ଘୂର୍ଣ୍ଣିଝଡ଼ର ଭୟଙ୍କର ତାଣ୍ଡବ ! ଆଖି ପିଛୁଳାକେ ଭାଙ୍ଗିଗଲା ଘର, ଉଡ଼ିଗଲା ଆଜବେଷ୍ଟସ୍ ଓ ଆସବାବପତ୍ର

ଜଗତସିଂହପୁର: ହଠାତ୍ ମାଡ଼ି ଆସିଲା ପ୍ରବଳ ଘୂର୍ଣ୍ଣିଝଡ଼। ଚାହୁଁ ଚାହୁଁ ଭାଙ୍ଗିଗଲା ଘର। ଆକାଶମାର୍ଗରେ ଉଡ଼ିଗଲା ଘରର ଆଜବେଷ୍ଟସ୍ ଓ ଆସବାବପତ୍ର। ଏଭଳି ଏକ ଭୟଙ୍କର ଝଡ଼ରେ ଛାରଖାର ହୋଇଯାଇଛି ଏକ ପରିବାରର ସଂସାର। ଜଗତସିଂହପୁର ଜିଲ୍ଲା ଏରସମା ବ୍ଲକ୍ ଅନ୍ତର୍ଗତ ଆମ୍ବିକି ପଞ୍ଚାୟତର କିଆଦାର ସାଆଙ୍ଗା ଗ୍ରାମରେ ଘଟିଛି ଏଭଳି ଅଭାବନୀୟ ଘଟଣା। ହଠାତ୍ ଆସିଥିବା ପ୍ରବଳ ଝଡ଼ରେ ବଳରାମ ଦାସଙ୍କ ଘର ସମ୍ପୂର୍ଣ୍ଣ ଭାବେ କ୍ଷତିଗ୍ରସ୍ତ ହୋଇଛି। ଝଡ଼ର ପ୍ରକୋପ ଏତେ ଅଧିକ ଥିଲା ଯେ ଘରର ଛାତ, ଦ୍ୱାର ଓ ବିଭିନ୍ନ ଆସବାବପତ୍ର ଉଡ଼ି ଏଣେତେଣେ ପଡ଼ିଥିବା ଦେଖିବାକୁ ମିଳିଛି। ମାତ୍ର କେଇ ମିନିଟ୍‌ର ଝଡ଼ରେ ବଳରାମଙ୍କ ପରିବାରର ସବୁକିଛି ଓଲଟପାଲଟ ହୋଇଯାଇଛି। ଘଟଣା ପରେ ଗାଁରେ ଭୟ ଓ ଆତଙ୍କର ବାତାବରଣ ସୃଷ୍ଟି ହୋଇଛି। ଏଭଳି ଅଚାନକ ବିପର୍ଯ୍ୟୟରେ ବଳରାମ ଦାସଙ୍କ ପରିବାର ଏବେ ଅସହାୟ ହୋଇପଡ଼ିଛନ୍ତି। ଅନ୍ୟପଟେ ପ୍ରଶାସନ ତୁରନ୍ତ ଘଟଣାସ୍ଥଳ ପରିଦର୍ଶନ କରି କ୍ଷୟକ୍ଷତିର ଆକଳନ କରିବା ସହ ପ୍ରଭାବିତ ପରିବାରକୁ ଜରୁରୀକାଳୀନ ସହାୟତା ଓ କ୍ଷତିପୂରଣ ଯୋଗାଇଦେବାକୁ ସ୍ଥାନୀୟ ମହଲରେ ଦାବି ହେଉଛି।