ଦୁଇ ବର୍ଷରେ ମୋହନ ସରକାର, ୧୨୧ ନୂଆ ଯୋଜନା, କେଜିରୁ ପିଜି ମାଗଣା ଶିକ୍ଷା, ସିଏମ କହିଲେ ସରକାରଙ୍କ ସଫଳତା

ଭୁବନେଶ୍ୱର: ଓଡିଶାରେ ବିଜେପି ସରକାରକୁ ପୁରିଛି ଦୁଇ ବର୍ଷ । 2024 ଜୁନ ଆଜିର ଦିନରେ ରାଜ୍ୟରେ ପ୍ରଥମ ବିଜେପି ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ ମୋହନ ମାଝୀଙ୍କ ସମେତ ତାଙ୍କ ଟିମ । ଆଜି ସରକାରକୁ ଦୁଇ ବର୍ଷ ପୂରଣ ହୋଇଥିବା ବେଳେ ଗାଁରୁ ରାଜଧାନୀ ଯାଏଁ ସରକାର ଓ ଦଳ ଆୟୋଜନ କରୁଛନ୍ତି ସ୍ୱତନ୍ତ୍ର କାର୍ଯ୍ୟକ୍ରମ । ଏହି ଅବସରରେ ମୁଖ୍ୟମନ୍ତ୍ରୀ ମୋହନ ମାଝୀ ଏକାଧିକ ଗୁରୁତ୍ୱପୂର୍ଣ୍ଣ ଘୋଷଣା କରିଛନ୍ତି । ସରକାରକୁ ଦୁଇ ବର୍ଷ ପୂର୍ତ୍ତି ଅବସରରେ ମୁଖ୍ୟମନ୍ତ୍ରୀ କହିଛନ୍ତି ଗତ ଦୁଇ ବର୍ଷ ମଧ୍ୟରେ ରାଜ୍ୟ ସରକାର ୧୨୧ଟି ନୂଆ ଯୋଜନା ଆରମ୍ଭ କରିଛନ୍ତି । ୨୦୨୭ ସୁଦ୍ଧା ରାଜ୍ୟର ପ୍ରତ୍ୟେକ ଗାଁରେ ମୌଳିକ ସୁବିଧା ପହଞ୍ଚାଇବା ଲକ୍ଷ୍ୟରେ କାର୍ଯ୍ୟ ଚାଲିଛି । ମହିଳା ସଶକ୍ତିକରଣକୁ ସରକାର ବିଶେଷ ଗୁରୁତ୍ୱ ଦେଉଥିବା ବେଳେ ‘ଲକ୍ଷପତି ଦିଦି’ ଯୋଜନାରେ ରାଜ୍ୟ ସଫଳତା ହାସଲ କରିଥିବା ଉଲ୍ଲେଖ କରିଛନ୍ତି। ଏହି ଅବସରରେ ଶିକ୍ଷା କ୍ଷେତ୍ର ପାଇଁ ବଡ଼ ଘୋଷଣା କରି ମୁଖ୍ୟମନ୍ତ୍ରୀ କହିଛନ୍ତି , ରାଜ୍ୟରେ କେଜିରୁ ପିଜି ପର୍ଯ୍ୟନ୍ତ ମାଗଣା ଶିକ୍ଷା ବ୍ୟବସ୍ଥା ଲାଗୁ କରାଯିବ। ଏହା କାର୍ଯ୍ୟକାରୀ ହେଲେ ଦେଶରେ ପ୍ରଥମ ରାଜ୍ୟ ଭାବେ ଓଡ଼ିଶା ଏହି ବ୍ୟବସ୍ଥା ଆରମ୍ଭ କରିବ। ସେହିପରି ସାମାଜିକ ସୁରକ୍ଷା କ୍ଷେତ୍ରରେ ମଧ୍ୟ ମୁଖ୍ୟମନ୍ତ୍ରୀ ନୂଆ ଘୋଷଣା କରିଛନ୍ତି। ଭତ୍ତା ପ୍ରଦାନରେ ବୈଷୟିକ ସମସ୍ୟା ଯୋଗୁଁ ବିଳମ୍ବ ହୋଇଥିବା ସ୍ୱୀକାର କରି ସେ କହିଛନ୍ତି ଯେ, ହିତାଧିକାରୀମାନଙ୍କୁ ଏକାଥରେ ୩ ମାସର ଭତ୍ତା ପ୍ରଦାନ କରାଯିବ। ଏଥିସହ ମଧୁବାବୁ ପେନସନ ଯୋଜନାରେ ଆହୁରି ୬ ଲକ୍ଷ ନୂଆ ହିତାଧିକାରୀଙ୍କୁ ସାମିଲ କରାଯିବ। ୬୦ ବର୍ଷ ବୟସ ପୂରଣ ହେବାମାତ୍ରେ ଯୋଗ୍ୟ ବ୍ୟକ୍ତିମାନେ ଏହି ଯୋଜନାରେ ଅନ୍ତର୍ଭୁକ୍ତ ହେବେ ।

