Ravan Dahan Politics:ଦିଲ୍ଲୀରେ ଦୁଇ ‘ରାବଣ’କୁ ନେଇ ରାଜନୀତି ତେଜ!
ଦଶହରାରେ ରାବଣ ପୋଡ଼ିବାର ପରମ୍ପରାକୁ ନେଇ ଦିଲ୍ଲୀରେ ଏଥର ରାଜନୈତିକ ଚର୍ଚ୍ଚା ଜୋର ଧରିଛି। ଗୋଟିଏ ପଟେ ୩୦ ଫୁଟ୍ର କାକରୋଚ୍ ପୁତଳା, ଅନ୍ୟପଟେ ମୁଖ୍ୟ ନିର୍ବାଚନ ଆୟୁକ୍ତଙ୍କ ମୁହଁ ଥିବା ରାବଣ ପୁତଳାକୁ ନେଇ ଚର୍ଚ୍ଚା ବଢ଼ିଛି।

ଦିଲ୍ଲୀ:ଦଶହରାରେ ରାବଣ ଦହନକୁ କେନ୍ଦ୍ର କରି ଦିଲ୍ଲୀରେ ଏଥର ଦୁଇଟି ଭିନ୍ନ ଘଟଣା ଚର୍ଚ୍ଚାର ବିଷୟ ହୋଇଛି। ଗୋଟିଏ ପଟେ ରାବଣ ସହ ୩୦ ଫୁଟ୍ ଉଚ୍ଚତାର କାକରୋଚ୍ ପୁତଳା ଦହନ କରିବାର ଯୋଜନା ହୋଇଥିବାବେଳେ, ଅନ୍ୟପଟେ ଭାରତୀୟ ଯୁବ କଂଗ୍ରେସ ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କ ମୁହଁ ଥିବା ରାବଣ ପୁତଳା ଜାଳି ପ୍ରତିବାଦ କରିଛି।ଦିଲ୍ଲୀର ଶ୍ରୀ କେଶବ ରାମଲୀଳା କମିଟି ପକ୍ଷରୁ କକରୋଚ୍ ପୁତଳା ଦହନର ଯୋଜନା କରାଯାଇଛି। କମିଟିର କହିବା ଅନୁସାରେ, ଏହି ପୁତଳା ଅପରିଷ୍କାର ପରିବେଶ ଓ ଅପରିଚ୍ଛନ୍ନତାର ପ୍ରତୀକ। ତେବେ ଏହାକୁ କକ୍ରୋଚ୍ ଜନତା ପାର୍ଟି (CJP) ସହ ଯୋଡ଼ି ଦେଖାଯାଉଥିବାରୁ ଘଟଣାଟି ରାଜନୈତିକ ଚର୍ଚ୍ଚାକୁ ଆସିଛି। CJPର ପ୍ରତିଷ୍ଠାତା ଅଭିଜିତ ଦିପ୍କେ ଏହାକୁ ‘ମାଗଣା ପ୍ରଚାର’ ବୋଲି ବ୍ୟଙ୍ଗ କରିଛନ୍ତି।ଅନ୍ୟପଟେ, ସୋମବାର ଦିଲ୍ଲୀରେ ଯୁବ କଂଗ୍ରେସ କର୍ମୀମାନେ ଜ୍ଞାନେଶ କୁମାରଙ୍କ ମୁହଁ ଥିବା ରାବଣ ପୁତଳା ଦହନ କରିଥିଲେ। ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (SIR) ଓ ନିର୍ବାଚନ ପ୍ରକ୍ରିୟାରେ କଥିତ ଅନିୟମିତତା ଅଭିଯୋଗ କରି ସଂଗଠନ ତାଙ୍କ ଇସ୍ତଫା ଦାବି କରିଛି। ପ୍ରତିବାଦରେ ‘ଭୋଟ୍ ଚୋରି କି ରାସଲୀଳା’ ସ୍ଲୋଗାନ ମଧ୍ୟ ଦିଆଯାଇଥିଲା।ତେବେ ଭୋଟର ତାଲିକା ସଂଶୋଧନକୁ ନେଇ ବିରୋଧୀଙ୍କ ଅଭିଯୋଗ ଓ ନିର୍ବାଚନ ଆୟୋଗଙ୍କ କାର୍ଯ୍ୟପ୍ରଣାଳୀ ଉପରେ ରାଜନୈତିକ ମତଭେଦ ଜାରି ରହିଛି। ଦଶହରାର ପାରମ୍ପରିକ ରାବଣ ଦହନ ଏଥର ରାଜନୈତିକ ପ୍ରତୀକ ଓ ପ୍ରତିବାଦର ରୂପ ନେଇଥିବାରୁ ଏହି ଦୁଇ ଘଟଣା ଚର୍ଚ୍ଚାକୁ ଆସିଛି।

