କରୋନା ଆତଙ୍କ: ୨ ମୃତ, ୪ ନୂଆ ସଂକ୍ରମିତ; ସତର୍କ ହେଲା ଆନ୍ଧ୍ରପ୍ରଦେଶ ସ୍ୱାସ୍ଥ୍ୟ ବିଭାଗ

ଆନ୍ଧ୍ରପ୍ରଦେଶ: ଦେଶକୁ ପୁଣି କରୋନା ଭୟ ଘାରିଛି। ଆନ୍ଧ୍ରପ୍ରଦେଶର କଡ଼ପା ଜିଲ୍ଲାରେ କୋଭିଡ୍-୧୯ ସଂକ୍ରମଣରେ ଦୁଇ ଜଣଙ୍କ ମୃତ୍ୟୁ ଘଟିଥିବାବେଳେ ଆଉ ୪ ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି। ପ୍ରାୟ ଚାରି ବର୍ଷ ପରେ ରାଜ୍ୟରେ କୋଭିଡ୍ ଜନିତ ମୃତ୍ୟୁ ଘଟଣା ସାମ୍ନାକୁ ଆସିବା ପରେ ସ୍ୱାସ୍ଥ୍ୟ ବିଭାଗ ସତର୍କ ହୋଇଛି। ସମସ୍ତ ସରକାରୀ ହସ୍ପିଟାଲରେ ଆଇସୋଲେସନ ବେଡ୍, ଆଇସିୟୁ, ଅକ୍ସିଜେନ୍, ଭେଣ୍ଟିଲେଟର ଓ ଅନ୍ୟାନ୍ୟ ଆବଶ୍ୟକ ସୁବିଧାର ସମୀକ୍ଷା କରିବାକୁ ନିର୍ଦ୍ଦେଶ ଦିଆଯାଇଛି। ପ୍ରଥମ ମୃତ୍ୟୁ ଘଟଣାରେ, ୬୦ ବର୍ଷୀୟ ଜଣେ ରୋଗୀଙ୍କୁ ପ୍ରଥମେ ତିରୁପତିର ଏସ୍‌ଭିଆଇଏମ୍‌ଏସ୍ (SVIMS) ହସ୍ପିଟାଲରେ ଭର୍ତ୍ତି କରାଯାଇଥିଲା। ପରେ ଅବସ୍ଥା ଗୁରୁତର ହେବାରୁ ତାଙ୍କୁ ଭେଲ୍ଲୋରସ୍ଥିତ ସିଏମ୍‌ସି (CMC) ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ଜୁନ୍ ୨୮ରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ପରେ କରାଯାଇଥିବା RT-PCR ପରୀକ୍ଷାରେ ସେ କୋଭିଡ୍ ପଜିଟିଭ୍ ଥିବା ଜଣାପଡ଼ିଥିଲା। ମୃତକଙ୍କର ମଧୁମେହ, କିଡନୀ ରୋଗ ସମେତ ଅନ୍ୟାନ୍ୟ ଗୁରୁତର ସ୍ୱାସ୍ଥ୍ୟ ସମସ୍ୟା ମଧ୍ୟ ରହିଥିଲା। ଦ୍ୱିତୀୟ ଘଟଣାରେ, କଡ଼ପାର ମସାପେଟା ଅଞ୍ଚଳର ୪୬ ବର୍ଷୀୟ ଜଣେ ବ୍ୟକ୍ତି ଜୁଲାଇ ୪ରେ କୋଭିଡ୍ ଲକ୍ଷଣ ସହ କଡ଼ପା ସରକାରୀ ସାଧାରଣ ହସ୍ପିଟାଲ-ରିମ୍ସ (GGH-RIMS)ରେ ଭର୍ତ୍ତି ହୋଇଥିଲେ। ୪ ଦିନ ଧରି ଚିକିତ୍ସା ପରେ ତାଙ୍କର ମୃତ୍ୟୁ ଘଟିଥିଲା। ଡାକ୍ତରଙ୍କ ଅନୁସାରେ, ତାଙ୍କ ଉଭୟ ଫୁସଫୁସରେ ଗୁରୁତର ସଂକ୍ରମଣ ଥିଲା। ଅତ୍ୟଧିକ ମଦ୍ୟପାନ ଅଭ୍ୟାସ ତାଙ୍କ ଶ୍ୱାସକ୍ରିୟା ସମସ୍ୟାକୁ ଆହୁରି ଜଟିଳ କରିଥିଲା। ଏହି ଦୁଇ ମୃତକଙ୍କ ନମୁନାକୁ ପୁଣେସ୍ଥିତ ନ୍ୟାସନାଲ୍ ଇନଷ୍ଟିଚ୍ୟୁଟ୍ ଅଫ୍ ଭାଇରୋଲୋଜି (NIV)କୁ ଜିନୋମ୍ ସିକ୍ୱେନ୍ସିଂ ପାଇଁ ପଠାଯାଇଛି। କେଉଁ ଭାରିଆଣ୍ଟ ଯୋଗୁଁ ସଂକ୍ରମଣ ଘଟିଛି, ତାହା ରିପୋର୍ଟ ଆସିବା ପରେ ସ୍ପଷ୍ଟ ହେବ। ପ୍ରାରମ୍ଭିକ ଭାବେ ଓମିକ୍ରନ୍‌ର କୌଣସି ସବ୍-ଭାରିଆଣ୍ଟ ନେଇ ଡାକ୍ତରମାନେ ସନ୍ଦେହ କରୁଛନ୍ତି।

ଏହାଛଡ଼ା କଡ଼ପା ଓ ତିରୁପତି ଜିଲ୍ଲାରେ ଆଉ ୪ ଜଣ କୋଭିଡ୍ ସଂକ୍ରମିତ ଚିହ୍ନଟ ହୋଇଛନ୍ତି। ସମସ୍ତଙ୍କ RT-PCR ପରୀକ୍ଷାରେ ସଂକ୍ରମଣ ନିଶ୍ଚିତ ହୋଇଛି। ସେମାନଙ୍କ ମଧ୍ୟରୁ ୩ ଜଣ ଘରେ ଆଇସୋଲେସନରେ ଥିବାବେଳେ ଜଣେ ସାମାନ୍ୟ ଲକ୍ଷଣ ଥିବାରୁ ହସ୍ପିଟାଲର କୋଭିଡ୍ ୱାର୍ଡରେ ଚିକିତ୍ସାଧୀନ ଅଛନ୍ତି। ସମସ୍ତ ସଂକ୍ରମିତ କୋଭିଡ୍ ଟିକାର ଦୁଇଟି ଡୋଜ୍ ନେଇଥିବାବେଳେ ଜଣେ ବୁଷ୍ଟର ଡୋଜ୍ ମଧ୍ୟ ନେଇଛନ୍ତି। ଘଟଣା ପରେ ସ୍ଥିତିକୁ ଦେଖି ଆନ୍ଧ୍ରପ୍ରଦେଶ ସ୍ୱାସ୍ଥ୍ୟ ବିଭାଗ ସମସ୍ତ ସରକାରୀ ହସ୍ପିଟାଲକୁ ପ୍ରସ୍ତୁତି ଯାଞ୍ଚ କରିବାକୁ କହିଛି। ହସ୍ପିଟାଲକୁ ଆଇସୋଲେସନ ବେଡ୍, ଆଇସିୟୁ, ଅକ୍ସିଜେନ୍, ଭେଣ୍ଟିଲେଟର, ଆବଶ୍ୟକ ଔଷଧ,ଟେଷ୍ଟିଂ କିଟ୍ ଏବଂ ଆମ୍ବୁଲାନ୍ସ ସେବାର ପ୍ରସ୍ତୁତି ସମୀକ୍ଷା କରିବାକୁ କହିଛି। ସେହିପରି ସଂକ୍ରମିତଙ୍କ ସମ୍ପର୍କରେ ଆସିଥିବା ଲୋକଙ୍କ ଚିହ୍ନଟ, କଣ୍ଟାକ୍ଟ ଟ୍ରେସିଂ ଓ ପ୍ରଭାବିତ ଅଞ୍ଚଳରେ ସାନିଟାଇଜେସନ୍ କାର୍ଯ୍ୟ ଜୋରଦାର କରାଯାଇଛି। ସ୍ୱାସ୍ଥ୍ୟ ବିଭାଗ ଲୋକଙ୍କୁ ଆତଙ୍କିତ ନହୋଇ ସତର୍କ ରହିବାକୁ ପରାମର୍ଶ ଦେଇଛି। ଜ୍ୱର, କାଶ, ଥଣ୍ଡା କିମ୍ବା ଶ୍ୱାସକ୍ରିୟା ଜନିତ ସମସ୍ୟା ଦେଖାଦେଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବାକୁ ଅନୁରୋଧ କରାଯାଇଛି। ଭାରତରେ ସରକାରୀ ତଥ୍ୟ ଅନୁସାରେ, ୨୦୨୨ ଶେଷ ସୁଦ୍ଧା ପ୍ରାୟ ୫.୩ଲକ୍ଷ କରୋନା ମୃତ୍ୟୁ ରେକର୍ଡ ହୋଇଥିଲା । ତେବେ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ (WHO)ର ଆକଳନ ଅନୁସାରେ ଅତିରିକ୍ତ ମୃତ୍ୟୁ ଆଧାରରେ ଏହି ସଂଖ୍ୟା ପ୍ରାୟ ୪୭ ଲକ୍ଷ ହୋଇପାରେ।