ଆଇନ ଶୃଙ୍ଖଳା ବିପର୍ଯୟ ନେଇ ଡିଜି କାର୍ଯ୍ୟାଳୟ ଘେରିଲା ସିପିଆଇଏମ୍ ଦଳ

କଟକ: ଆଇନ ଶୃଙ୍ଖଳା ଅବନତି ନେଇ ଡିଜି କାର୍ଯ୍ୟାଳୟ ଘେରିଲା ସିପିଆଇଏମ୍ ଦଳ । ରାଜ୍ୟରେ ଦିନକୁ ଦିନ ବିଗିଡ଼ିବାରେ ଲାଗିଛି ଆଇନ ଶୃଙ୍ଖଳା ପରିସ୍ଥିତି । ଓଡିଶା ଭଳି ଶାନ୍ତିପ୍ରିୟ ରାଜ୍ୟରେ ଅପରାଧ ରୋକିବାରେ ସରକାରଙ୍କ ବିଫଳତାକୁ ଦାୟୀ କରି ସିପିଆଇଏମ ପକ୍ଷରୁ ପୋଲିସ ଡିଜିଙ୍କ କାର୍ଯ୍ୟାଳୟ ସମ୍ମୁଖରେ ପ୍ରତିବାଦ ।ପ୍ରତିବାଦ ପରେ ସିପିଆଇଏମ୍ ପ୍ରତିନିଧି ଦଳ ରାଜ୍ୟ ଆଇନଶୃଙ୍ଖଳା ଏଡିଜିଙ୍କୁ ଏକ ଦାବିପତ୍ର ପ୍ରଦାନ କରି ରାଜ୍ୟର ଆଇନ ଶୃଙ୍ଖଳା ବ୍ୟବସ୍ଥାକୁ ସୁଦୃଢ଼ କରିବାକୁ ଦାବି ଜଣାଇଛି। ଦଳର ଅଭିଯୋଗ ଅନୁଯାୟୀ, ଅପରାଧ ନିୟନ୍ତ୍ରଣ ଓ ସାଧାରଣ ଲୋକଙ୍କୁ ନ୍ୟାୟ ପ୍ରଦାନ କରିବାରେ ସରକାର ଏବଂ ପୋଲିସ ବ୍ୟବସ୍ଥା ବିଫଳ ହୋଇଛି। ରାଜ୍ୟର ବିଭିନ୍ନ ଥାନାରେ ସାଧାରଣ ଲୋକେ ନ୍ୟାୟ ପାଉନଥିବାରୁ ଶାସନ ବ୍ୟବସ୍ଥା ଦୁର୍ବଳ ହେଉଛି। ବିଶେଷକରି ଭିଡ଼ ହିଂସା, ଗୋ-ରକ୍ଷା ନାମରେ ଆକ୍ରମଣ, ରାୟଗଡ଼ା ଘଟଣା, ବାଲିଅନ୍ତାର ସୌମ୍ୟ ହତ୍ୟା ମାମଲା, ଗଞ୍ଜାମରେ ଥର୍ଡ ଡିଗ୍ରୀ ଅଭିଯୋଗ, ବାଲେଶ୍ୱର ଛାତ୍ରୀ ଆତ୍ମହତ୍ୟା ଏବଂ କେନ୍ଦ୍ରାପଡ଼ାର ମହିଳା ସରପଞ୍ଚ ଚମେଲୀ ଓଝାଙ୍କ ଘଟଣା ଭଳି ଅନେକ ମାମଲାରେ ପୋଲିସର ଭୂମିକାକୁ ନେଇ ପ୍ରଶ୍ନ ଉଠିଛି। ସିପିଆଇଏମ୍ ରାଜ୍ୟ ସମ୍ପାଦକ ସୁରେଶ ପାଣିଗ୍ରାହୀ କହିଛନ୍ତି ଯେ ଅପରାଧ ନିୟନ୍ତ୍ରଣ ସହ ଥାନା ସ୍ତରରେ ବ୍ୟାପକ ସଂସ୍କାର ଆଣି ସାଧାରଣ ଲୋକଙ୍କୁ ନ୍ୟାୟ ଦେବା ଆବଶ୍ୟକ। ଯଦି ପୋଲିସ ପ୍ରଶାସନ ଏହା ଉପରେ ତ୍ୱରିତ ପଦକ୍ଷେପ ନ ନେଉଛି, ତେବେ ଆଗାମୀ ଦିନରେ ରାଜ୍ୟବ୍ୟାପୀ ଜୋରଦାର ଆନ୍ଦୋଳନ କରାଯିବ ବୋଲି ସେ ଚେତାବନୀ ଦେଇଛନ୍ତି।