ବନ୍ୟା ପରେ ବି ଦୁର୍ଦ୍ଦଶା, ବନ୍ୟା ବିପନ୍ନଙ୍କ ପାଖରେ ସମାଜସେବୀ ସତ୍ୟାନନ୍ଦ

ଭଦ୍ରକ: ଭଦ୍ରକ ଜିଲ୍ଲା ଚାନ୍ଦବାଲି ନିର୍ବାଚନମଣ୍ଡଳୀରେ ବନ୍ୟା ପାଣି ଛାଡ଼ିବା ପରେ ମଧ୍ୟ ଲୋକଙ୍କ ଦୁର୍ଦ୍ଦଶା କମିନାହିଁ। ଏଭଳି ସମୟରେ ବନ୍ୟା ବିପନ୍ନଙ୍କ ପାଖରେ ଛିଡ଼ା ହୋଇଛନ୍ତି ଯୁବ ସମାଜସେବୀ ତଥା କଂଗ୍ରେସ ନେତା ସତ୍ୟାନନ୍ଦ ରାଉତ। ବିଭିନ୍ନ ବନ୍ୟା ପ୍ରଭାବିତ ଅଞ୍ଚଳକୁ ଯାଇ ଲୋକଙ୍କ ସୁବିଧା-ଅସୁବିଧା ବୁଝିବା ସହ ଆବଶ୍ୟକ ସହାୟତା ଯୋଗାଇ ଦେଉଛନ୍ତି। ଚାନ୍ଦବାଲି ବ୍ଲକ ଅନ୍ତର୍ଗତ ନାଲଗୋଣ୍ଡା ଗ୍ରାମ ପଞ୍ଚାୟତରେ ଜଳବନ୍ଦୀ ହୋଇ ରହିଥିବା ଲୋକଙ୍କ ପାଖରେ ପହଞ୍ଚି ସତ୍ୟାନନ୍ଦ ରାଉତ ଶୁଖିଲା ଖାଦ୍ୟ ବଣ୍ଟନ କରିଛନ୍ତି। ଅଟା, ଚୁଡ଼ା, ଗୁଡ଼, ବିସ୍କୁଟ ଭଳି ଖାଦ୍ୟ ସାମଗ୍ରୀ ଯୋଗାଇବା ସହ ବନ୍ୟା ବିପନ୍ନଙ୍କ ଦୁଃଖଦୁର୍ଦ୍ଦଶା ବୁଝିଛନ୍ତି।

ବନ୍ୟା ଆସିବା ଦିନଠାରୁ ଚାନ୍ଦବାଲି ନିର୍ବାଚନମଣ୍ଡଳୀର ତେନ୍ତୁଳିଡିହ, ମୁଳକାଇମା, ଭୂଇଁବୃତ୍ତି, ମାଧପୁର, ରାମପୁର ସମେତ ବିଭିନ୍ନ ଅଞ୍ଚଳରେ ନିଜ ସମର୍ଥକମାନଙ୍କୁ ସାଥୀ କରି ନିରନ୍ତର ଭାବେ ଶୁଖିଲା ଖାଦ୍ୟ ବଣ୍ଟନ କରିଆସୁଥିବା ଜଣାପଡ଼ିଛି। ଅନ୍ୟପକ୍ଷରେ ବନ୍ୟା ବିପନ୍ନଙ୍କୁ ପ୍ରଶାସନ ପକ୍ଷରୁ ରନ୍ଧା ଖାଦ୍ୟ ଓ ଶୁଖିଲା ଖାଦ୍ୟ ଯୋଗାଇ ଦିଆଯାଉଥିଲେ ମଧ୍ୟ ସମସ୍ତଙ୍କ ନିକଟରେ ଏହା ପହଞ୍ଚୁନଥିବା ଅଭିଯୋଗ ହୋଇଛି। କିଛି ଲୋକ ଖାଦ୍ୟ ପାଇଥିବା ବେଳେ ଆଉ କିଛି ବନ୍ୟା ବିପନ୍ନ ଏବେ ବି ଖାଦ୍ୟ ପାଇବାରୁ ବଞ୍ଚିତ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଫଳରେ ଅନେକ ପରିବାର ଏବେ ବି ନାହିଁନଥିବା ଅସୁବିଧା ଭୋଗୁଥିବା କହିଛନ୍ତି ସ୍ଥାନୀୟ ଲୋକେ।