ବୋରୱେଲ ଟ୍ରାଜେଡି: ୨୧ଘଣ୍ଟାର ରେସ୍କ୍ୟୁ ଅପରେସନ ପରେ ଚାଲିଗଲା ୪ ବର୍ଷ ଶିଶୁର ଜୀବନ

ହରିୟାଣା: ବୋରୱେଲରେ ଖସି ପଡ଼ି ୪ ବର୍ଷ ଶିଶୁ ମୃତ ।  ହରିୟାଣାର ଅମ୍ବାଲା ଜିଲ୍ଲାରେ ଏକ ହୃଦୟବିଦାରକ ଘଟଣା ଘଟିଛି । ୨୨୦ ଫୁଟ ଗଭୀର ଖୋଲା ବୋରୱେଲରେ ଖସିପଡ଼ିଥିବା ୪ ବର୍ଷର ଶିଶୁ ନିରବୈର ସିଂହଙ୍କର ମୃତ୍ୟୁ ହୋଇଛି। ଦୀର୍ଘ ୨୧ ଘଣ୍ଟାର ଧରି ଚାଲିଥିବା ଅକ୍ଲାନ୍ତ ପ୍ରୟାସ ସତ୍ତ୍ୱେ ପରେ ବୁଧବାର ଭୋର ପ୍ରାୟ ୩.୪୦ରେ ତାଙ୍କୁ ବୋରୱେଲରୁ ଉଦ୍ଧାର କରାଯାଇଥିଲା। ତୁରନ୍ତ ତାଙ୍କୁ ଆମ୍ବୁଲାନ୍ସ ଯୋଗେ ଅମ୍ବାଲା କ୍ୟାଣ୍ଟ ସିଭିଲ ହସ୍ପିଟାଲକୁ ନିଆଯାଇଥିଲେ ମଧ୍ୟ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ। ଶିଶୁଟିକୁ ସୁରକ୍ଷିତ ଭାବେ ବାହାର କରିବା ପାଇଁ ଲଗାତାର ପ୍ରୟାସ ହୋଇଥିଲା, କିନ୍ତୁ ଦୁର୍ଭାଗ୍ୟବଶତଃ ସେ ବଞ୍ଚି ପାରିଲେ ନାହିଁ । ସୂଚନା ଅନୁସାରେ, ଏହି ଦୁର୍ଘଟଣା ମଙ୍ଗଳବାର ସକାଳ ପ୍ରାୟ ୬.୩୦ରେ ଅମ୍ବାଲା ଜିଲ୍ଲାର ଧନେଓରା ଗାଁରେ ଘଟିଥିଲା। ନିରବୈର ତାଙ୍କ ବାପା ମନଜିତ ସିଂହଙ୍କ ସହ ଜେଜେବାପା କରନୈଲ ସିଂହଙ୍କ ପାଇଁ ଖାଦ୍ୟ ନେଇ ବିଲକୁ ଯାଇଥିଲେ। ସେଠାରେ ଖେଳୁଥିବା ବେଳେ ସେ ଏକ ଖୋଲା ବୋରୱେଲ ପାଖକୁ ଯାଇ ମାଟି ପକାଉଥିଲେ। ବୋରୱେଲ ଚାରିପାଖର ଓଦା ମାଟି ଖସିଯିବାରୁ ସେ ସନ୍ତୁଳନ ହରାଇ ଗଭୀର ବୋରୱେଲ ଭିତରକୁ ପଡ଼ିଯାଇଥିଲେ। ପରିବାର ସଦସ୍ୟ ଓ ଗ୍ରାମବାସୀ ପ୍ରଥମେ ଉଦ୍ଧାର ପାଇଁ ଚେଷ୍ଟା କରିଥିଲେ। ପରେ ପୁଲିସକୁ ସୂଚନା ଦିଆଯିବା ପରେ ଜିଲ୍ଲା ପ୍ରଶାସନ, ଜାତୀୟ ବିପର୍ଯ୍ୟୟ ମୁକାବିଲା ବଳ (NDRF), ରାଜ୍ୟ ବିପର୍ଯ୍ୟୟ ମୁକାବିଲା ବଳ (SDRF) ଏବଂ ଭାରତୀୟ ସେନାର ଟିମ୍ ମିଳିତ ଭାବେ ବ୍ୟାପକ ଉଦ୍ଧାର ଅଭିଯାନ ଆରମ୍ଭ କରିଥିଲେ। ଅମ୍ବାଲା ଡେପୁଟି କମିଶନର ଅଜୟ ସିଂହ ତୋମର କହିଛନ୍ତି, ବୋରୱେଲଟି ପ୍ରାୟ ୯ ଇଞ୍ଚ ବ୍ୟାସ ଓ ୨୨୦ ଫୁଟ ଗଭୀର ଥିଲା। ଘଟଣା ପାଇଁ ଦାୟୀ ବ୍ୟକ୍ତିଙ୍କ ବିରୋଧରେ କୋଠର  କାର୍ଯ୍ୟାନୁଷ୍ଠାନ ନେବାକୁ ପୁଲିସକୁ ନିର୍ଦ୍ଦେଶ ଦିଆଯାଇଛି। ସେ କୃଷକମାନଙ୍କୁ ଅବ୍ୟବହୃତ ବୋରୱେଲକୁ ଖୋଲା ନ ରଖି ଭଲଭାବେ ଢାଙ୍କି ରଖିବାକୁ ନିବେଦନ କରିଛନ୍ତି। ବିଶେଷଜ୍ଞମାନଙ୍କ ମତରେ, ଅବ୍ୟବହୃତ ବୋରୱେଲକୁ ତୁରନ୍ତ ସିଲ୍ କରିବା, ନିୟମିତ ଯାଞ୍ଚ କରିବା ଏବଂ ଅବହେଳା ପାଇଁ କଠୋର ଦଣ୍ଡବିଧାନ କରିବା ଦ୍ୱାରା ଏଭଳି ଦୁର୍ଘଟଣାକୁ ରୋକାଯାଇପାରିବ। ଏହି ଘଟଣା ପୁଣିଥରେ ଦେଶରେ ଖୋଲା ଓ ପରିତ୍ୟକ୍ତ ବୋରୱେଲକୁ ନେଇ ସୁରକ୍ଷା ବ୍ୟବସ୍ଥା ଏବଂ ପ୍ରଶାସନିକ ଅବହେଳା ଉପରେ ପ୍ରଶ୍ନ ଉଠାଇଛି।