ଅଧା ରାତିରେ ହୋଟେଲରେ ଭୟଙ୍କର ନିଆଁ: ୯ ମୃତ, ମୃତକଙ୍କ ମଧ୍ୟରେ ବାଂଲାଦେଶୀ ନାଗରିକ

କୋଲକାତା: କୋଲକାତାର ମିର୍ଜା ଗାଲିବ ଷ୍ଟ୍ରିଟ୍‌ସ୍ଥିତ ଏକ ହୋଟେଲରେ ମଙ୍ଗଳବାର ବିଳମ୍ବିତ ରାତିରେ ଭୟାବହ ଅଗ୍ନିକାଣ୍ଡ ଘଟି ୯ ଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଜଣେ ବାଂଲାଦେଶୀ ନାଗରିକ ଥିବା ଜଣାପଡ଼ିଛି। ସେ ଚିକିତ୍ସା ପାଇଁ କୋଲକାତା ଆସିଥିବା ସୂଚନା ମିଳିଛି। ରାତି ପ୍ରାୟ ୨ଟା ସମୟରେ ହୋଟେଲର ତୃତୀୟ ମହଲାରେ ନିଆଁ ଲାଗିଥିଲା। ନିଆଁ ଲାଗିବା ବେଳେ ଗଭୀର ନିଦରେ ଶୋଇଥିଲେ ଲୋକେ। କେହି କିଛି ବୁଝିବା ଆଗରୁ ପୁରା ପରିସର ଧୂଆଁମୟ ହୋଇଯାଇଥିଲା । ଶିଶୁ, ମହିଳା ସମେତ ୯ଜଣଙ୍କ ଶ୍ୱାସରୁଦ୍ଧରୁ ଜୀବନ ଚାଲିଯାଇଛି। ଅନ୍ୟ ଗୁରୁତର ମରଣ ସହ ସଂଘର୍ଷ କରୁଛନ୍ତି। ଖବର ପାଇ ଅଗ୍ନିଶମ ବାହିନୀର ଏକାଧିକ ଗାଡ଼ି ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା। ଅତ୍ୟନ୍ତ ସରୁ ଗଳି ଓ ସଙ୍କୀର୍ଣ୍ଣ ରାସ୍ତା ଯୋଗୁଁ ଦମକଳ ଗାଡ଼ିଗୁଡ଼ିକୁ ଘଟଣାସ୍ଥଳରେ ପହଞ୍ଚିବାରେ ବାଧା ସୃଷ୍ଟି ହୋଇଥିଲା। ତଥାପି ଉଦ୍ଧାରକାରୀ ଦଳ ୬୦ରୁ ଅଧିକ ଲୋକଙ୍କୁ ସୁରକ୍ଷିତ ଭାବେ ହୋଟେଲରୁ ବାହାର କରିଥିଲେ।

ପ୍ରାରମ୍ଭିକ ତଦନ୍ତରେ ଏସି ବିସ୍ଫୋରଣରୁ ନିଆଁ ଲାଗିଥିବା ଆଶଙ୍କା କରାଯାଉଛି। ତେବେ ଅଗ୍ନିକାଣ୍ଡର ପ୍ରକୃତ କାରଣ ସ୍ପଷ୍ଟ ହୋଇନଥିବା ବେଳେ ପୁଲିସ ଘଟଣାର ତଦନ୍ତ ଆରମ୍ଭ କରିବା ସହ ହୋଟେଲ ମାଲିକ ଓ କର୍ମଚାରୀଙ୍କୁ ପଚରାଉଚରା କରୁଛି। ହୋଟେଲର ଅଗ୍ନିନିରାପତ୍ତା ବ୍ୟବସ୍ଥା ଓ ଜରୁରୀକାଳୀନ ନିର୍ଗମନ ବ୍ୟବସ୍ଥା ନେଇ ମଧ୍ୟ ପ୍ରଶ୍ନ ଉଠିଛି।

୨୪ ଘଣ୍ଟା ଭିତରେ ଏହା ଥିଲା ଦ୍ୱିତୀୟ ବଡ଼ ଅଗ୍ନିକାଣ୍ଡ। ଏହି ଘଟଣାର ଦୁଇ ଦିନ ପୂର୍ବରୁ, ଅଗଷ୍ଟ ୧୭ ତାରିଖ ସକାଳେ ପଶ୍ଚିମବଙ୍ଗର ବୀରଭୂମ ଜିଲ୍ଲାର ତାରାପିଠସ୍ଥିତ ଏକ ହୋଟେଲରେ ମଧ୍ୟ ଭୟାବହ ଅଗ୍ନିକାଣ୍ଡ ଘଟିଥିଲା। ସେହି ଘଟଣାରେ ମଧ୍ୟ ୮ଜଣଙ୍କ ମୃତ୍ୟୁ ହୋଇଥିଲା। ପ୍ରାଥମିକ ତଦନ୍ତରେ ସର୍ଟ ସର୍କିଟ୍ କିମ୍ବା ବିଦ୍ୟୁତ୍ ତ୍ରୁଟିରୁ ନିଆଁ ଲାଗିଥିବା ଆଶଙ୍କା କରାଯାଉଛି। କୋଲକାତା ଓ ତାରାପିଠର ଦୁଇଟି ଘଟଣା ପରେ ହୋଟେଲଗୁଡ଼ିକର ଅଗ୍ନିନିରାପତ୍ତା ବ୍ୟବସ୍ଥା ଓ ପ୍ରଶାସନିକ ଯାଞ୍ଚକୁ ନେଇ ଗୁରୁତର ପ୍ରଶ୍ନ ଉଠିଛି।