣ ପ୍ରକୃତ କାରଣ ରହିଛି, ତାହା ଜାଣିବା ପାଇଁ ପୋଲିସ ସମ୍ପତ୍ତି ବିବାଦ, ପୂର୍ବ ଶତ୍ରୁତା, ଆର୍ଥିକ କାରବାର  ଭଳି ବିଭିନ୍ନ ଦିଗକୁ ଆଧାର କରି ତଦନ୍ତ କରୁଛି। ଏହା କୌଣସି ଆକସ୍ମିକ ଘଟଣା ନୁହେଁ; ବରଂ ପୂର୍ବ ଯୋଜନା ଅନୁସାରେ  ହତ୍ୟାକାଣ୍ଡ କରାଯାଇଛି। ତଦନ୍ତରେ ଏହା ମଧ୍ୟ ସନ୍ଦେହ କରାଯାଉଛି ଯେ ହତ୍ୟା ପୂର୍ବରୁ ମନୀଷା ମିତ୍ତଲଙ୍କ ଦୈନନ୍ଦିନ କାର୍ଯ୍ୟକଳାପ, ଯାତାୟାତ  ଉପରେ ଦୀର୍ଘ ସମୟ ଧରି ନଜର ରଖାଯାଇଥିଲା। ଏଥିରୁ ସ୍ପଷ୍ଟ ହେଉଛି ଯେ ହତ୍ୟାକାରୀମାନେ ତାଙ୍କୁ ଟାର୍ଗେଟ କରିବା ପାଇଁ ଯୋଜନାବଦ୍ଧ ଭାବରେ ପ୍ରସ୍ତୁତି କରିଥିଲେ। ପୋଲିସ ହତ୍ୟାରେ ବ୍ୟବହୃତ ଅସ୍ତ୍ର ମଧ୍ୟ ଜବତ କରିଛି । ଫରେନସିକ ଟିମ୍ ଜବତ ହୋଇଥିବା ଅସ୍ତ୍ର ସମେତ ଅନ୍ୟାନ୍ୟ ସାମଗ୍ରୀର ଯାଞ୍ଚ କରୁଛନ୍ତି। ଏହାସହ ମୋବାଇଲ ଫୋନ ରେକର୍ଡ, ସିସିଟିଭି ଫୁଟେଜ,କଲ୍ ଡିଟେଲ୍ସ ଓ ଅନ୍ୟାନ୍ୟ ଡିଜିଟାଲ ପ୍ରମାଣକୁ ମଧ୍ୟ ତଦନ୍ତ ଘେରକୁ ଆଣିଛି। ଜଣେ ଶିକ୍ଷାନୁଷ୍ଠାନର ସଞ୍ଚାଳିକାଙ୍କୁ ଦିନ ଦ୍ବିପହରରେ ଗୁଳି କରି ହତ୍ୟା କରାଯିବା ଘଟଣା ସମସ୍ତଙ୍କୁ ଚକିତ କରିଛି । ମନୀଷା ମିତ୍ତଲ ଶିକ୍ଷା କ୍ଷେତ୍ରରେ ଜଣେ ପରିଚିତ ନାମ ଥିବା ବେଳେ ତାଙ୍କୁ ହତ୍ୟା ପରେ ପରିବାର ପକ୍ଷରୁ ଦୋଷୀଙ୍କୁ କଠୋର ଦଣ୍ଡ ଦେବାକୁ ଦାବି କରୁଛନ୍ତି। ଘଟଣାକୁ ନେଇ ପୋଲିସର ଅଧିକ ତଦନ୍ତ ଜାରି  ।

ରିପୋର୍ଟ ସମ୍ପଦା ମିଶ୍ର