ପବିତ୍ର ରୁକ୍ମିଣୀ ହରଣ ଓ ବିବାହ ନୀତି, ୫ ଘଣ୍ଟା ବନ୍ଦ ରହିବ ସାଧାରଣ ଦର୍ଶନ

ପୁରୀ: ଶ୍ରୀକ୍ଷେତ୍ରରେ ଆଜି ପବିତ୍ର ରୁକ୍ମିଣୀ ହରଣ ଓ ବିବାହ ନୀତି ଅନୁଷ୍ଠିତ । ଜ୍ୟେଷ୍ଠ ଶୁକ୍ଳ ଏକାଦଶୀ ତିଥିରେ ଶ୍ରୀମନ୍ଦିରରେ ଋକ୍ମିଣୀ ହରଣ ଏବଂ ବିବାହ ଉତ୍ସବ ନୀତି ପାଳନ କରାଯିବାର ପରମ୍ପରା ରହିଆସିଛି । ନୀତିକାନ୍ତି ସମୟରେ ସୁରକ୍ଷା ଓ ପରମ୍ପରା ରକ୍ଷା ପାଇଁ ପ୍ରାୟ ୫ ଘଣ୍ଟା ଧରି ସାଧାରଣ ଦର୍ଶନ ବନ୍ଦ ରହିବ । ଅପରାହ୍ନ ଦିନ ୧ ଟାରୁ ୬ ଟା ପର୍ଯ୍ୟନ୍ତ ମହାପ୍ରଭୁଙ୍କ ଦର୍ଶନ ବନ୍ଦ ରହିବ । ଏହି ଦିନ ସକାଳଧୂପ ପୂଜା ବସିଥିବା ସମୟରେ ଦକ୍ଷିଣୀ ଘରୁ ଶ୍ରୀମଦନମୋହନ ବେଶ କରାଯାଇଥାଏ । ପରେ ପର୍ଯ୍ୟାୟକ୍ରମେ ଅନ୍ୟ ସମସ୍ତ ନୀତିକାନ୍ତି କରାଯାଇ ସଂଧ୍ୟାରେ ମହାପ୍ରଭୁଙ୍କ ସହ ଦେବୀ ଋକ୍ମିଣୀଙ୍କ ବିବାହ ନୀତି ସମାପିତ ହୋଇଥାଏ । ଏହି ଅବସରରେ ମହାପ୍ରଭୁ ଶ୍ରୀଜଗନ୍ନାଥଙ୍କର ଦେବୀ ରୁକ୍ମିଣୀଙ୍କ ସହ ବିବାହ ନୀତି ସମ୍ପନ୍ନ ହେବ। ପରମ୍ପରା ଅନୁଯାୟୀ, ମା’ ଲକ୍ଷ୍ମୀ ରୁକ୍ମିଣୀ ରୂପ ଧାରଣ କରିଥିବା ବେଳେ ଶ୍ରୀମଦନମୋହନ ଶ୍ରୀକୃଷ୍ଣଙ୍କ ପ୍ରତିନିଧି ରୂପେ ଏହି ବିବାହ ଉତ୍ସବରେ ଅଂଶଗ୍ରହଣ କରନ୍ତି। ସକାଳ ଧୂପ ନୀତି ପରେ ମହାପ୍ରଭୁଙ୍କ ଆଜ୍ଞାମାଳ ଶ୍ରୀଦେବୀଙ୍କୁ ପ୍ରଦାନ କରାଯାଇ ରୁକ୍ମିଣୀ ହରଣ ନୀତି ଆରମ୍ଭ ହୋଇଥାଏ। ପରେ ଶ୍ରୀଦେବୀଙ୍କୁ ପାଲିଙ୍କିରେ ବିଜେ କରାଯାଇ ମହାଲକ୍ଷ୍ମୀ ଓ ବିମଳା ମନ୍ଦିର ନିକଟରେ ବିଭିନ୍ନ ପାରମ୍ପରିକ ବିଧିବିଧାନ ସମ୍ପାଦନ କରାଯାଏ। ବିମଳା ମନ୍ଦିର ନିକଟରେ ଶ୍ରୀମଦନମୋହନଙ୍କ ଦ୍ୱାରା ରୁକ୍ମିଣୀ ହରଣ ନୀତି ସମ୍ପନ୍ନ ହେବା ପରେ ଶିଶୁପାଳ ବଧର ପ୍ରତୀକାତ୍ମକ ନୀତି ଅନୁଷ୍ଠିତ ହୁଏ। ଏହାପରେ ଶ୍ରୀଦେବୀ ଓ ଶ୍ରୀମଦନମୋହନଙ୍କୁ ବିବାହ ମଣ୍ଡପକୁ ନିଆଯାଇ ଚନ୍ଦନ ଲାଗି ସହ ଅନ୍ୟାନ୍ୟ ନୀତି ସମ୍ପାଦନ କରାଯାଏ। ସନ୍ଧ୍ୟାଧୂପ ସମୟରେ ବେଦମନ୍ତ୍ର ଓ ପାରମ୍ପରିକ ରୀତିନୀତି ମଧ୍ୟରେ ରୁକ୍ମିଣୀ–କୃଷ୍ଣ ବିବାହ ଉତ୍ସବ ସମ୍ପନ୍ନ ହୋଇଥାଏ। ଏହି ଦିବ୍ୟ ବିବାହ ଉତ୍ସବକୁ ନେଇ ଶ୍ରୀମନ୍ଦିର ପରିସର ଭକ୍ତିମୟ ପରିବେଶରେ ଉତ୍ସବମୁଖର ହୋଇଉଠିଛି। ସିଂହଦ୍ୱାର ସମ୍ମୁଖରେ ତେଲିଙ୍ଗି ବାଜା, ଯୋଡ଼ି ଶଙ୍ଖ ଓ ମହୁରୀର ସୁରିଲା ଧ୍ୱନିରେ ପରିବେଶ ଗୁଞ୍ଜରିତ ହେଉଛି। ଦୂରଦୂରାନ୍ତରୁ ଆସିଥିବା ଭକ୍ତମାନେ ଏହି ଅଲୌକିକ ନୀତିକାନ୍ତି ଦର୍ଶନ ପାଇଁ ଉତ୍ସାହିତ ରହିଛନ୍ତି। ନୀତିକାନ୍ତି ସୁଚାରୁ ଭାବେ ସମ୍ପାଦନ ଏବଂ ସୁରକ୍ଷା ବ୍ୟବସ୍ଥା ଦୃଷ୍ଟିରୁ ଅପରାହ୍ନ ୧ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ପ୍ରାୟ ୫ ଘଣ୍ଟା ଧରି ସାଧାରଣ ଦର୍ଶନ ବନ୍ଦ ରହିବ। ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ଭକ୍ତମାନଙ୍କୁ ସହଯୋଗ କରିବାକୁ ଅନୁରୋଧ କରାଯାଇଛି।