ବିବାହ ପୂର୍ବରୁ ଭାବି ସ୍ୱାମୀଙ୍କୁ ୩୫୦ ଫୁଟ୍ ଖାଇକୁ ଠେଲି ହତ୍ୟା ଅଭିଯୋଗ, ଗିରଫ ହେଲେ ଭାବି ପତ୍ନୀ ଓ ପ୍ରେମିକ

ପୁଣେ: ଭାବି ସ୍ୱାମୀଙ୍କୁ ୩୫୦ ଫୁଟ୍ ଖାଇକୁ ଠେଲି ହତ୍ୟା ଅଭିଯୋଗ । ମହାରାଷ୍ଟ୍ରର ପୁଣେରେ ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ଇନ୍ଦୋରର ସୋନମ ରଘୁବଂଶୀ ମାମଲାର ଚର୍ଚ୍ଚା ଥମିନଥିବା ବେଳେ, ସେହିଭଳି ଏକ ଘଟଣା ପୁଣେର ଲୋହାଗଡ଼ ଦୁର୍ଗରେ ଘଟିଥିବା ଅଭିଯୋଗ ହୋଇଛି। ପ୍ରଥମେ ଏହାକୁ ଟ୍ରେକିଂ ସମୟରେ ଘଟିଥିବା ଦୁର୍ଘଟଣା ବୋଲି କୁହାଯାଉଥିଲେ ମଧ୍ୟ, ପୋଲିସ ତଦନ୍ତରେ ଏହା ଏକ ଯୋଜନାବଦ୍ଧ ହତ୍ୟାକାଣ୍ଡ ବୋଲି ସନ୍ଦେହ ହୋଇଛି। ୨୬ ବର୍ଷୀୟ ରିଅଲ ଇଷ୍ଟେଟ ବ୍ୟବସାୟୀ କେତନ ଅଗ୍ରୱାଲଙ୍କ ମୃତ୍ୟୁ ଘଟଣାରେ ତାଙ୍କ ଭାବି ପତ୍ନୀ ସିୟା ଗୋୟଲ ଏବଂ ତାଙ୍କ ପ୍ରେମିକ ଚେତନ ଚୌଧୁରୀଙ୍କୁ ପୋଲିସ ଗିରଫ କରିଛି। ଅଭିଯୋଗ ଅନୁଯାୟୀ, ଉଭୟ ମିଶି କେତନଙ୍କୁ ୩୫୦ ଫୁଟ୍ ଗଭୀର ଖାଇକୁ ଠେଲି ହତ୍ୟା କରିଥିଲେ। ସୂଚନା ଅନୁସାରେ, ଗତ ଜୁନ୍ ୧୮ ତାରିଖରେ ସିୟାଙ୍କ ଜନ୍ମଦିନ ପାଳନ ଅବସରରେ କେତନ ଓ ସିୟା ଲୋହାଗଡ଼ ଦୁର୍ଗକୁ ବୁଲିବାକୁ ଯାଇଥିଲେ। ସେଠାରେ ଫଟୋ ଉଠାଇବା ବେଳେ କେତନଙ୍କ ପାଦ ଖସିଯାଇ ଖାଇକୁ ପଡ଼ିଯାଇଥିବା ସିୟା ପ୍ରଥମେ ପୋଲିସକୁ କହିଥିଲେ। ଏହାକୁ ଦୁର୍ଘଟଣା ଭାବେ ଧରି ପୋଲିସ ମାମଲା ରୁଜୁ କରିଥିଲା। ତେବେ କେତନଙ୍କ ପରିବାର ଏହି ଘଟଣାକୁ ନେଇ ସନ୍ଦେହ ପ୍ରକାଶ କରିଥିଲେ। ସେମାନଙ୍କ କହିବା ଅନୁସାରେ, କେତନ ଜଣେ ଅଭିଜ୍ଞ ଟ୍ରେକର ଥିଲେ ଏବଂ ଏପରି