ଲୋକସଭା ବାଚସ୍ପତିଙ୍କୁ ଭେଟିଲେ ଅଭିଷେକ ବାନାର୍ଜୀ, ବିଦ୍ରୋହୀ ସାଂସଦଙ୍କ ଅଯୋଗ୍ୟତା କଲେ ଦାବି

ନୂଆଦିଲ୍ଲୀ: ଲୋକସଭା ବାଚସ୍ପତିଙ୍କୁ ଭେଟିଲେ ସାଂସଦ ଅଭିଷେକ ବାନାର୍ଜୀ। ୨୦ ବିଦ୍ରୋହୀ ସାଂସଦଙ୍କ ଅଯୋଗ୍ୟତା ଦାବି କଲେ ଅଭିଷେକ । ତୃଣମୂଳ କଂଗ୍ରେସ (ଟିଏମସି)ର ଜାତୀୟ ସାଧାରଣ ସମ୍ପାଦକ ଓ ଲୋକସଭା ନେତା ଅଭିଷେକ ବାନାର୍ଜୀ ଶୁକ୍ରବାର ଲୋକସଭା ଅଧ୍ୟକ୍ଷ ଓମ ବିର୍ଲାଙ୍କୁ ଭେଟି ଦଳର ୨୦ ଜଣ ବିଦ୍ରୋହୀ ସାଂସଦଙ୍କ ବିରୋଧରେ ଅଲଗା ଅଲଗା ଅଯୋଗ୍ୟତା ଆବେଦନ ଦାଖଲ କରିଛନ୍ତି। ସଂସଦ ପରିସରରେ ଗଣମାଧ୍ୟମକୁ ସମ୍ବୋଧିତ କରି ଅଭିଷେକ ବାନାର୍ଜୀ କହିଛନ୍ତି ଯେ, ସମ୍ବିଧାନର ଦଶମ ଅନୁସୂଚୀ ଅନୁଯାୟୀ କୌଣସି ସାଂସଦ ସ୍ୱେଚ୍ଛାକୃତ ଭାବେ ନିଜ ଦଳ ଛାଡ଼ି ଅନ୍ୟ ଦଳରେ ଯୋଗଦେଲେ ସେ ଅଯୋଗ୍ୟ ବିବେଚିତ ହେବେ। ତେଣୁ ଟିଏମସି ଟିକେଟରେ ନିର୍ବାଚିତ ହୋଇ ପରେ ଅନ୍ୟ ଦଳରେ ଯୋଗଦେବା ଆଇନ ବିରୋଧୀ ବୋଲି ଦାବି କରିଛନ୍ତି। ବାନାର୍ଜୀଙ୍କ ଅଭିଯୋଗ ଅନୁସାରେ, ଏହି ୨୦ ଜଣ ବିଦ୍ରୋହୀ ସାଂସଦ ଗୋଷ୍ଠୀ ଏକ ପୃଥକ ଗୋଷ୍ଠୀ ଭାବେ ପରିଚୟ ଦେବା ସହିତ ‘ନ୍ୟାସନାଲିଷ୍ଟ ସିଟିଜେନ୍ସ ପାର୍ଟି ଅଫ୍ ଇଣ୍ଡିଆ’ (ଏନସିପିଆଇ)ରେ ମିଶିଥିବା ଦାବି କରିଛନ୍ତି। ତେବେ କେବଳ ସଂସଦୀୟ ଦଳର ଦୁଇ-ତୃତୀୟାଂଶ ସଦସ୍ୟଙ୍କ ଆଧାରରେ ମିଶ୍ରଣର ବୈଧ ହୁଏ ନାହିଁ, ବରଂ ସମ୍ପୂର୍ଣ୍ଣ ରାଜନୈତିକ ଦଳର ଦୁଇ-ତୃତୀୟାଂଶ ମିଶ୍ରଣ ଆବଶ୍ୟକ ବୋଲି ସେ କହିଛନ୍ତି। ସେ ଆହୁରି କହିଛନ୍ତି ଯେ, ଯଦି ବାଗୀ ସାଂସଦମାନଙ୍କର ତୃଣମୂଳ କଂଗ୍ରେସ ପ୍ରତି ଅସନ୍ତୋଷ ରହିଛି, ତେବେ ସେମାନେ ପ୍ରଥମେ ସାଂସଦ ପଦରୁ ଇସ୍ତଫା ଦେଇ ପୁନର୍ବାର ଜନମତ ନେବା ଉଚିତ। ଏହି ପ୍ରସଙ୍ଗରେ ଲୋକସଭା ବାଚସ୍ପତି  ଓମ ବିର୍ଲା ଉଭୟ ପକ୍ଷଙ୍କ ମତ ଶୁଣିବା ପରେ ସମ୍ବିଧାନ ଓ ଆଇନ ଅନୁଯାୟୀ ନିଷ୍ପତ୍ତି ନେବେ ବୋଲି ଜଣାପଡ଼ିଛି। ଅଭିଷେକ ବାନାର୍ଜୀ ବିଜେପି ଉପରେ ମଧ୍ୟ ଆକ୍ରମଣ କରି କହିଛନ୍ତି ଯେ, ବିରୋଧୀ ଦଳଗୁଡ଼ିକୁ ଭାଙ୍ଗିବା ପାଇଁ ବିଭିନ୍ନ ସାମ୍ବିଧାନିକ ସଂସ୍ଥାର ଦୁରୁପଯୋଗ କରାଯାଉଛି।