ବାୟୁସେନା ଅଧିକାରୀଙ୍କ ପତ୍ନୀଙ୍କ ଅଭିଯୋଗ: ଦୁଷ୍କର୍ମ, ବ୍ଲାକମେଲ ଓ ଜବରଦସ୍ତ ଧର୍ମାନ୍ତର; ୨ ଗିରଫ, ମୌଲାନା ଫେରାର

ମହାରାଷ୍ଟ୍ରର: ନାଗପୁରରେ ଜଣେ ଭାରତୀୟ ବାୟୁସେନା ଅଧିକାରୀଙ୍କ ପତ୍ନୀଙ୍କ ଅଭିଯୋଗକୁ ନେଇ ଏକ ଚାଞ୍ଚଲ୍ୟକର ମାମଲା ସାମ୍ନାକୁ ଆସିଛି। ୨୪ ବର୍ଷୀୟା ମହିଳା ତାଙ୍କ ପୂର୍ବତନ ସହପାଠୀ ଆୟାଜ୍ ତାଜ୍ ମଦାରେ ଓ ତାଙ୍କ ସହଯୋଗୀମାନଙ୍କ ବିରୋଧରେ ନିଶାଦ୍ରବ୍ୟ ଦେଇ ଦୁଷ୍କର୍ମ, ବ୍ଲାକମେଲ, ଅର୍ଥ ଆଦାୟ ଏବଂ ଜବରଦସ୍ତ ଧର୍ମାନ୍ତର କରିବା ଭଳି ଗୁରୁତର ଅଭିଯୋଗ ଆଣିଛନ୍ତି। ଏହି ମାମଲାରେ ପୋଲିସ ମୁଖ୍ୟ ଅଭିଯୁକ୍ତ ଆୟାଜ ଓ ତାଙ୍କ ସହଯୋଗୀ ଆମିନ୍ ଶେଖ୍ ଙ୍କୁ ଗିରଫ କରିଥିବାବେଳେ ଅନ୍ୟ ଜଣେ ଅଭିଯୁକ୍ତ ମୌଲାନାଙ୍କ ସନ୍ଧାନ ଜାରି ରଖିଛି। ଅଭିଯୋଗ ଅନୁସାରେ, ଫେବୃଆରୀ ୨୦୨୫ରେ ଜମି କିଣିବା ବାହାନାରେ ଆୟାଜ ମହିଳାଙ୍କୁ ଏକ ହୋଟେଲକୁ ଡାକିଥିଲେ। ସେଠାରେ ତାଙ୍କ ପାନୀୟରେ ନିଶାଦ୍ରବ୍ୟ ମିଶାଇ ଅଚେତ ଅବସ୍ଥାରେ ଦୁଷ୍କର୍ମ କରିବା ସହ ଆପତ୍ତିଜନକ ଭିଡିଓ ଓ ଫଟୋ ଉତ୍ତୋଳନ କରିଥିବା ଅଭିଯୋଗ ହୋଇଛି। ପରେ ସେହି ଭିଡିଓ ଓ ଫଟୋକୁ ଭାଇରାଲ କରିବା ଧମକ ଦେଇ ବ୍ଲାକମେଲ କରାଯାଇଥିଲା ଏବଂ ପ୍ରାୟ ୩ରୁ ୪ ଲକ୍ଷ ଟଙ୍କା ଆଦାୟ କରାଯାଇଥିବା ମହିଳା ଅଭିଯୋଗ କରିଛନ୍ତି। ମାମଲାରେ ଏକ ଭାଇରାଲ ଭିଡିଓ ତଦନ୍ତର ମୁଖ୍ୟ ପ୍ରମାଣ ଭାବେ ଉଭା ହୋଇଛି। ଭିଡିଓରେ ମହିଳା ଜଣକ କାନ୍ଦି କାନ୍ଦି “ଛାଡ଼ିଦିଅ ମୋତେ” ବୋଲି କହୁଥିବା ବେଳେ ଅଭିଯୁକ୍ତ ତାଙ୍କ ହାତ ଧରି କିଛି ଧାର୍ମିକ ମନ୍ତ୍ରୋଚ୍ଚାରଣ କରୁଥିବା ଓ ତାଙ୍କ ଉପରେ ଫୁଙ୍କୁଥିବା