ଅଯୋଧ୍ୟା ପରେ ବଦ୍ରୀନାଥ ଧାମରେ ଦାନ ଅର୍ଥ ହେରଫେର ଅଭିଯୋଗ

ଅଯୋଧ୍ୟା ରାମ ମନ୍ଦିରର ଦାନ ଅର୍ଥ ଆତ୍ମସାତ୍ ଅଭିଯୋଗ ପରେ, ବର୍ତ୍ତମାନ ବଦ୍ରୀନାଥ ଧାମରେ ମଧ୍ୟ ଦାନ ରାଶିରେ ଅନିୟମିତତା ଓ ହେରଫେର ଅଭିଯୋଗ ସାମ୍ନାକୁ ଆସିଛି। ଏହି ଅଭିଯୋଗକୁ ଗୁରୁତ୍ୱର ସହ ନେଇ ବଦ୍ରୀନାଥ-କେଦାରନାଥ ମନ୍ଦିର ସମିତି ଅଧ୍ୟକ୍ଷ ହେମନ୍ତ ଦ୍ୱିବେଦୀ ମନ୍ଦିରକୁ ହେଉଥିବା ଦାନ, ଅର୍ପଣ ଏବଂ ରାଜସ୍ବ ସମ୍ବନ୍ଧୀ ସମସ୍ତ ପ୍ରବନ୍ଧନ ପାଇଁ କଡ଼ା ନିର୍ଦ୍ଦେଶ ଜାରି କରିଛନ୍ତି । ସମ୍ପୃକ୍ତ କର୍ମଚାରୀମାନଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଛି।  ଏହି ନିର୍ଦ୍ଦେଶରେ ଦାନ, ଅର୍ପଣ ହେଉଥିବା ଜିନିଷର ସଂଗ୍ରହ, ସୁରକ୍ଷା ଏବଂ ପୂର୍ଣ୍ଣ ପାରିଦର୍ଶିତାକୁ ବାଧ୍ୟତାମୂଳକ କରାଯାଇଛି । ଯେପରିକି ଭବିଷ୍ୟରେ କିଛି ଅନିୟମିତତା ନ ହେବାକୁ ଏଭଳି ନିଷ୍ପତ୍ତି ନିଆଯାଇଛି ।

ଜୁଲାଇ ୨ ତାରିଖରେ ଜାରି ହୋଇଥିବା ନୋଟିସରେ ସମିତିର ଅଧ୍ୟକ୍ଷ କହିଛନ୍ତି ଯେ, ସୋସିଆଲ୍ ମିଡିଆରେ ହୋଇଥିବା ଅଭିଯୋଗକୁ ବଦ୍ରୀନାଥ-କେଦାରନାଥ ମନ୍ଦିର ସମିତି ଗୁରୁତ୍ୱର ସହ ନେଇଛି। ଏହି ଘଟଣାର ନିଷ୍ପକ୍ଷ, ସ୍ୱଚ୍ଛ ଓ ତଥ୍ୟାଧାରିତ ତଦନ୍ତ ପାଇଁ ତୁରନ୍ତ ଏକ ତଥ୍ୟ ଅନୁସନ୍ଧାନ କମିଟି ଗଠନ କରାଯାଇଛି। ତେବେ ନିର୍ଦ୍ଦେଶରେ କୁହାଯାଇଛି କି, ନଗଦ ଦାନ, ଦାନ କରାଯାଇଥିବା ସାମଗ୍ରୀ କିମ୍ବା ଅର୍ପଣ ହେଉଥିବା ଜିନିଷରେ କୌଣସି ପ୍ରକାରରେ ଅନିୟମିତତାକୁ ଗ୍ରହଣ କରାଯିବ ନାହିଁ । ବର୍ତ୍ତମାନ ଶ୍ରୀ ରାମ ମନ୍ଦିର ଅଯୋଧ୍ୟାରେ ଦାନ ଅର୍ଥ ଆତ୍ମସାତ୍ ଅଭିଯୋଗ ଘଟଣା ପ୍ରଚାର ପରେ, ଶ୍ରୀ ବଦ୍ରିନାଥ-କେଦାରନାଥ ମନ୍ଦିର ସମିତି ଅଧିନସ୍ଥ ମନ୍ଦିରରେ ଦାନ, ଅର୍ପଣ ଇତ୍ୟାଦି ଜିନିଷରେ ସତର୍କତା ଆବଶ୍ୟକତା ରହିଛି । ଏହାଦ୍ବାରା ଭବିଷ୍ୟରେ କୌଣସି ପ୍ରକାରର ଅନିୟମିତତା ଅଭିଯୋଗ ନ ଆସୁ । ସୂଚନା ଅବନୁସାରେ, ଅଯୋଧ୍ୟା ରାମ ମନ୍ଦିର ମାମଲାରେ ସିସିଟିଭି ଯାଞ୍ଚ ପରେ ଟଙ୍କା ଚୋରି ଅଭିଯୋଗରେ ୮ ଜଣ କର୍ମଚାରୀ ଗିରଫ ହୋଇଥିଲେ।