CJI ON ARAVALI HILLS:ମୋ ଅବସର ପରେ ତାରିଖ ମାଗିଥାଆନ୍ତ- ଆରାବଳି କମିଟିକୁ ସିଜେଆଇଙ୍କ ଭର୍ତ୍ସନା

ଆରାବଳି ହିଲ୍ସର ପରିଭାଷା ଉପରେ ହୋଇଥିବା ଉଚ୍ଚସ୍ତରୀୟ କମିଟିକୁ ସିଜେଆଇ ଜଷ୍ଟିସ ସୂର୍ଯ୍ୟକାନ୍ତ ତୀବ୍ର ଭର୍ତ୍ସନା କରିଛନ୍ତି। କମିଟି ୬ ମାସର ଏକ୍ସଟେନସନ ମାଗିଛନ୍ତି। ଯାହାକୁ ସିଜେଆଇ ଖାରଜ କରିଦେଇଛନ୍ତି। ଆଉ ୨ ମାସ ଭିତରେ ରିପୋର୍ଟ ଦାଖଲ କରିବାକୁ ନିର୍ଦେଶ ଦେଇଛନ୍ତି। କମିଟି ରିପୋର୍ଟ ଦାଖଲ ଲାଗି ଫେବୃଆରୀ ୨୮, ୨୦୨୭ ଯାଏ ସମୟ ମାଗିଥିଲେ। ଆଉ ଏହାକୁ ଖାରଜ କରି କହିଥିଲେ, ତାଙ୍କ ଅବସର ପରେ କମିଟି ତାରିଖ ମାଗିବାର ଥିଲା। ଯଦି କମିଟି ସକ୍ଷମ ନୁହେଁ, ତେବେ କମିଟିର ପୁନର୍ଗଠନ ହେବ। ସିଜେଆଇ ଆଦେଶ ଦେଇଛନ୍ତି ଯେ, କମିଟି ଦିନରାତି କାମ କରୁ ଓ ନଭେମ୍ୱର ୩୦,୨୦୨୬  ଭିତରେ ରିପୋର୍ଟ ଦାଖଲ କରୁ। ଏହା ସହିତ ରାଜସ୍ଥାନ ଓ ଗୁଜରାଟର ପ୍ରଭାବିତ ଲୋକ ଏବଂ ଆଦିବାସୀ ସମ୍ପ୍ରଦାୟ ସମେତ ସମସ୍ତ ହିତଧାରୀଙ୍କ ମତାମତ ନେବାକୁ କମିଟିକୁ କୁହାଯାଇଛି। ଏହାର ପରବର୍ତ୍ତୀ ଶୁଣାଣୀ ଡିସେମ୍ୱର ୨ରେ ହେବ।  ଆରାବଳି ପାନେଲର ରିପୋର୍ଟ ଅଗଷ୍ଟ ୩୧ରେ ଦାଖଲ ହେବାର ଥିଲା। ଆଜି ପାନେଲର ଅବଧି ବୃଦ୍ଧି ଲାଗି ଦାବି ଉପରେ ଶୁଣାଣୀ କରିଥିଲେ ସିଜେଆଇ ଜଷ୍ଟିସ ସୂର୍ଯ୍ୟକାନ୍ତ, ଜଷ୍ଟିସ ଜୟମାଲା ବାଗଚି ଓ ଜଷ୍ଟିସ ବି.ମୋହନଙ୍କ ଖଣ୍ଡପୀଠ। ଏହି ଏକ୍ସପର୍ଟ ପାନେଲର ଗଠନ କୋର୍ଟ ଆଦେଶରେ ଚଳିତ ବର୍ଷ କରାଯାଇଥିଲା। ସିଜେଆଇ ସୂର୍ଯ୍ୟକାନ୍ତ ଫେବୃଆରୀ ୯, ୨୦୨୭ରେ ଅବସର ନେବେ। ସେ ନଭେମ୍ୱର ୨୪,୨୦୨୫ରେ କାର୍ଯ୍ୟଭାର ସମ୍ଭାଳିଥିଲେ। ସିଜେଆଇ ସୂର୍ଯ୍ୟକାନ୍ତଙ୍କ ଅବସର ପରେ ଜଷ୍ଟିସ ବିକ୍ରମନାଥ ନୂଆ ସିଜେଆଇ ହେବାର ସମ୍ଭାବନା ରହିଛି। ଅରାବଳୀ ପର୍ବତମାଳା ଦିଲ୍ଲୀ, ହରିୟାଣା, ରାଜସ୍ଥାନ ଓ ଗୁଜରାଟ ଅଞ୍ଚଳରେ ବିସ୍ତାରିତ। ଏହି ପର୍ବତମାଳା ପରିବେଶ ସନ୍ତୁଳନ, ଜଳ ସଂରକ୍ଷଣ, ଜୈବ ବିବିଧତା ଏବଂ ମରୁଭୂମିର ବିସ୍ତାର ରୋକିବାରେ ଗୁରୁତ୍ୱପୂର୍ଣ୍ଣ। ଏହି ଅଞ୍ଚଳରେ ଖଣି କାର୍ଯ୍ୟକଳାପ ଓ ପରିବେଶ ସୁରକ୍ଷାକୁ ନେଇ ଦୀର୍ଘଦିନ ଧରି ବିବାଦ ଚାଲିଆସୁଛି। ପୁରୁଣା ୧୦୦ ମିଟର ମାନଦଣ୍ଡକୁ ନେଇ ବିବାଦ ରହିଛି। ଆରାବଳି ପାହାଡ଼ର ପରିଭାଷା ପାଇଁ ପୂର୍ବରୁ ସ୍ଥାନୀୟ ଭୂମିସ୍ତରଠାରୁ ୧୦୦ ମିଟର କିମ୍ୱା ତା’ଠାରୁ ଅଧିକ ଉଚ୍ଚତାକୁ ଏକ ପ୍ରମୁଖ ମାନଦଣ୍ଡ ଭାବେ ଧରାଯାଇଥିଲା। କିନ୍ତୁ ନୂଆ ହାଇ-ପାୱାର୍ଡ କମିଟିର ମତ ହେଉଛି, ଅରାବଳି ଭଳି ଜଟିଳ ପରିବେଶ ବ୍ୟବସ୍ଥାକୁ କେବଳ ଉଚ୍ଚତା କିମ୍ୱା ଗୋଟିଏ ମାନଦଣ୍ଡ ଆଧାରରେ ପରିଭାଷିତ କରିହେବ ନାହିଁ। କମିଟି ଅରାବଳିକୁ ଏକ ସମ୍ପୂର୍ଣ୍ଣ ଇକୋସିଷ୍ଟମ୍ ବା ପରିବେଶ ବ୍ୟବସ୍ଥା ଭାବେ ଦେଖିବାକୁ ଚାହୁଁଛି। ଆରାବଳିକୁ କେବଳ ପାହାଡ଼ର ଉଚ୍ଚତା ଆଧାରରେ ନୁହେଁ, ବରଂ ଏକ ସମ୍ପୂର୍ଣ୍ଣ ପରିବେଶ ବ୍ୟବସ୍ଥା ଭାବେ ସୁରକ୍ଷା କରାଯିବ କି ନାହିଁ—ଏହି ପ୍ରଶ୍ନ ଏବେ ମୁଖ୍ୟ ଚର୍ଚ୍ଚାରେ ରହିଛି।