ମୁଁ ତୁମ ଭଳି ହଜାରେ ସ୍ୱାମୀ ପାଇବି କହିବାରୁ ପତ୍ନୀଙ୍କୁ ହତ୍ୟା- ସ୍ୱାମୀଙ୍କ ଦଣ୍ତ ବଦଳାଇଲେ ଅଦାଲତ

ମୁଁ ତୁମ ଭଳି ହଜାରେ ସ୍ୱାମୀ ପାଇପାରିବି। ଦମ୍ପତ୍ତି କଳି ଭିତରେ ସ୍ୱାମୀଙ୍କ ଉଦ୍ଦେଶ୍ୟରେ ଏଭଳି କହିଥିଲେ ପତ୍ନୀ। ହେଲେ ଏଭଳି କହିବା ଦ୍ୱାରା ଏହା କଳିକୁ ଅଧିକ ଉଗ୍ର ଓ ଉତ୍ତେଜନା କରିଦେଇଥାଏ। ମଧ୍ୟପ୍ରଦେଶ ହାଇକୋର୍ଟ ଏ ସନ୍ଦର୍ଭରେ ଗୁରୁତ୍ୱପୂର୍ଣ୍ଣ ରାୟ ଦେଇଛନ୍ତି। ସ୍ୱାମୀଙ୍କୁ ଦିଆଯାଇଥିବା ଦଣ୍ଡରେ ପରିବର୍ତ୍ତନ କରିଛନ୍ତି ଅଦାଲତ। ଏହା ସହ ଅଦାଲତ ସ୍ପଷ୍ଟ କରିଦେଇଛନ୍ତି, ଏ ମନ୍ତବ୍ୟ ହତ୍ୟାକୁ ନ୍ୟାୟସଙ୍ଗତ କରେନା। ମାମଲା ଥିଲା ଏମିତି। ସ୍ୱାମୀ-ସ୍ତ୍ରୀଙ୍କ ମଧ୍ୟରେ ବଚସା ହୋଇଥିଲା। ସେହି ସମୟରେ ସ୍ତ୍ରୀ କଥିତ ଭାବେ କହିଥିଲେ, "ମୁଁ ତୁମ ପରି ୧୦୦୦ ସ୍ୱାମୀ ପାଇପାରିବି।" ଏହି କଥା ଶୁଣି ସ୍ୱାମୀ ଉତ୍ତେଜିତ ହୋଇ ଏକ ପଥର ଉଠାଇ ସ୍ତ୍ରୀଙ୍କ ଉପରକୁ ଫିଙ୍ଗିଥିଲେ। ସେତେବେଳେ ସ୍ତ୍ରୀ ୭ ମାସର ଗର୍ଭବତୀ ଥିଲେ। ଗୁରୁତର ଆଘାତ ଯୋଗୁଁ ତାଙ୍କର ମୃତ୍ୟୁ ଘଟିଥିଲା। ଜଷ୍ଟିସ୍ ବିବେକ ଅଗ୍ରୱାଲ ଓ ଜଷ୍ଟିସ୍ ଅବନୀନ୍ଦ୍ର କୁମାର ସିଂହଙ୍କ ଖଣ୍ଡପୀଠ କହିଛନ୍ତି ଯେ, ସ୍ତ୍ରୀଙ୍କ ଏହି ଟିପ୍ପଣୀ ସ୍ୱାମୀଙ୍କୁ ଅପମାନିତ ଓ ମୂଲ୍ୟହୀନ ବୋଲି ବୁଝାଉଥିଲା। ଘଟଣାର ପରିସ୍ଥିତିକୁ ଦେଖି ଏହାକୁ ଗୁରୁତର ଓ ହଠାତ୍ ଉତ୍ତେଜନା (Grave and Sudden Provocation) ଭାବେ ଗ୍ରହଣ କରାଯାଇପାରେ। ବିବାଦ ପରେ ସଙ୍ଗେସଙ୍ଗେ ଘଟଣା ଘଟିଥିଲା। ଅଭିଯୁକ୍ତ କେବଳ ଗୋଟିଏ ପଥର ଫିଙ୍ଗିଥିଲେ, ପୁନର୍ବାର ଆକ୍ରମଣ କରିନଥିଲେ। ଘଟଣା ପରେ ସେ ନିଜେ ପୋଲିସକୁ ସୂଚନା ଦେଇଥିଲେ। ଏଥିରୁ ଜଣାପଡ଼ିଲା ଯେ, କ୍ରୋଧରୁ ଅଚାନକ ଆକ୍ରମଣ କରିବାରୁ ତାଙ୍କ ପତ୍ନୀଙ୍କ ମୃତ୍ୟୁ ହୋଇଥିଲା। କିନ୍ତୁ ହତ୍ୟା କରିବାର ଉଦ୍ଦେଶ୍ୟ ଯେ ଥିଲା, ଏହା ପ୍ରମାଣିତ ହୋଇନଥିଲା। ଏହି ପରିସ୍ଥିତିରେ ହାଇକୋର୍ଟ ଅଭିଯୁକ୍ତଙ୍କ ଦୋଷକୁ ଭାରତୀୟ ଦଣ୍ଡ ସଂହିତାର ଧାରା ୩୦୪ ଭାଗ-୧ରୁ ପରିବର୍ତ୍ତନ କରି ଧାରା ୩୦୪ ଭାଗ-୨ ଅନୁଯାୟୀ ଦୋଷୀ ସାବ୍ୟସ୍ତ କରିଛନ୍ତି। ଏହା ସହ ତାଙ୍କୁ ୭ ବର୍ଷର ସଶ୍ରମ କାରାଦଣ୍ଡ ଓ ୧,୦୦୦ ଟଙ୍କା ଜରିମାନା ଦଣ୍ଡ ଦିଆଯାଇଛି।