ବୋତଲ ବୋମା ମାଡ଼କୁ ନେଇ ରାଜନୈତିକ ଉଷ୍ମତା, ବାପି ସର୍ଖଲେଙ୍କ ପ୍ରେସମିଟ୍ରେ ତୀବ୍ର ପ୍ରତିକ୍ରିୟା

ପାରାଦୀପ ପୌରାଧ୍ୟକ୍ଷ ବସନ୍ତ କୁମାର ବିଶ୍ୱାଳଙ୍କ ଘରକୁ ବୋତଲ ବୋମା ମାଡ଼ ଘଟଣା ଏବେ ରାଜନୈତିକ ରୂପ ନେବାରେ ଲାଗିଛି। ଗତ ମେ ୩୦ ତାରିଖରେ ଘଟିଥିବା ଏହି ଘଟଣା ପରେ ପାରାଦୀପର ରାଜନୈତିକ ପରିବେଶ ଦିନକୁ ଦିନ ଉତ୍ତପ୍ତ ହେଉଛି । ଘଟଣାକୁ ଗୁରୁତ୍ୱର ସହ ନେଇ ଜଗତସିଂହପୁର ଜିଲ୍ଲା ଏସ୍‌ପି ଅଙ୍କିତ କୁମାର ବର୍ମା ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ। ପୋଲିସ ଏପର୍ଯ୍ୟନ୍ତ ୩ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିବାବେଳେ ମୁଖ୍ୟ ଅଭିଯୁକ୍ତ ବାପୁ ପରିଡାଙ୍କୁ ଖୋଜୁଥିବା ସୂଚନା ମିଳିଛି। ଏହି ଘଟଣାକୁ ନେଇ ଗତ ରବିବାର କଂଗ୍ରେସ, ବିଜେପି, ବିଜେଡି, କମ୍ୟୁନିଷ୍ଟ ଦଳ ଏବଂ ପାରାଦୀପ ନାଗରିକ ଫୋରମ ଏକାଠି ହୋଇ ବିକ୍ଷୋଭ ପ୍ରଦର୍ଶନ କରିଥିଲେ। ବାପୁ ପରିଡାଙ୍କ ସହ ଶ୍ରମିକ ନେତା ବାପି ସର୍ଖଲେଙ୍କୁ ମଧ୍ୟ ତଦନ୍ତ ପରିସରଭୁକ୍ତ କରିବାକୁ ଦାବି କରିଥିଲେ। ଏହାର ପ୍ରତିକ୍ରିୟାରେ ଆଜି ଶ୍ରମିକ ନେତା ବାପି ସର୍ଖଲେ ଏକ ସାମ୍ବାଦିକ ସମ୍ମିଳନୀ କରି ନିଜ ଉପରେ ଆସୁଥିବା ଅଭିଯୋଗକୁ ଖଣ୍ଡନ କରିଛନ୍ତି। ମାଟି ଚୋରି ଘଟଣାରୁ ଲୋକଙ୍କ ଦୃଷ୍ଟି ହଟାଇବା ପାଇଁ କିଛି କୁଚକ୍ରୀ ଗୋଷ୍ଠୀ ତାଙ୍କ ନାମକୁ ଜଡ଼ାଇ ଷଡ଼ଯନ୍ତ୍ର କରୁଥିବା ସେ ଅଭିଯୋଗ କରିଛନ୍ତି। ଦୁଇ ଶ୍ରମିକ ନେତା ତାଙ୍କୁ ବଦନାମ କରିବାକୁ ଯୋଜନାବଦ୍ଧ ଭାବେ ପ୍ରଚାର ଚଳାଇଥିବା ମଧ୍ୟ କହିଛନ୍ତି । ବାପି ସର୍ଖଲେ କହିଛନ୍ତି ଯେ, ପୋଲିସ ତଦନ୍ତ ଉପରେ ତାଙ୍କର ପୂର୍ଣ୍ଣ ଭରସା ରହିଛି ଏବଂ ସତ୍ୟ ଶୀଘ୍ର ସାମ୍ନାକୁ ଆସିବ। ତେବେ ପୋଲିସ ଟେଣ୍ଡରକୁ କେନ୍ଦ୍ର କରି ଘଟଣାର ତଦନ୍ତ କରୁଥିବା ବେଳେ ଏହା ଏବେ ରାଜନୈତିକ ମୋଡ଼ ନେଇଥିବା ଦେଖାଯାଉଛି। ପରସ୍ପରକୁ ଦୋଷାରୋପ ଓ କାଦୁଅ ଫିଙ୍ଗା ରାଜନୀତି ଆରମ୍ଭ ହୋଇଥିବାବେଳେ ପାରାଦୀପରେ ରାଜନୈତିକ ଉଷ୍ମତା ବଢ଼ିଚାଲିଛି। ଅନ୍ୟପକ୍ଷରେ ପୋଲିସ ଘଟଣା ଉପରେ କଡ଼ା ନଜର ରଖି ତଦନ୍ତ ଜାରି ରଖିଛି। ଆଜିର ସାମ୍ବାଦିକ ସମ୍ମିଳନୀରେ ବାପି ସର୍ଖଲେ ‘ଢୋଲ ଭିତରେ ମୂଷା’ ଉପାଖ୍ୟାନ ଉଲ୍ଲେଖ କରି ଦୁଇ ଶ୍ରମିକ ନେତାଙ୍କ ଅପରାଧିକ ପୃଷ୍ଠଭୂମି ସମ୍ପର୍କରେ ଇଙ୍ଗିତ କରିଥିଲେ। ସେହିପରି କଂଗ୍ରେସ, ବିଜେଡି ଓ ବିଜେପିକୁ ପରୋକ୍ଷ ଭାବେ ସମାଲୋଚନା କରିଥିବା ମଧ୍ୟ ଚର୍ଚ୍ଚା ହେଉଛି । ଏବେ ଏହି ବୋତଲ ବୋମା ମାଡ଼ ଘଟଣା ଆଗାମୀ ଦିନରେ କେଉଁ ମୋଡ଼ ନେବ ଏବଂ ତଦନ୍ତରୁ କେଉଁ ସତ୍ୟ ସାମ୍ନାକୁ ଆସିବ, ତାହା ଉପରେ ସମସ୍ତଙ୍କ ନଜର ରହିଛି।