ବନ୍ୟା ଘେରରେ ଗର୍ଭବତୀଙ୍କୁ ବୋଟ୍ ରେ ଉଦ୍ଧାର, ତହସିଲଦାରଙ୍କ ମାନବିକତାକୁ ପ୍ରଶଂସା

ଆଳି: ବୈତରଣୀ ନଦୀରେ ପ୍ରଳୟଙ୍କାରୀ ବନ୍ୟା ଯୋଗୁଁ ନଦୀକୂଳିଆ ଅଞ୍ଚଳର ଅନେକ ଗାଁ ଜଳବନ୍ଦୀ ହୋଇପଡ଼ିଛି। ଏଭଳି ସମୟରେ ଜଣେ ଗର୍ଭବତୀ ମହିଳାଙ୍କୁ ବୋଟ୍‌ ଯୋଗେ ଉଦ୍ଧାର କରି ଚିକିତ୍ସା ସେବା ଯୋଗାଇଦେବା ସହ ପରିବାରର ସୁରକ୍ଷା ପ୍ରତି ଯତ୍ନ ନେଇ ରାଜକନିକା ତହସିଲଦାର ଭାନୁମତୀ ମାଝୀ ଏବେ ପ୍ରଶଂସାର ପାତ୍ର ହୋଇଛନ୍ତି। ସୂଚନା ଅନୁଯାୟୀ, ରାଜକନିକା ବ୍ଲକ୍‌ ଅଧୀନ କନପୁର ଗାଁ ମଧ୍ୟ ବନ୍ୟା ପାଣିରେ ଘେରି ରହିଛି। ଗତକାଲି ରାଜକନିକା ତହସିଲଦାର ଭାନୁମତୀ ମାଝୀ ବୋଟ୍‌ ଯୋଗେ କନପୁର ଗାଁକୁ ଯାଇ ବନ୍ୟା ପରିସ୍ଥିତି ଓ ଲୋକଙ୍କ ସମସ୍ୟା ସମ୍ପର୍କରେ ବୁଝିଥିଲେ। ଏହି ସମୟରେ ସେ ଜାଣିବାକୁ ପାଇଥିଲେ ଯେ, ଗାଁର ବିଜୟ କୁମାର ସେଠୀଙ୍କ ପତ୍ନୀ ଗର୍ଭବତୀ ଥିବାବେଳେ ଜନନୀ ଯନ୍ତ୍ରଣାରେ ଅସୁବିଧାରେ ଅଛନ୍ତି। ଚାରିଆଡ଼େ ବନ୍ୟା ପାଣି ଥିବାରୁ ତାଙ୍କୁ ହସ୍ପିଟାଲ୍‌ ନେବା ମଧ୍ୟ କଷ୍ଟକର ହୋଇପଡ଼ିଥିଲା। ପରିସ୍ଥିତିର ଗମ୍ଭୀରତାକୁ ବୁଝି ତହସିଲଦାର ନିଜେ ବୋଟ୍‌ ନେଇ ଗର୍ଭବତୀ ମହିଳାଙ୍କୁ ବନ୍ୟା ଘେରରୁ ଉଦ୍ଧାର କରିଥିଲେ। ପରେ ନିଜ ଗାଡ଼ିରେ ତାଙ୍କୁ ରାଜକନିକା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇ ଚିକିତ୍ସା ବ୍ୟବସ୍ଥା କରାଇଥିଲେ। ଏଥିସହ ମହିଳାଙ୍କ ନବଜାତ ଶିଶୁପୁତ୍ର ଓ ସ୍ୱାମୀ ବିଜୟ କୁମାର ସେଠୀଙ୍କ ସୁରକ୍ଷା ପ୍ରତି ମଧ୍ୟ ତହସିଲଦାର ନଜର ରଖିଥିଲେ। ଆଜି ସନ୍ଧ୍ୟାରେ ସେ ପୁଣି ରାଜକନିକା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପହଞ୍ଚି ପରିବାରର ସ୍ୱାସ୍ଥ୍ୟାବସ୍ଥା ବୁଝିବା ସହ ଶୁଖିଲା ଖାଦ୍ୟ ଓ ଆର୍ଥିକ ସହାୟତା ପ୍ରଦାନ କରିଥିବା ଜଣାପଡ଼ିଛି। ବନ୍ୟା ଭଳି ବିପତ୍ତି ସମୟରେ ଜଣେ ଅଧିକାରୀଙ୍କ ଏଭଳି ମାନବିକ ପଦକ୍ଷେପକୁ ସ୍ଥାନୀୟ ଲୋକେ ପ୍ରଶଂସା କରିଛନ୍ତି। ତହସିଲଦାର ଭାନୁମତୀ ମାଝୀଙ୍କ ଏହି ଉଦ୍ୟମ ବିପଦ ସମୟରେ ପ୍ରଶାସନର ମାନବିକ ଚେହେରାର ଏକ ଉଦାହରଣ ବୋଲି ଅଞ୍ଚଳବାସୀ କହିଛନ୍ତି।