ଜବଲପୁରରେ ଚାଞ୍ଚଲ୍ୟ: ବ୍ୟବସାୟିକ ସହଭାଗୀ ମହିଳାଙ୍କୁ ଗୁଳି କରି ହତ୍ୟା ପରେ ଯୁବକଙ୍କ ଆତ୍ମହତ୍ୟା

ମଧ୍ୟପ୍ରଦେଶ: ଜବଲପୁରରେ ମର୍ଡର ଏବଂ ସୁଇସାଇଡ୍‌ର ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ଗୋରଖପୁର ଥାନା ଅଞ୍ଚଳର ରାଜୁ ଡୁପ୍ଲେକ୍ସ ନିକଟରେ ଜଣେ ଯୁବକ ତାଙ୍କ ବ୍ୟବସାୟିକ ସହଭାଗୀ ମହିଳାଙ୍କୁ ଗୁଳି କରି ହତ୍ୟା କରିବା ପରେ ନିଜକୁ ମଧ୍ୟ ଗୁଳି କରି ଆତ୍ମହତ୍ୟା କରିଥିବା ଜଣାପଡ଼ିଛି। ଦୁହେଁ ଘଟଣାସ୍ଥଳରେ ମୃତ୍ୟୁବରଣ କରିଛନ୍ତି।ସୂଚନା ଅନୁଯାୟୀ, ଶକ୍ତି ନାମକ ମହିଳା ବିବାହିତ ହେଲେ ମଧ୍ୟ ସ୍ୱାମୀଠାରୁ ଅଲଗା ରହୁଥିଲେ ଏବଂ ବହୁ ବର୍ଷ ଧରି ବ୍ୟୁଟିଶିଆନ୍ ଭାବେ କାମ କରୁଥିଲେ। ସେ ଏକ ବ୍ୟୁଟି ପାର୍ଲର ଖୋଲିବା ପାଇଁ ଘର ଭାଡାକୁ ନେଇଥିଲେ, ସେଠାରେ ଇଣ୍ଟିରିଅର କାମ ସମୟରେ ଦୀପେଶ ରାଠୋର ସହ ତାଙ୍କର ପରିଚୟ ହୋଇଥିଲା। ପରେ ଦୀପେଶ ସେହି ବ୍ୟବସାୟରେ ସହଭାଗୀ ହୋଇଥିଲେ। କିନ୍ତୁ ପରେ ପାର୍ଲର ସ୍ଥାନକୁ ନେଇ ବିବାଦ ହେବାରୁ ସମ୍ପର୍କରେ ତିବ୍ରତା ବଢ଼ିଥିଲା। ସୋମବାର ଶକ୍ତି ଘର ଖାଲି କରିବାକୁ ଆସିଥିବା ବେଳେ ଦୀପେଶ ମଧ୍ୟ ସେଠାରେ ପହଞ୍ଚିଥିଲେ। ଦୁହେଁଙ୍କ ମଧ୍ୟରେ ତୀବ୍ର ବିବାଦ ହୋଇଥିଲା ଏବଂ କିଛି ସମୟ ପରେ ଘର ଭିତରୁ ଗୁଳି ଶବ୍ଦ ଶୁଣାଯାଇଥିଲା। ପରିବାର ଅଭିଯୋଗ ଅନୁଯାୟୀ, ଦୀପେଶ ପୂର୍ବରୁ ଅପରାଧୀ ପ୍ରବୃତ୍ତିର ଥିଲେ ଏବଂ ତାଙ୍କ ବିରୋଧରେ ରେପ୍ ମାମଲା ମଧ୍ୟ ଥିଲା। ସେ ଶକ୍ତିଙ୍କୁ ଧମକ ଦେଉଥିଲେ ଏବଂ ଅସ୍ତ୍ର ସହିତ ଘୁରୁଥିବା କଥା ମଧ୍ୟ ପରିବାରକୁ ଜଣାଇଥିଲେ। ପୋଲିସ ଘଟଣାସ୍ଥଳରୁ ଅସ୍ତ୍ର, ମୋବାଇଲ୍ ଫୋନ୍ ଓ ଅନ୍ୟାନ୍ୟ ସାମଗ୍ରୀ ଜବତ କରିଛି। ଘଟଣାର ସମସ୍ତ ଦିଗରୁ ତଦନ୍ତ ଚାଲିଛି ଏବଂ ଅସଲ କାରଣ ତଦନ୍ତ ପରେ ସ୍ପଷ୍ଟ ହେବ ବୋଲି ପୋଲିସ କହିଛି।