ପ୍ରଶାସନ ନିଷ୍କ୍ରିୟ, ଗ୍ରାମବାସୀଙ୍କ ଶ୍ରମଦାନରେ ସଫା ହେଲା ରାସ୍ତା

ଭୋଗରାଇ: ପ୍ରଶାସନିକ ଅବହେଳା ମଧ୍ୟରେ ଗାଁର ସୁରକ୍ଷା ପାଇଁ ନିଜେ ଆଗକୁ ଆସିଛନ୍ତି ଗ୍ରାମବାସୀ। ବାଲେଶ୍ୱର ଜିଲ୍ଲା ଭୋଗରାଇ ବ୍ଲକର ମନୁନଗର ଗ୍ରାମର ରାସ୍ତାର ଦୁଇ ପାର୍ଶ୍ୱରେ ମାଡ଼ିଯାଇଥିବା ଅନାବନା ଝାଡ଼ ଓ ଗଛ ଯୋଗୁଁ ଦୀର୍ଘଦିନ ଧରି ଦୁର୍ଘଟଣାର ଆଶଙ୍କା ଲାଗି ରହିଥିଲା। ସ୍ଥାନୀୟ ଲୋକେ ବାରମ୍ବାର ସମସ୍ୟା ନେଇ ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ମଧ୍ୟ ଆବଶ୍ୟକ ପଦକ୍ଷେପ ନିଆଯାଇନଥିବା ଅଭିଯୋଗ ହୋଇଛି। ଶେଷରେ ଗ୍ରାମବାସୀମାନେ ନିଜେ କୋଦାଳ, କାତି ଓ ଅନ୍ୟାନ୍ୟ ସାମଗ୍ରୀ ଧରି ଶ୍ରମଦାନ ମାଧ୍ୟମରେ ରାସ୍ତା ସଫେଇ କାର୍ଯ୍ୟ ଆରମ୍ଭ କରିଥିଲେ।

ସାମୂହିକ ପ୍ରୟାସରେ ରାସ୍ତାର ଉଭୟ ପାର୍ଶ୍ୱରେ ଥିବା ଅନାବନା ଗଛ ଓ ଝାଡ଼ ସଫା କରାଯାଇ ଯାତାୟାତକୁ ସୁରକ୍ଷିତ କରିବାର ଉଦ୍ୟମ କରାଯାଇଛି। ଗ୍ରାମବାସୀଙ୍କ କହିବା ଅନୁଯାୟୀ, ସରକାରୀ ଉଦ୍ୟମରେ ବିଳମ୍ବ ହେଉଥିବାରୁ ନିଜ ସୁରକ୍ଷା ପାଇଁ ସେମାନେ ଏଭଳି ପଦକ୍ଷେପ ନେବାକୁ ବାଧ୍ୟ ହୋଇଛନ୍ତି। ସେମାନଙ୍କ ମତରେ, ଦୁର୍ଘଟଣା ଘଟିବା ପରେ ପଦକ୍ଷେପ ନେବା ଅପେକ୍ଷା ପୂର୍ବରୁ ସମସ୍ୟାର ସମାଧାନ କରିବା ହିଁ ପ୍ରଶାସନର ଦାୟିତ୍ୱ। ଏହି ଘଟଣା ସାମୂହିକ ଏକତା ଓ ଜନଶକ୍ତିର ଏକ ଉଦାହରଣ ପାଲଟିଥିବା ବେଳେ, ଗ୍ରାମବାସୀ ରାସ୍ତାର ନିୟମିତ ରକ୍ଷଣାବେକ୍ଷଣ ସହ ପ୍ରଶାସନ ପକ୍ଷରୁ ସ୍ଥାୟୀ ସମାଧାନର ଦାବି କରିଛନ୍ତି।