କଟକ ପରେ ବ୍ରହ୍ମପୁରରେ ପନିର୍ ଦୋକାନରେ ଚଢ଼ାଉ, ନଷ୍ଟ ହେଲା ଅପମିଶ୍ରିତ ପନିର୍-ଖୁଆ

ବ୍ରହ୍ମପୁର: କଟକ ପରେ ଏବେ ବ୍ରହ୍ମପୁରରେ ଅପମିଶ୍ରିତ ଖାଦ୍ୟ ସାମଗ୍ରୀ ବିରୋଧରେ ବିଇଏମସିର ଖାଦ୍ୟ ନିରାପତ୍ତା ବିଭାଗର ଚଢ଼ାଉ। ସହରର ଖାସ୍ପା, ଆଗାସାହି ଓ ଏହାର ଆଖପାଖ ଅଞ୍ଚଳରେ ୮ରୁ ଅଧିକ ପନିର୍, କ୍ଷୀର ଓ ଲସି ଦୋକାନରେ ଯାଞ୍ଚ କରାଯାଇଥିଲା। ଚଢ଼ାଉ ସମୟରେ ବିକ୍ରି ପାଇଁ ରଖାଯାଇଥିବା ପନିରର ନମୁନା ନେଇ ପ୍ରାଥମିକ ପରୀକ୍ଷା କରାଯାଇଥିଲା। ପନିରରେ ଆୟୋଡିନ୍ ପକାଇବା ପରେ ଏହାର ରଙ୍ଗରେ ପରିବର୍ତ୍ତନ ଦେଖାଯାଇଥିଲା। ଏହାପରେ ପନିରର ମାନକୁ ନେଇ ସନ୍ଦେହ ପ୍ରକାଶ ପାଇଥିଲା। ସେହିପରି ଖୁଆର ନମୁନାରେ ପରୀକ୍ଷା ପାଇଁ କେମିକାଲ୍ ପକାଇବା ପରେ ଏହା କଳା ରଙ୍ଗର ହୋଇଯାଇଥିବା ଜଣାପଡ଼ିଥିଲା। ଏହା ସହିତ କେତେକ ଦୋକାନରେ ଏକ୍ସପାୟରି ଡେଟ୍ ହୋଇସାରିଥିବା କ୍ଷୀର ପ୍ୟାକେଟ୍ ମଧ୍ୟ ବିକ୍ରି ପାଇଁ ରଖାଯାଇଥିବା ଦେଖିବାକୁ ମିଳିଥିଲା। ଯାଞ୍ଚ ପରେ ବିପୁଳ ପରିମାଣର ପନିର୍, ଖୁଆ ଓ କ୍ଷୀରକୁ ବିଇଏମସିର ଖାଦ୍ୟ ନିରାପତ୍ତା ବିଭାଗ ନଷ୍ଟ କରିଥିଲା।

ତେବେ ସମସ୍ତ ଦୋକାନରେ ଅନିୟମିତତା ଦେଖାଯାଇନଥିଲା। କିଛି ବ୍ୟବସାୟୀ ମାନସମ୍ମତ ପନିର୍, ଖୁଆ ଓ କ୍ଷୀର ରଖିଥିବା ବେଳେ ଅନ୍ୟ କିଛି ଦୋକାନୀ ଅପମିଶ୍ରିତ ଖାଦ୍ୟ ସାମଗ୍ରୀ ବିକ୍ରି କରୁଥିବା ଅଭିଯୋଗ ହୋଇଛି। ଅପମିଶ୍ରିତ ସାମଗ୍ରୀ ବିକ୍ରି କରୁଥିବା ଦୋକାନୀଙ୍କ ରେଜିଷ୍ଟ୍ରେସନ୍ ସାର୍ଟିଫିକେଟ୍ ଆସନ୍ତା ୭ ଦିନ ପାଇଁ ରଦ୍ଦ କରାଯିବ ବୋଲି ବିଭାଗ ପକ୍ଷରୁ ସୂଚନା ମିଳିଛି। ଗ୍ରାହକଙ୍କ ସ୍ୱାସ୍ଥ୍ୟ ଓ ଖାଦ୍ୟର ମାନକୁ ଦୃଷ୍ଟିରେ ରଖି ଆଗାମୀ ଦିନରେ ମଧ୍ୟ ଏଭଳି ଚଢ଼ାଉ ଓ ଯାଞ୍ଚ ଜାରି ରହିବ ବୋଲି ଖାଦ୍ୟ ନିରାପତ୍ତା ବିଭାଗର ଅଧିକାରୀ କହିଛନ୍ତି।