Anganwadi Centre:ଅଙ୍ଗନୱାଡି କେନ୍ଦ୍ରରେ ଅବ୍ୟବସ୍ଥା ଅଭିଯୋଗ, ଦୁଇଦିନ ହେଲା ଝୁଲୁଛି ତାଲା

ଅଙ୍ଗନୱାଡି କେନ୍ଦ୍ରରେ ନିୟମିତ ଭାବେ ଖାଦ୍ୟ ମିଳୁନଥିବା ଅଭିଯୋଗକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଗ୍ରାମବାସୀ । ଏହାକୁ ନେଇ ନୀଳଗିରି ବ୍ଲକ ମହିଷାପଟା ପଞ୍ଚାୟତ ଅଧୀନ କୁଆନାଳି ଗାଁର ଅଙ୍ଗନୱାଡି କେନ୍ଦ୍ରରେ ଗ୍ରାମବାସୀ ତାଲା ପକାଇଥିବା ଜଣାପଡ଼ିଛି । ଗ୍ରାମବାସୀଙ୍କ ଅଭିଯୋଗ ଅନୁସାରେ, କେନ୍ଦ୍ରରେ ଛୋଟ ପିଲାମାନଙ୍କୁ ନିୟମିତ ଭାବେ ଖାଦ୍ୟ ଦିଆଯାଉନାହିଁ । ଏହା ସହିତ ଅଙ୍ଗନୱାଡି କେନ୍ଦ୍ରର ପରିଚାଳନା ନେଇ ମଧ୍ୟ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ରହିଥିବା ଅଭିଯୋଗ ହୋଇଛି । ସୂଚନା ଅନୁସାରେ, ଗତ ଦୁଇଦିନ ଧରି ଗ୍ରାମବାସୀମାନେ ଅଙ୍ଗନୱାଡି କେନ୍ଦ୍ରର ଦିଦିଙ୍କୁ କେନ୍ଦ୍ରରୁ ବାହାର କରି ଦୁଇଟି ତାଲା ପକାଇଛନ୍ତି । ସମ୍ପୃକ୍ତ ଅଙ୍ଗନୱାଡି କର୍ମୀ ନିଜ କେନ୍ଦ୍ରରେ ଖାଦ୍ୟ ପ୍ରସ୍ତୁତ କରିବା ସହ ଅଙ୍ଗନୱାଡିର ଅନ୍ୟାନ୍ୟ କାର୍ଯ୍ୟ କରିବା ପରିବର୍ତ୍ତେ ଅନ୍ୟ ଏକ ଅଙ୍ଗନୱାଡି କେନ୍ଦ୍ରରେ ଏସବୁ କାର୍ଯ୍ୟ କରୁଥିବା ଗ୍ରାମବାସୀ ଅଭିଯୋଗ କରିଛନ୍ତି | ଘଟଣାକୁ ନେଇ ଗାଁରେ ଅସନ୍ତୋଷ ବଢ଼ିଥିବା ବେଳେ ଗ୍ରାମବାସୀ ନିଜ ଦାବିରେ ଅଡ଼ି ରହିଛନ୍ତି । ଗ୍ରାମବାସୀଙ୍କ କହିଛନ୍ତି,'ଉପରିସ୍ଥ ଅଧିକାରୀମାନେ ଗାଁକୁ ଆସି ସେମାନଙ୍କ ଅଭିଯୋଗ ଶୁଣିବା ସହ ସମସ୍ୟାର ସମାଧାନ ନ କରିବା ପର୍ଯ୍ୟନ୍ତ କେନ୍ଦ୍ରର ତାଲା ଖୋଲାଯିବ ନାହିଁ |' ଏନେଇ ଗ୍ରାମବାସୀ ଚେତାବନୀ ଦେଇଛନ୍ତି |