ବିଜେପି ବିଧାୟକଙ୍କ ବଢୁଛି ଅଡୁଆ, ବିଧାୟକ ଲକ୍ଷ୍ମଣ ବାଗଙ୍କ ନାଁରେ ଥାନାରେ ଏତଲା

ବଲାଙ୍ଗୀର: ରାଜ୍ୟରେ ସରକାରକୁ ଆସିବା ପରେ ବିବାଦୀୟ ହୋଇପଡୁଛନ୍ତି ବିଜେପି ବିଧାୟକ । ଜଣେ ପରେ ଜଣେ ବିଧାୟୟକଙ୍କ ବିରୋଧରେ ଆସୁଛି ଅଭିଯୋଗ । ଯାହାକୁ ନେଇ ଏବେ  ବିଜେପି ସହ ବିଧାୟକ ମାନେ ମଧ୍ୟ ବିବାଦ ଘେରରେ । ପ୍ରଥମେ ଟିଟିଲାଗଡ଼ ବିଧାୟକ ନବୀନ ଜୈନଙ୍କ ନାମ ଫାଙ୍କା ଗୁଳିଚାଳନାକୁ ନେଇ ବିବାଦ ଘେରକୁ ଆସିଲା । ଏହି ଘଟଣାରେ ବିଧାୟକଙ୍କ ବ୍ୟକ୍ତିଗତ ସୁରକ୍ଷାକର୍ମୀ ନିଳମ୍ବିତ ହୋଇଛନ୍ତି । ଏହି ଘଟଣା ଥମିନଥିବା ବେଳେ ସେହି ବଲାଙ୍ଗୀର ଜିଲ୍ଲାର ଆଉ ଜଣେ ବିଧାୟକ ଲକ୍ଷ୍ମଣ ବାଗ ମଧ୍ୟ ଏକ ନୂଆ ବିବାଦରେ ଫସିଛନ୍ତି । ସୂଚନା ଅନୁସାରେ, ବଲାଙ୍ଗୀର ଜିଲ୍ଲା ଆଦିବାସୀ କଲ୍ୟାଣ ସଂଘ ଟିଟିଲାଗଡ଼ ଥାନାରେ ବିଧାୟକ ଲକ୍ଷ୍ମଣ ବାଗଙ୍କ ବିରୋଧରେ ଅଭିଯୋଗ କରିଛନ୍ତି ।  ଅଭିଯୋଗରେ କୁହାଯାଇଛି ଯେ, ଏକ ଘରୋଇ ଟିଭି ଚ୍ୟାନେଲର କାର୍ଯ୍ୟକ୍ରମରେ ବିଧାୟକ ଆଦିବାସୀ ସମ୍ପ୍ରଦାୟକୁ ନେଇ ଅପମାନଜନକ ଟିପ୍ପଣୀ ଦେଇଥିଲେ । ଏହି ମନ୍ତବ୍ୟକୁ ନେଇ ଜିଲ୍ଲା ଆଦିବାସୀ କଲ୍ୟାଣ ସଂଘ ତୀବ୍ର ବିରୋଧ ପ୍ରକାଶ କରିଛି। ସଂଘର ସଦସ୍ୟମାନେ ଥାନା ସମ୍ମୁଖରେ ଧାରଣା ଦେଇ ବିଧାୟକଙ୍କ ବିରୋଧରେ ତୁରନ୍ତ ମାମଲା ରୁଜୁ କରି ଗିରଫ କରିବାକୁ ଦାବି କରିଛନ୍ତି। ସେମାନେ ଚେତାବନୀ ଦେଇଛନ୍ତି ଯେ, ଯଦି ଶୀଘ୍ର କାର୍ଯ୍ୟାନୁଷ୍ଠାନ ନ ହୁଏ, ତେବେ ଆଗାମୀ ଦିନରେ ଆନ୍ଦୋଳନ ଆହୁରି ତୀବ୍ର ହେବ। ଅନ୍ୟପଟେ, ଏହି ଘଟଣା ପରେ ରାଜନୀତିକ ସ୍ଥିତି ଆହୁରି ଉତ୍ତେଜିତ ହୋଇପଡ଼ିଛି । ପୋଲିସ ପରିସ୍ଥିତି ଉପରେ ନଜର ରଖିଛି