ସେହିଭଳି ମୁଖ୍ୟମନ୍ତ୍ରୀ କହିଛନ୍ତି ବିରୋଧୀ ପଚାରୁଛନ୍ତି ଡବଲ ଇଂଜିନରୁ ଓଡିଶା ପାଇଲା କଣ? ଗତ ଦୁଇ ବର୍ଷରେ 90 ହଜାର କୋଟିର ରେଳ ପ୍ରକଳ୍ପ ଓଡିଶା ପାଇଛି, 30 ହଜାର କୋଟିର ରାସ୍ତା ଡବଲ ଇଂଜିନ ସରକାରଙ୍କ ଉପଲବ୍ଧି, ଉପକୂଳ ରାଜପଥ ପାଇଁ 8100 କୋଟି, କ୍ୟାପିଟାଲ ରିଜିଅନ ରୋଡ଼ ପାଇଁ 8300 କୋଟି, କଟକ ପାରାଦ୍ୱୀପ ପୁରୀ ଅର୍ଥନୈତିକ କରିଡର ପାଇଁ 5 ହଜାର କୋଟି ଡବଲ ଇଂଜିନ ସରକାରଙ୍କ ଉପଲବ୍ଧି । ଗତ ଦୁଇ ବର୍ଷରେ 3 ଲକ୍ଷ କୋଟି ରାଜ୍ୟର ବିକାଶ ପାଇଁ କେନ୍ଦ୍ର ସରକାର ମଞ୍ଜୁର କରିଛନ୍ତି ବୋଲି ମୁଖ୍ୟମନ୍ତ୍ରୀ କହିଛନ୍ତି । ଏତତ ବ୍ୟତୀତ ଦୀଘା ଜଗନ୍ନାଥ ମନ୍ଦିରରୁ ଧାମ ଶବ୍ଦ ହଟିବା ମଧ୍ୟ ଏକ ସଫଳତା ବୋଲି କହିଛନ୍ତି । ସୁଭଦ୍ରା ଯୋଜନାରେ 20 ହଜାର 600 କୋଟି ସହାୟତା ଯୋଗାଇ ଦେଇଛନ୍ତି ସରାକର । ମୁଖ୍ୟମନ୍ତ୍ରୀ କନ୍ୟା ବିବାହ ଯୋଜନାରେ 1300 କନ୍ୟା ବିବାହ କରାଯାଇଛି । 4 ଲକ୍ଷ ଏସଏଚଜି ଗୋଷ୍ଠୀଙ୍କୁ 38 ହଜାର 795 କୋଟି ବ୍ୟାଙ୍କ ଋଣ ବିନା ସୁଧରେ ଯୋଗାଇ ଦିଆଯାଇଛି । ଲକ୍ଷପତି ଦିଦି ତିଆରିରେ ଭାରତରେ ଓଡିଶା ପ୍ରଥମ 23 ଲକ୍ଷ 50 ହଜାର ଲକ୍ଷପତି ଦିଦି ତିଆରି ହୋଇଛନ୍ତି । ଖରିଫ ସମୟରେ 18 ଲକ୍ଷ 83 ହଜାର ଚାଷୀଙ୍କ ଠାରୁ 77 ଲକ୍ଷ 81 ହଜାର ମେଟ୍ରିକ ଟନ ଧାନ ଏବଂ ରବିରେ 4 ଲକ୍ଷ 85000 ଟନ ଧାନ କିଣା ହୋଇଛି । 100 ମଡେଲ ମଣ୍ଡି ପ୍ରତିଷ୍ଠା ହୋଇଛି । ଏତତ ବ୍ୟତୀତ ଓଡିଶାକୁ ଶିଳ୍ପ ସମୃଦ୍ଧ ରାଜ୍ୟରେ ପରିଣତ କରିବା ପାଇଁ ମୁଖ୍ୟମନ୍ତ୍ରୀ କହିଛନ୍ତି ଶିଳ୍ପ ଉତ୍କର୍ଷ ଓଡିଶାରୁ 20 ଲକ୍ଷ ନିବେଶ ପ୍ରସ୍ତାବ ଆସିଛି । ସେଥିରୁ 17 ଲକ୍ଷ କୋଟି ନିବେଶ ସୁନିଶ୍ଚିତ କରିବା ପାଇଁ ସ୍ଥିର ହୋଇଛି । 8 ଲକ୍ଷ 69 ହଜାର କୋଟି ଟଙ୍କାର 433 ପ୍ରକଳ୍ପ ସିଙ୍ଗଲ ୱାଇଣ୍ଡ କ୍ଲିୟରନ୍ସ କମିଟି ମଞ୍ଜୁର କରିଛି । ଏଥିରୁ 5 ଲକ୍ଷ 25 ହଜାର ନିଯୁକ୍ତି ସୃଷ୍ଟି ହେବ । ସାଢେ 3 ଲକ୍ଷ କୋଟିର 114 ପ୍ରକଳ୍ପ ଶିଳାନ୍ୟାସ ହୋଇଛି । 67 ହଜାର କୋଟିର 32 ପ୍ରକଳ୍ପ ଗ୍ରାଉଣ୍ଡିଙ୍ଗ ହୋଇଛି ।

ସରକାରଙ୍କ ଏହି ଘୋଷଣା ଗୁଡ଼ିକ ଶିକ୍ଷା, ସାମାଜିକ ସୁରକ୍ଷା, ଗ୍ରାମୀଣ ବିକାଶ, ଶିଳ୍ପ ପର୍ଯ୍ୟଟନ କ୍ଷେତ୍ରରେ ରାଜ୍ୟବାସୀଙ୍କ ପାଇଁ ନୂଆ ସୁଯୋଗ ସୃଷ୍ଟି କରିବ ବୋଲି ଆଶା କରାଯାଉଛି।