ବନ୍ୟାରେ ନଷ୍ଟ ଧାନ ଫସଲ, କ୍ଷତିପୂରଣ ଦାବିରେ ୩ ଦିନ ହେଲା ଅନଶନରେ ଚାଷୀ

ଭଦ୍ରକ: ବନ୍ୟାଜଳ ନିଷ୍କାସନ ହୋଇ ନପାରିବାରୁ ଉଜୁଡ଼ିଯାଇଛି ଶହ ଶହ ଏକର ଧାନ ଫସଲ। ଫଳରେ କ୍ଷତିପୂରଣ ଦାବିରେ ଗତ ତିନିଦିନ ଧରି ଆମରଣ ଅନଶନରେ ବସିଛନ୍ତି ଚାଷୀ। ଏଭଳି ଘଟଣା ଭଦ୍ରକ ଜିଲ୍ଲା ଚାନ୍ଦବାଲି ବ୍ଲକ ଅନ୍ତର୍ଗତ ତେନ୍ତୁଳିଡ଼ିହି ପଞ୍ଚାୟତର ଠୋକରା ଅଞ୍ଚଳରେ ଦେଖିବାକୁ ମିଳିଛି। ସୂଚନା ଅନୁଯାୟୀ, ଚାନ୍ଦବାଲିରୁ ଆରଡ଼ିକୁ ସଂଯୋଗ କରୁଥିବା ତିନିତର ସେତୁର ନିର୍ମାଣ କାମ ଗତ ଦୁଇ ବର୍ଷ ଧରି ଚାଲିଛି। ଅଭିଯୋଗ ଅନୁସାରେ, ସେତୁ ନିର୍ମାଣକାରୀ ସଂସ୍ଥା ନିଜ ସୁବିଧା ଅନୁଯାୟୀ ନଦୀର ପ୍ରାୟ ୮୦ ପ୍ରତିଶତ ଅଂଶ ପୋତି ଦେଇଥିବାରୁ ନଦୀରେ ଜଳ ପ୍ରବାହ ବାଧାପ୍ରାପ୍ତ ହେଉଛି। ବିଶେଷକରି ଚଳିତ ବନ୍ୟା ସମୟରେ ନଦୀ ଓ ନାଳ ଦେଇ ବନ୍ୟାଜଳ ଠିକ୍ ଭାବେ ନିଷ୍କାସିତ ହୋଇ ନପାରିବାରୁ ତେନ୍ତୁଳିଡ଼ିହି ପଞ୍ଚାୟତ ସମେତ ଚାନ୍ଦବାଲି ବ୍ଲକର ବିଭିନ୍ନ ପଞ୍ଚାୟତର ଚାଷଜମି ଦୀର୍ଘ ସମୟ ଧରି ପାଣିରେ ବୁଡ଼ି ରହିଥିଲା। ଫଳରେ ବ୍ୟାପକ ଧାନ ଫସଲ ନଷ୍ଟ ହୋଇଥିବା ଚାଷୀମାନେ ଅଭିଯୋଗ କରିଛନ୍ତି। ଫସଲ ନଷ୍ଟ ହେବାରୁ ଆର୍ଥିକ କ୍ଷତିର ସମ୍ମୁଖୀନ ହୋଇଥିବା ଚାଷୀମାନେ କ୍ଷତିପୂରଣ ଦାବି କରିଛନ୍ତି। ଏହାସହ ବନ୍ୟାଜଳ ନିଷ୍କାସନ ପାଇଁ ତୁରନ୍ତ ପଦକ୍ଷେପ ନେବା ଓ ସେତୁ ନିର୍ମାଣରେ ନଦୀର ଜଳପ୍ରବାହ ବାଧାପ୍ରାପ୍ତ ନହେବା ପାଇଁ ବ୍ୟବସ୍ଥା କରିବାକୁ ଦାବି କରିଛନ୍ତି। ଦାବି ପୂରଣ ନହେବା ପର୍ଯ୍ୟନ୍ତ ଅନଶନ ଜାରି ରଖିବାକୁ ଚାଷୀମାନେ ଚେତାବନୀ ଦେଇଛନ୍ତି।