ପ୍ରଣବ ପଟ୍ଟନାୟକଙ୍କ ପରଲୋକ: ଓଡ଼ିଆ ସଙ୍ଗୀତ ଜଗତରେ ଅପୂରଣୀୟ ଶୂନ୍ୟତା

ଭୁବନେଶ୍ୱର: ଓଡ଼ିଆ ସଙ୍ଗୀତ ଜଗତର ବିଶିଷ୍ଟ କଣ୍ଠଶିଳ୍ପୀ ପ୍ରଣବ ପଟ୍ଟନାୟକଙ୍କ ପରଲୋକ ଘଟିଛି। ୮୮ ବର୍ଷ ବୟସରେ ଭୁବନେଶ୍ୱରସ୍ଥିତ ନିଜ ବାସଭବନରେ ସେ ଶେଷ ନିଃଶ୍ୱାସ ତ୍ୟାଗ କରିଛନ୍ତି। ତାଙ୍କ ବିୟୋଗ ଓଡ଼ିଆ ସଙ୍ଗୀତ ଓ ଚଳଚ୍ଚିତ୍ର ଜଗତ ପାଇଁ ଏକ ବଡ଼ କ୍ଷତି। ୧୯୩୮ ମସିହା ଜାନୁଆରୀ ୨୦ରେ ଜନ୍ମଗ୍ରହଣ କରିଥିବା ପ୍ରଣବ ପଟ୍ଟନାୟକ ୧୯୫୮ ମସିହାର ‘ମା’ ଚଳଚ୍ଚିତ୍ରରେ କଣ୍ଠଦାନ କରି ନିଜ ସଙ୍ଗୀତ ଯାତ୍ରା ଆରମ୍ଭ କରିଥିଲେ। ଦୀର୍ଘ କ୍ୟାରିୟରରେ ସେ ୫୦ରୁ ଅଧିକ ଚଳଚ୍ଚିତ୍ର ଓ ୨୦୦ରୁ ଅଧିକ ସଙ୍ଗୀତରେ କଣ୍ଠଦାନ କରିଥିଲେ। ଓଡ଼ିଶୀ, ଭଜନ ଓ ପାରମ୍ପରିକ ଲୋକଗୀତରେ ତାଙ୍କର ଥିଲା ସ୍ୱତନ୍ତ୍ର ପରିଚୟ। ‘ମାଝିରେ ଠୁ’ ଠାରୁ ‘ନିଝୁମ ରାତି’ ଭଳି ଅନେକ ଲୋକପ୍ରିୟ ଗୀତ ତାଙ୍କ ସୁମଧୁର କଣ୍ଠରେ ଜୀବନ୍ତ ହୋଇଥିଲା। ବାଳକୃଷ୍ଣ ଦାସ, ଉପେନ୍ଦ୍ର କୁମାର, ଅକ୍ଷୟ ମହାନ୍ତି, ଶାନ୍ତନୁ ମହାପାତ୍ର, ପ୍ରଫୁଲ୍ଲ କର, ଭୁବନେଶ୍ୱର ମିଶ୍ର, ବାସୁଦେବ ରଥ ଓ ସ୍ୱରୂପ ନାୟକଙ୍କ ଭଳି ବିଶିଷ୍ଟ ସଙ୍ଗୀତ ନିର୍ଦ୍ଦେଶକଙ୍କ ସହ ସେ କାମ କରିଥିଲେ। ତାଙ୍କ ପ୍ରତିଭା ପାଇଁ ସେ ଏକାଧିକବାର ଶ୍ରେଷ୍ଠ ପ୍ରଚ୍ଛଦପଟ୍ଟ ଗାୟକ ଭାବେ ରାଜ୍ୟ ଚଳଚ୍ଚିତ୍ର ପୁରସ୍କାର ପାଇଥିଲେ। ୨୦୧୬ ମସିହାରେ ତାଙ୍କୁ ଜୟଦେବ ପୁରସ୍କାର/ସମ୍ମାନରେ ସମ୍ମାନିତ କରାଯାଇଥିଲା। ତାଙ୍କ ପରଲୋକ ଖବର ପ୍ରଚାର ପରେ କଳାକାର, ସଙ୍ଗୀତପ୍ରେମୀ ଓ ବିଭିନ୍ନ ମହଲରୁ ଶୋକ ପ୍ରକାଶ ପାଇଛି। ପ୍ରଣବ ପଟ୍ଟନାୟକଙ୍କ ବିୟୋଗରେ ଓଡ଼ିଆ ସଙ୍ଗୀତ ଆକାଶରୁ ଜଣେ ଧ୍ରୁବତାରାଙ୍କ ବିଦାୟ। ତାଙ୍କ ସ୍ୱର ଓ ସୃଷ୍ଟି ସବୁଦିନ ଓଡ଼ିଆ ସଙ୍ଗୀତପ୍ରେମୀଙ୍କ ହୃଦୟରେ ଅମର ହୋଇ ରହିବ।