ଦେଖାଯାଇଛି। ମହିଳାଙ୍କ ଦାବି ଅନୁଯାୟୀ, ଏହା ପରେ ତାଙ୍କ ଧର୍ମାନ୍ତର ହୋଇଯାଇଛି ବୋଲି ଘୋଷଣା କରାଯାଇଥିଲା ଏବଂ ପୁଣି ଥରେ ଯୌନ ନିର୍ଯାତନା ଦେବାକୁ ଚେଷ୍ଟା କରାଯାଇଥିଲା। ମହିଳା ଆହୁରି ଅଭିଯୋଗ କରିଛନ୍ତି ଯେ, ପରବର୍ତ୍ତୀ ସମୟରେ ତାଙ୍କୁ ଇସଲାମ ଧର୍ମ ଗ୍ରହଣ କରିବା ପାଇଁ ଚାପ ଦିଆଯାଇଥିଲା। ମେ ମାସରେ ତାଙ୍କୁ କାଲମେଶ୍ୱର ଅଞ୍ଚଳକୁ ନେଇ ଯାଇ ସେଠାରେ ଜଣେ ମୌଲାନାଙ୍କ ଉପସ୍ଥିତିରେ ଧାର୍ମିକ ରୀତିନୀତି କରାଯାଇଥିଲା। ମହିଳାଙ୍କ ଦାବି ଅନୁସାରେ, ତାଙ୍କୁ “କବୁଲ ହୈ” କହିବାକୁ ବାଧ୍ୟ କରାଯାଇଥିଲା ଏବଂ ପରେ ତାଙ୍କ ଧର୍ମାନ୍ତର ସମ୍ପନ୍ନ ହୋଇଥିବା ସହ ଆୟାଜଙ୍କ ସହ ନିକାହ ହୋଇଥିବା ଘୋଷଣା କରାଯାଇଥିଲା। ଘଟଣା ପରେ ମହିଳା ଭୟ ଓ ସାମାଜିକ ଚାପ କାରଣରୁ ଚୁପ୍ ରହିଥିଲେ। ନିକଟରେ ତାଙ୍କ ସ୍ୱାମୀ ଘରକୁ ଫେରିବା ପରେ ସେ ସମଗ୍ର ଘଟଣା ବିଷୟରେ ଜଣାଇଥିଲେ। ଏହାପରେ ଜୁନ୍ ୧୩ରେ ଥାନାରେ ଅଭିଯୋଗ ଦାଖଲ ହୋଇଥିଲା। ପୋଲିସ ଦୁଷ୍କର୍ମ, ବ୍ଲାକମେଲ, ଅର୍ଥ ଆଦାୟ, ଧର୍ମାନ୍ତର ପାଇଁ ଚାପ ସୃଷ୍ଟି ଏବଂ ମହାରାଷ୍ଟ୍ରର ଅନ୍ଧବିଶ୍ୱାସ ନିବାରଣ ଆଇନ ଅନୁସାରେ ମାମଲା ରୁଜୁ କରିଛି। ଜବତ ହୋଇଥିବା ଇଲେକ୍ଟ୍ରୋନିକ ଉପକରଣଗୁଡ଼ିକର ଫରେନସିକ ଯାଞ୍ଚ ଚାଲିଛି। ପୋଲିସ କହିଛି ଯେ ମାମଲାର ସମସ୍ତ ପ୍ରମାଣକୁ ଯାଞ୍ଚ କରାଯାଉଛି ଏବଂ ଫେରାର ଅଭିଯୁକ୍ତଙ୍କୁ ଧରିବା ପାଇଁ ତଦନ୍ତ ଜୋରଦାର କରାଯାଇଛି। ଏହି ସମସ୍ତ ଅଭିଯୋଗ ବର୍ତ୍ତମାନ ତଦନ୍ତାଧୀନ ଅଛି। ଆଦାଲତରେ ପ୍ରମାଣିତ ନହେବା ପର୍ଯ୍ୟନ୍ତ କୌଣସି ଅଭିଯୁକ୍ତଙ୍କୁ ଦୋଷୀ ବୋଲି ଧରାଯାଇପାରିବ ନାହିଁ।