ଦିଲ୍ଲୀରେ ୫ ମହଲା କୋଠା ଭୁଶୁଡ଼ି ୬ ମୃତ !

ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ପୁଣି ଥରେ କୋଠା ନିର୍ମାଣ ଓ ସୁରକ୍ଷା ବ୍ୟବସ୍ଥାକୁ ନେଇ ବଡ଼ ପ୍ରଶ୍ନ ଉଠିଛି। ଦକ୍ଷିଣ-ପଶ୍ଚିମ ଦିଲ୍ଲୀର ସତ୍ୟ ନିକେତନ ଅଞ୍ଚଳରେ ରବିବାର ଅପରାହ୍ନ ପ୍ରାୟ ୧ଟା ୩୦ରେ ଏକ ୫ ମହଲା ପେଇଂ ଗେଷ୍ଟ ବିଲ୍ଡିଂ ହଠାତ୍ ଭୁଶୁଡ଼ି ପଡ଼ିଥିଲା। ଏହି ଦୁର୍ଘଟଣାରେ ଏପର୍ଯ୍ୟନ୍ତ ୬ ଜଣଙ୍କ ମୃତ୍ୟୁ ହୋଇଥିବା ବେଳେ ୧୧ରୁ ଅଧିକ ଲୋକଙ୍କୁ ଉଦ୍ଧାର କରାଯାଇଛି। ଏହି ବିଲ୍ଡିଂଟି ପ୍ରାୟ ୪୦ରୁ ୫୦ ବର୍ଷ ପୁରୁଣା ଥିବା ଜଣାପଡ଼ିଛି। ଏଠାରେ ଛାତ୍ରମାନଙ୍କ ପାଇଁ PG ବ୍ୟବସ୍ଥା ରହିଥିଲା। ବିଲ୍ଡିଂର ବେସମେଣ୍ଟରେ ମରାମତି ଓ ନିର୍ମାଣ କାମ ଚାଲୁଥିବା ସମୟରେ ଏହା ଭୁଶୁଡ଼ି ପଡ଼ିଥିବା ପୋଲିସ ରିପୋର୍ଟରୁ ଜଣାପଡ଼ିଛି। ଘଟଣା ପରେ ଦିଲ୍ଲୀ ଫାୟାର ସର୍ଭିସ୍, ପୋଲିସ, NDRF ଓ ଅନ୍ୟ ଉଦ୍ଧାରକାରୀ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚିଥିଲେ। ଧ୍ୱଂସାବଶେଷ ତଳେ ଫସିଥିବା ଲୋକଙ୍କୁ ଖୋଜିବା ପାଇଁ ଘଣ୍ଟା ଘଣ୍ଟା ଧରି ରେସ୍କ୍ୟୁ ଅପରେସନ୍ ଚାଲିଥିଲା। ରାତି ସାରା ଚାଲିଥିବା ଉଦ୍ଧାର କାର୍ଯ୍ୟରେ ଆଉ ଜଣଙ୍କ ମୃତଦେହ ମିଳିବା ପରେ ମୃତ୍ୟୁସଂଖ୍ୟା ୬ରେ ପହଞ୍ଚିଥିଲା। ଘଟଣାକୁ ନେଇ ବିଲ୍ଡିଂର ନିର୍ମାଣ ଅନୁମତି, ସଂରଚନାର ସୁରକ୍ଷା ଏବଂ ଚାଲୁଥିବା ମରାମତି କାମ ଉପରେ ଏବେ ପ୍ରଶ୍ନ ଉଠିଛି। ରିପୋର୍ଟ ଅନୁସାରେ, ପାଖାପାଖି ଅଞ୍ଚଳରେ ଅନ୍ୟ କିଛି ବିଲ୍ଡିଂର ସୁରକ୍ଷା ନେଇ ମଧ୍ୟ ପ୍ରଶାସନ ଯାଞ୍ଚ ଆରମ୍ଭ କରିଛି। ଏହି ଦୁର୍ଘଟଣା ପରେ ଦିଲ୍ଲୀ ସରକାର ମାଜିଷ୍ଟ୍ରେଟ୍ ତଦନ୍ତ ନିର୍ଦ୍ଦେଶ ଦେଇଛନ୍ତି। ବିଲ୍ଡିଂ ମାଲିକଙ୍କ ବିରୋଧରେ ମଧ୍ୟ ମାମଲା ରୁଜୁ ହୋଇଛି। ଏଥିସହ ଅବୈଧ ନିର୍ମାଣ ବିରୋଧରେ MCD ପକ୍ଷରୁ କଠୋର ପଦକ୍ଷେପ ନେବା ନେଇ ମଧ୍ୟ ପ୍ରକ୍ରିୟା ଆରମ୍ଭ ହୋଇଛି।

କେବଳ ଦିଲ୍ଲୀ ନୁହେଁ, ସାରା ଦେଶରେ ବିଲ୍ଡିଂ ସେଫ୍ଟି ଚିନ୍ତା

ଦିଲ୍ଲୀର ଏହି ଘଟଣା ପୁଣିଥରେ ଦେଶର ସହରାଞ୍ଚଳରେ ପୁରୁଣା ଓ ଅସୁରକ୍ଷିତ କୋଠାର ସ୍ଥିତିକୁ ନେଇ ପ୍ରଶ୍ନ ଉଠାଇଛି। ବେଆଇନ ଅତିରିକ୍ତ ମହଲା ନିର୍ମାଣ, ନିମ୍ନମାନର ନିର୍ମାଣ ସାମଗ୍ରୀ, ଅନୁମୋଦନ ବିନା ପରିବର୍ତ୍ତନ ଏବଂ ନିୟମିତ ଷ୍ଟ୍ରକ୍ଚରାଲ୍ ସେଫ୍ଟି ଅଡିଟ୍‌ର ଅଭାବ ଭଳି ପ୍ରସଙ୍ଗ ଏବେ ଚର୍ଚ୍ଚାକୁ ଆସିଛି।

ପୂର୍ବରୁ ମଧ୍ୟ ଦିଲ୍ଲୀ ସମେତ ମୁମ୍ବାଇ ଓ ଅନ୍ୟ ସହରରେ ପୁରୁଣା ଓ ଅନୁମତିବିହୀନ କୋଠା ଭୁଶୁଡ଼ି ଜୀବନହାନି ଘଟିଛି। ତେଣୁ ଏଭଳି ଦୁର୍ଘଟଣା ପରେ କେବଳ FIR କିମ୍ବା ତଦନ୍ତରେ ସୀମିତ ନରହି, ବିପଦଜନକ ବିଲ୍ଡିଂଗୁଡ଼ିକୁ ପୂର୍ବରୁ ଚିହ୍ନଟ କରି ଆଇନ ଅନୁଯାୟୀ କଠୋର ପଦକ୍ଷେପ ନେବାର ଆବଶ୍ୟକତା ରହିଛି। ସତ୍ୟ ନିକେତନ ଘଟଣା ଏବେ ଏହି ପ୍ରଶ୍ନ ଛାଡ଼ିଛି—ନିର୍ମାଣ ନିୟମ ଥିବା ସତ୍ତ୍ୱେ ତାହାର ଠିକ୍ ଭାବେ ଯାଞ୍ଚ ଓ କାର୍ଯ୍ୟକାରୀ କାହିଁକି ହେଉନାହିଁ? ଆଉ କେତେ ଜୀବନ ଯିବା ପରେ ପ୍ରଶାସନ ଜାଗିବ?