ରାୟଗଡା ହଷ୍ଟେଲରେ ରାତିଅଧରେ 'ପ୍ରଜାକୋର୍ଟ' ! ୨୭ ଛାତ୍ରଙ୍କୁ ନିସ୍ତୁକ ମାଡ଼

ରାୟଗଡା: ରାୟଗଡା ଜିଲ୍ଲାର ରିଭଲକୋଣା ଏସଏସଡି ସରକାରୀ ଉଚ୍ଚ ବିଦ୍ୟାଳୟ ହଷ୍ଟେଲରୁ ଆସିଛି ଲୋମ ଟାଙ୍କୁରା ଦୃଶ୍ଯ। ମଙ୍ଗଳ ବିଭାଗ ଅଧୀନରେ ପରିଚାଳିତ ଏହି ହଷ୍ଟେଲରେ ରାତିଅଧରେ 'ପ୍ରଜାକୋର୍ଟ' ବସାଇ ଦଶମ ଶ୍ରେଣୀର ଜଣେ ଛାତ୍ର ନବମ ଶ୍ରେଣୀର ୨୭ ଜଣ ଛାତ୍ରଙ୍କୁ ନିସ୍ତୁକ ମାଡ଼ ମାରିଥିବା ଅଭିଯୋଗ ହୋଇଛି। ଅଭିଯୋଗ ଅନୁସାରେ, ଦଶମ ଶ୍ରେଣୀର ଛାତ୍ର ଲିଙ୍ଗରାଜଙ୍କ ବିରୋଧରେ କିଛି କନିଷ୍ଠ ଛାତ୍ର ପ୍ରଧାନଶିକ୍ଷକଙ୍କ ନିକଟରେ ନିର୍ଯାତନା ସମ୍ପର୍କରେ ଅଭିଯୋଗ କରିଥିଲେ। ଏଥିରେ କ୍ଷୁବ୍ଧ ହୋଇ ଲିଙ୍ଗରାଜ ରାତି ପ୍ରାୟ ୧୨ଟାରେ ହଷ୍ଟେଲ ଭିତରେ ଛାତ୍ରମାନଙ୍କୁ ଏକାଠି କରିଥିଲେ। ଏହାପରେ ସେ ଜଣଙ୍କ ପରେ ଜଣେ ଛାତ୍ରଙ୍କ ନାଁ ଡାକି ଆଗକୁ ଆସିବାକୁ କହିଥିଲେ ଏବଂ ନଡ଼ିଆ ବାହୁଙ୍ଗା ଓ କ୍ରିକେଟ୍ ବ୍ୟାଟ୍‌ରେ ନିସ୍ତୁକ ମାଡ଼ ମାରିଥିଲେ। ଏହି ଘଟଣାରେ ଅନେକ ଛାତ୍ର ଆହତ ହୋଇଥିବା ଜଣାପଡ଼ିଛି।

ଘଟଣାର ଭିଡିଓ ସାମ୍ନାକୁ ଆସିବା ପରେ ଏହାକୁ ନେଇ ଚାରିଆଡ଼େ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ବିଦ୍ୟାଳୟ କର୍ତ୍ତୃପକ୍ଷ ସମ୍ପୃକ୍ତ ଛାତ୍ରଙ୍କୁ ହଷ୍ଟେଲରୁ ଘରକୁ ପଠାଇ ଦେଇଥିବା ବେଳେ ଘଟଣାର ତଦନ୍ତ ଆରମ୍ଭ କରାଯାଇଛି। ଏହି ଘଟଣା ପରେ ମଙ୍ଗଳ ବିଭାଗ ଅଧୀନରେ ପରିଚାଳିତ ସେବାଶ୍ରମ ଓ ହଷ୍ଟେଲଗୁଡ଼ିକର ସୁରକ୍ଷା ବ୍ୟବସ୍ଥା ଓ ତଦାରଖକୁ ନେଇ ପୁଣିଥରେ ପ୍ରଶ୍ନ ଉଠିଛି। ଯାହାକୁ ନେଇ ଏବେ ବୁଦ୍ଧିଜୀବୀ ଓ ଅଭିଭାବକମାନେ ଚିନ୍ତା ପ୍ରକଟ କରିଵା ସହ ଏଭଳି ଘଟଣାର ପୁନରାବୃତ୍ତି ରୋକିବା ପାଇଁ କଡ଼ା ପଦକ୍ଷେପ ଦାବି କରିଛନ୍ତି।