ସୁପ୍ରିମକୋର୍ଟ ବିଚାରପତିଙ୍କୁ ନ୍ୟାୟିକ ସେବକ କହି ଓକିଲଙ୍କ ହଙ୍ଗାମା

ସୁପ୍ରିମକୋର୍ଟରେ ଓକିଲଙ୍କ ହଙ୍ଗାମା। ବିଚାରପତିଙ୍କୁ ନ୍ୟାୟିକ ସେବକ ବୋଲି କହିଲେ ଓକିଲ। ଆଉ ନିଜକୁ ସଂପ୍ରଭୂ ଦର୍ଶାଇଲେ। କେବଳ ଏତିକି ନୁହେଁ। ପ୍ରଧାନ ବିଚାରପତିଙ୍କୁ ଗାଳି କରିବା ସହ କାଗଜ ବି ଫଙ୍ଗିଲେ। ସୁପ୍ରିମକୋର୍ଟ ସଂପୃକ୍ତ ଓକିଲଙ୍କ ପିଟିସନ ଅବଶ୍ୟ ଖାରଜ କରିଦେଲେ। କିନ୍ତୁ ତାଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନେଲେନି। ଶୁକ୍ରବାର ସୁପ୍ରିମକୋର୍ଟ ଭିତରେ ଏଭଳି ଏକ ନାଟକୀୟ ଘଟଣା ଦେଖିବାକୁ ମିଳିଥିଲା। ଶୁଣାଣୀ ବେଳେ ପ୍ରଧାନ ବିଚାରପତିଙ୍କ ବିରୁଦ୍ଧରେ ଅପଶବ୍ଦର ପ୍ରୟୋଗ କରିଥିଲେ। ଏ ଘଟଣାର ଭିଡ଼ିଓ ସୋସିଆଲ ମିଡିଆରେ ଭାଇରାଲ ହେଉଛି। ଆବେଦନକାରୀଙ୍କ ନାଁ ପ୍ରବଳ ପ୍ରତାପ। ଯିଏ ନ୍ୟାୟମୂର୍ତ୍ତି କେବି.ବିଶ୍ୱନାଥନ ଓ ଜଷ୍ଟିସ ଆଲୋକ ଆରାଧେଙ୍କ ଖଣ୍ଡପୀଠ ଆଗରେ ଆହ୍ଲାବାଦ ହାଇକୋର୍ଟଙ୍କ ଏକ ଆଦେଶକୁ ଚ୍ୟାଲେଞ୍ଜ କରାଯାଇଥିବା ପିଟିସନ ଉପରେ ତର୍କ ରଖୁଥିଲେ। ଶୁଣାଣୀ ଅବସରରେ ସେ ବିଚାରପତିଙ୍କୁ ଜୁଡିସିଆଲ ସରଭ୍ୟାଣ୍ଟ ବୋଲି ସମ୍ୱୋଧିତ କରିଥିଲେ। ଭାଇରାଲ ଭିଡ଼ିଓରେ ଦେଖାଯାଉଛି ଯେ, ସେ କହୁଛନ୍ତି, ନ୍ୟାୟିକ ସେବକ ମହୋଦୟ। ମୁଁ ଆପଣଙ୍କୁ ଲକ୍ଷ୍ନୌର ବିକାଶନଗର ଏସପିଙ୍କ ବିରୁଦ୍ଧରେ ଏତଲା ରୁଜୁ କରିବାକୁ ନିର୍ଦେଶ ଦେବାକୁ ଆଦେଶ ଦେଉଛି। ଏହି ଟିପ୍ପଣୀର ଜବାବରେ ଜଷ୍ଟିସ ବିଶ୍ୱନାଥନ ପଚାରିଥିଲେ, କଅଣ ଆପଣ ଆମକୁ ଆଦେଶ ଦେଉଛନ୍ତି। ଆଉ ଉତ୍ତରରେ ଓକିଲ କହିଥିଲେ, ମୁଁ ସଂପ୍ରଭୂ ଅଟେ। ତେବେ ହଙ୍ଗାମା ଏତେ ବଢ଼ିଥିଲା ଯେ, ଓକିଲ ଏ ସଂକ୍ରାନ୍ତୀୟ କାଗଜ ଫିଙ୍ଗିଥିଲେ ଓ ବିଚାରପତିଙ୍କ ସହ ଦୁର୍ବ୍ୟବହାର କରିଥିଲେ। କୋର୍ଟର ଅଧିକାରୀ ତାଙ୍କୁ ବାହାରକୁ ନେବା ବେଳେ ସେ ଅପଶବ୍ଦ ବ୍ୟବହାର କରିଥିଲେ। ଏଭଳି ହଙ୍ଗାମା ଭିତରେ କୋର୍ଟ ଶୁଣାଣୀ ଜାରି ରଖିଥିଲେ। ଆଉ ନିଜ ଆଦେଶ ଦେଇଥିଲେ। ସୁପ୍ରିମକୋର୍ଟ ଏହି ଏସଏଲପିକୁ ଖାରଜ କରି କହିଥିଲେ, ଆବେଦନକାରୀଙ୍କ ଆପତ୍ତିଜନକ ଆଚରଣରୁ ତାଙ୍କ ବିରୁଦ୍ଧରେ କୌଣସି କାର୍ଯ୍ୟାନୁଷ୍ଠାନ ନେବେନି ଅଦାଲତ। ଏହା ସହ ସଂପୃକ୍ତ ଓକିଲଙ୍କୁ ବ୍ୟକ୍ତିଗତ ଭାବେ ହାଜର ହେବା ଓ ଯୁକ୍ତି ରଖିବାକୁ ଅନୁମତି ମାଗିଥିବା ସମସ୍ତ ଲମ୍ୱିତ ଆବେଦନ ଓ ପିଟିସନକୁ ବି ଅଗ୍ରାହ୍ୟ କରିଦେଇଛନ୍ତି।