ଭାବରେ ଖସିପଡ଼ିବା ସମ୍ଭାବନା କମ୍ ଥିଲା। ଏହାପରେ ପୋଲିସ ମୋବାଇଲ କଲ୍ ରେକର୍ଡ, ସୋସିଆଲ ମିଡିଆ ଏବଂ ଡିଜିଟାଲ ପ୍ରମାଣ ଯାଞ୍ଚ କରିଥିଲା। ତଦନ୍ତରେ ଜଣାପଡ଼ିଥିଲା ଯେ ସିୟାଙ୍କର ଚେତନ ଚୌଧୁରୀଙ୍କ ସହ ପ୍ରେମ ସମ୍ପର୍କ ଥିଲା। ସେ କେତନଙ୍କୁ ବିବାହ କରିବାକୁ ଇଚ୍ଛୁକ ନଥିଲେ ଏବଂ ନିଜ ପ୍ରେମ ସମ୍ପର୍କରେ କେତନଙ୍କୁ ବାଧକ ବୋଲି ଭାବୁଥିଲେ। ଏହି କାରଣରୁ ଉଭୟ ମିଶି କେତନଙ୍କୁ ହତ୍ୟା କରିବା ପାଇଁ ଷଡ଼ଯନ୍ତ୍ର ରଚିଥିବା ପୋଲିସ ଅଭିଯୋଗ କରିଛି। ପୋଲିସର କହିବା ଅନୁସାରେ, ଯୋଜନା ମୁତାବକ ସିୟା କେତନଙ୍କୁ ଲୋହାଗଡ଼ ଦୁର୍ଗକୁ ନେଇଥିଲେ ଏବଂ ଚେତନ ମଧ୍ୟ ସେଠାରେ ପହଞ୍ଚିଥିଲେ। ସୁଯୋଗ ଦେଖି ଉଭୟ ମିଶି କେତନଙ୍କୁ ଗଭୀର ଖାଇକୁ ଠେଲି ଦେଇଥିବା ଅଭିଯୋଗ ହୋଇଛି। କେତନଙ୍କ ବାପା ବିଶାଳ ଅଗ୍ରୱାଲଙ୍କ ଅଭିଯୋଗ ଆଧାରରେ ପୋଲିସ ହତ୍ୟା ଓ ଅପରାଧିକ ଷଡ଼ଯନ୍ତ୍ର ମାମଲା ରୁଜୁ କରିଛି। ଘଟଣାର ସମସ୍ତ ଦିଗକୁ ନେଇ ତଦନ୍ତ ଚାଲିଥିବା ବେଳେ ଆଉ କେହି ଏହି ଷଡ଼ଯନ୍ତ୍ରରେ ସାମିଲ ଥିଲେ କି ନାହିଁ ସେନେଇ ମଧ୍ୟ ଖୋଳତାଡ଼ ଜାରି ରହିଛି। ଉଲ୍ଲେଖଯୋଗ୍ୟ ଯେ, କେତନ ଓ ସିୟାଙ୍କ ବିବାହ ଆସନ୍ତା ଚଳିତ ବର୍ଷ ନଭେମ୍ବରରେ ତାଙ୍କର ଜୟପୁରରେ ଭବ୍ୟ ବିବାହ ହେବାର ଥିଲା । ଉଭୟ ପରିବାର ପକ୍ଷରୁ ବିବାହ ପାଇଁ ପ୍ୟାଲେସ ମଧ୍ୟ ବୁକ୍ ହୋଇଥିଲା । କିନ୍ତୁ ବିବାହ ପୂର୍ବରୁ ଘଟିଥିବା ଏହି ଘଟଣା ପରିବାର ଉପରେ ଦୁଃଖର ପାହାଡ଼ ଭାଙ୍ଗି ପଡିଛି ଏବଂ ସମଗ୍ର ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି।