୧୨୪ ରନ୍‌ର ଧମାକା, ଇତିହାସ ରଚିଲେ ସ୍ମୃତି ମାନ୍ଧାନା

ଦୁବାଇ: ମହିଳା ଟି-୨୦ ଏସିଆ କପ୍‌ରେ ଦମଦାର ବ୍ୟାଟିଂ କରି ଇତିହାସ ରଚିଛନ୍ତି ଭାରତୀୟ ଷ୍ଟାର ଓପନର ସ୍ମୃତି ମାନ୍ଧାନା। ହଂକଂ ବିପକ୍ଷରେ ମାତ୍ର ୬୪ ବଲ୍‌ରୁ ୧୪ ଚୌକା ଓ ୭ ଛକା ସହ ୧୨୪ ରନ୍‌ର ବିସ୍ଫୋରକ ଇନିଂସ ଖେଳିଛନ୍ତି ସ୍ମୃତି। ସ୍ମୃତିଙ୍କ ଶତକ ବଳରେ ଭାରତ ୫ ୱିକେଟ୍‌ ହରାଇ ୧୯୩ ରନ୍‌ କରିଥିଲା। ଜବାବରେ ହଂକଂ ମାତ୍ର ୫୬ ରନ୍‌ରେ ଅଲଆଉଟ୍‌ ହୋଇଥିଲା। ଫଳରେ ଭାରତ ୧୩୭ ରନ୍‌ର ବଡ଼ ବ୍ୟବଧାନରେ ବିଜୟୀ ହୋଇ ସେମିଫାଇନାଲ୍‌ରେ ସ୍ଥାନ ପକ୍କା କରିଛି।

ଏହି ଇନିଂସ ସହ ସ୍ମୃତି ମହିଳା ଅନ୍ତର୍ଜାତୀୟ କ୍ରିକେଟ୍‌ରେ ମୋଟ ୧୦,୮୮୦ ରନ୍‌ କରି ମିତାଲି ରାଜଙ୍କ ୧୦,୮୬୭ ରନ୍‌ର ରେକର୍ଡକୁ ଅତିକ୍ରମ କରିଛନ୍ତି। ଏଥିସହ ୧୮ଟି ଅନ୍ତର୍ଜାତୀୟ ଶତକ ସହ ମହିଳା କ୍ରିକେଟ୍‌ରେ ସର୍ବାଧିକ ଶତକ ହାସଲକାରୀ ହୋଇଛନ୍ତି। ଟି-୨୦ ଏସିଆ କପ୍‌ରେ ୧୨୪ ରନ୍‌ ଏବେ ସର୍ବାଧିକ ବ୍ୟକ୍ତିଗତ ସ୍କୋର। ଏହାସହ ଟି-୨୦ରେ ଦୁଇଟି ଶତକ ହାସଲ କରିଥିବା ପ୍ରଥମ ଭାରତୀୟ ମହିଳା କ୍ରିକେଟର ହୋଇଛନ୍ତି ସ୍ମୃତି ମାନ୍ଧାନା। ସ୍ମୃତିଙ୍କ ଏହି ଐତିହାସିକ ପ୍ରଦର୍ଶନ ପରେ ସାରା ଦେଶରୁ ତାଙ୍କ ପାଇଁ ଶୁଭେଚ୍ଛାର ସୁଅ ଛୁଟୁଛି।