Ananta And Nilam InTrouble:ବିଦ୍ରୋହୀ ସାଜିବା ଅନନ୍ତଙ୍କୁ ପଡ଼ିଲା ମହଙ୍ଗା - ଦଳରୁ ବହିଷ୍କାର ପରେ ପତ୍ନୀଙ୍କୁ ବଙ୍ଗଳା ଛାଡ଼ିବାକୁ ନୋଟିସ

ରାଜନୀତିରେ ସଂଶ୍ଲିଷ୍ଟ ଦମ୍ପତ୍ତିଙ୍କ ଉପରେ କାର୍ଯ୍ୟାନୁଷ୍ଠାନର ସିରିଜ୍‌। ସ୍ୱାମୀଙ୍କୁ ଦଳରୁ ବିଦା କରାଗଲା। ଆଉ ସ୍ତ୍ରୀଙ୍କଠୁ ମନ୍ତ୍ରୀ ପଦ ଛଡ଼ାଇନିଆଗଲା। ବିହାର ଜେଡିୟୁରେ ଅଲ ଇଜ ନଟ୍ ଓ୍ୱେଲ ଥିଓରୀ ଭିତରେ ଏବେ ପୁରା ଘାଣ୍ଟିହୋଇଗଲେଣି ଅନନ୍ତ ସିଂ ଓ ତାଙ୍କ ପତ୍ନୀ ନିଲମ ଦେବୀ। ମୋକାମାର ବିଧାୟକ ଅନନ୍ତ ସିଂଙ୍କୁ ଜେଡିୟୁରୁ ୬ ବର୍ଷ ପାଇଁ ବହିଷ୍କାର କରାଯାଇଛି। ଆଉ ଏବେ ତାଙ୍କ ପତ୍ନୀ ନିଲମ ଦେବୀଙ୍କୁ ପାଟନାସ୍ଥିତ ସରକାରୀ ବଙ୍ଗଳା ଖାଲି କରିବାକୁ ଡେଡଲାଇନ ଦିଆଯାଇଛି। ନଭେମ୍ୱର ୨୫ ସୁଦ୍ଧା ସରକାରୀ ବଙ୍ଗଳା ଖାଲି କରିବାକୁ ମହଲତ ଦିଆଯାଇଛି। ନିଲମ ଦେବୀଙ୍କୁ ରାଜ୍ୟସ୍ତରୀୟ କାର୍ଯ୍ୟକ୍ରମ ସମନ୍ୱୟ କମିଟି ସଦସ୍ୟ ଭାବେ ଉପମନ୍ତ୍ରୀ ମାନ୍ୟତା ଦିଆଯାଇଥିଲା। ଏହି ଆଧାରରେ ତାଙ୍କୁ ୧ ମଲ୍ ରୋଡ୍ ସ୍ଥିତ ସରକାରୀ ବଙ୍ଗଳା ଆବଣ୍ଟନ କରାଯାଇଥିଲା। ଏବେ ମନ୍ତ୍ରିମଣ୍ଡଳ ସଚିବାଳୟ ବିଭାଗର ବିଜ୍ଞପ୍ତି ଅନୁସାରେ ନୀଲମ ଦେବୀଙ୍କୁ ସମିତି ସଦସ୍ୟ ଭାବେ ଯେଉଁ ମନୋନୀତ କରାଯାଇଥିଲା, ସେ ସଦସ୍ୟତା ତତ୍କାଳ ନିରସ୍ତ୍ର କରିଦିଆଯାଇଛି। ନିୟମ ଅନୁସାରେ, ସେବା ସମାପ୍ତର ମାସକ ଭିତରେ ବ୍ୟକ୍ତିଙ୍କୁ ସରକାରୀ ବଙ୍ଗଳା ଖାଲି କରିବାକୁ ପଡ଼େ। ଉଭୟ ଅନନ୍ତ ଓ ନୀଲମଙ୍କୁ ଦଳରୁ ୬ ବର୍ଷ ପାଇଁ ବହିଷ୍କାର କରିଦିଆଯାଇଛି। ଦୁହିଁଙ୍କ ପ୍ରାଥମିକ ସଦସ୍ୟତାକୁ ବି ସମାପ୍ତ କରିଦିଆଯାଇଛି। ଏହା ସହ ଅନନ୍ତଙ୍କ ବିଧାନସଭା ସଦସ୍ୟତା ରଦ୍ଦ କରିବାକୁ ବି ସୁପାରିଶ କରିଛି ଜେଡିୟୁ। ଯଦିଓ ଅନ୍ତିମ ନିର୍ଣ୍ଣୟ ସାମ୍ୱିଧାନିକ ପ୍ରକ୍ରିୟା ଆଧାରରେ ହୋଇଥାଏ। ଏମଏଲସି ନିର୍ବାଚନରେ ବିଦ୍ରୋହୀ ସାଜିବା, ଦଳୀୟ ପ୍ରାର୍ଥୀଙ୍କ ବିରୁଦ୍ଧରେ ପ୍ରଚାର କରିବାରୁ ଅନନ୍ତ ଓ ନୀଲମଙ୍କ ବିରୁଦ୍ଧରେ ଦଳ ଏହି ଆକ୍ସନ ନେଇଛି। ଆରଜେଡି ନେତା ତେଜସ୍ୱୀ ଯାଦବ ବି ଅନନ୍ତଙ୍କୁ ଗଦ୍ଦାର କହିବା ସହ ତାଙ୍କୁ ଦଳରୁ କୌଣସି ଅଫରର ପ୍ରଶ୍ନ ଉଠୁନି ବୋଲି ସଫା ସଫା ଶୁଣାଇଦେଇଛନ୍ତି।