ବିବାହ ପ୍ରତିଶ୍ରୁତି ଦେଇ ୮.୫୦ ଲକ୍ଷ ଟଙ୍କା ଠକେଇ: ୨ଗିରଫ, ମୁଖ୍ୟ ଅଭିଯୁକ୍ତ ମହିଳା ଫେରାର

ଅନୁଗୋଳ: ବିବାହ ପ୍ରତିଶ୍ରୁତି ଦେଇ ଜଣେ ଯୁବତୀଙ୍କଠାରୁ ୮ ଲକ୍ଷ ୫୦ ହଜାର ଟଙ୍କା ଠକେଇ ଘଟଣାର ପର୍ଦ୍ଦାଫାସ କରିଛି ଛେଣ୍ଡିପଦା ପୋଲିସ। ଅନୁଗୋଳ ଜିଲ୍ଲା ଛେଣ୍ଡିପଦା ଥାନା ବାଗଡ଼ିଆ ଅଞ୍ଚଳର ଘଟଣା । ଏହି ମାମଲାରେ ପୋଲିସ ଦୁଇଜଣ ଅଭିଯୁକ୍ତଙ୍କୁ ଗିରଫ କରିଥିବାବେଳେ ମୁଖ୍ୟ ଅଭିଯୁକ୍ତ ମହିଳା ଏବେ ବି ଫେରାର ରହିଛନ୍ତି। ପୋଲିସ ସୂଚନା ଅନୁଯାୟୀ, ବାଗଡ଼ିଆ ଅଞ୍ଚଳର ଜଣେ ମହିଳା ନିଜ ସ୍ୱାମୀଙ୍କୁ ଭାଇ ବୋଲି ପରିଚୟ ଦେଇ ଛେଣ୍ଡିପଦା ଅଞ୍ଚଳର ଜଣେ ଯୁବତୀଙ୍କ ଘରକୁ ବିବାହ ପ୍ରସ୍ତାବ ନେଇ ଯାଇଥିଲେ। ତାଙ୍କ ଭାଇ ନାଲକୋରେ ଚାକିରୀ କରୁଥିବା କହି ବିଭିନ୍ନ ପ୍ରଲୋଭନ ଦେଖାଇ ସେ ଯୁବତୀ ଓ ତାଙ୍କ ପରିବାରର ବିଶ୍ୱାସ ଜିତିଥିଲେ। ଏହାପରେ ଅଭିଯୁକ୍ତମାନେ ଯୁବତୀଙ୍କଠାରୁ ତାଙ୍କ ସ୍ୱାମୀ ଓ ଦିଅରଙ୍କ ବ୍ୟାଙ୍କ ଆକାଉଣ୍ଟ ଏବଂ ନଗଦ ଟଙ୍କା ମାଧ୍ୟମରେ ମୋଟ ୮ ଲକ୍ଷ ୫୦ ହଜାର ଟଙ୍କା ଠକି ନେଇଥିଲେ। ପରେ ନିଜେ ଠକେଇର ଶିକାର ହୋଇଥିବା ଜାଣିବା ପରେ ଯୁବତୀ ଛେଣ୍ଡିପଦା ଥାନାରେ ଅଭିଯୋଗ କରିଥିଲେ। ଅଭିଯୋଗକୁ ଆଧାର କରି ଛେଣ୍ଡିପଦା ଥାନାରେ କେସ୍ ନମ୍ବର ୩୨୮/୨୬ ରୁଜୁ କରାଯାଇ ତଦନ୍ତ ଆରମ୍ଭ ହୋଇଥିଲା। ତଦନ୍ତ ସମୟରେ ପୋଲିସ ବାରମଞ୍ଚା ଗ୍ରାମର ରାଜା ବେହେରା ଓ ସରୋଜ ବେହେରାଙ୍କୁ ଗିରଫ କରିଛି। ସେମାନଙ୍କ ନିକଟରୁ ଠକେଇରେ ବ୍ୟବହୃତ ଏକ ମୋବାଇଲ ଫୋନ୍ ମଧ୍ୟ ଜବତ କରାଯାଇଛି।ତେବେ ଘଟଣାର ମୁଖ୍ୟ ଅଭିଯୁକ୍ତ ମହିଳା ଏବେ ବି ଫେରାର ଥିବାବେଳେ ତାଙ୍କୁ ଗିରଫ କରିବା ପାଇଁ ପୋଲିସ ଚଢ଼ାଉ ଓ ଖୋଜାଖୋଜି ଜାରି ରଖିଛି। ଗିରଫ ହୋଇଥିବା ଦୁଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।