Rain Steals the Show : ବର୍ଷା ଭାଙ୍ଗିଲା ଭାରତର କ୍ଲିନ୍ ସୁଇପ୍ ସ୍ୱପ୍ନ

ଇତିହାସ ରଚିବାର ସୁଯୋଗ ହାତଛଡ଼ା କଲା ଟିମ୍ ଇଣ୍ଡିଆ | ଭାରତ-ନ୍ୟୁଜିଲାଣ୍ଡ ତୃତୀୟ ଦିନିକିଆ ବର୍ଷା ଯୋଗୁଁ ବାତିଲ ହୋଇଛି | ପ୍ରାୟ ୫ ଘଣ୍ଟା ଧରି ପାଣିପାଗ ସୁଧୁରିବାକୁ ଅପେକ୍ଷା କରିବା ପରେ ଭାରତୀୟ ସମୟ ରାତି ୧୧ଟା ୧୦ ମିନିଟ୍‌ରେ ମ୍ୟାଚ୍ ବାତିଲ ଘୋଷଣା କରାଯାଇଥିଲା | ଟସ୍ ଜିତି ଭାରତ ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା | କିନ୍ତୁ ଦୁର୍ଭାଗ୍ୟବଶତଃ ଗୋଟିଏ ବି ବଲ୍ ପଡ଼ିପାରିଲା ନାହିଁ | ଭାରତୀୟ ଦଳ ସିରିଜ୍‌ରେ ୨-୦ରେ ଆଗୁଆ ରହିଛି | ତୃତୀୟ ମ୍ୟାଚ୍ ଜିତି ସିରିଜ୍‌କୁ ୩-୦ରେ କ୍ଲିନ୍ ସୁଇପ୍ କରିବାର ସୁଯୋଗ ହାତଛଡ଼ା ହୋଇଛି। ନ୍ୟୁଜିଲାଣ୍ଡ ମାଟିରେ ଦିନିକିଆ ସିରିଜ୍ ଜିତିବାର ଐତିହାସିକ ଲକ୍ଷ୍ୟ ପୂରଣ ପାଇଁ ଏବେ ଭାରତକୁ ନଭେମ୍ବର ୧୩ ତାରିଖ ପର୍ଯ୍ୟନ୍ତ ଅପେକ୍ଷା କରିବାକୁ ପଡ଼ିବ। ଚତୁର୍ଥ ଦିନିକିଆ ମାଉଣ୍ଟ ମାଉଙ୍ଗାନୁଇରେ ଖେଳାଯିବ |

ଭାରତ ଜିତିଥିଲା ଟସ୍, ପ୍ରଥମେ ବୋଲିଂ ନିଷ୍ପତ୍ତି

ଭାରତୀୟ ସମୟ ଅନୁସାରେ ସକାଳ ପ୍ରାୟ ୯ଟା ୧୫ ମିନିଟ୍‌ରେ ଟସ୍ ହୋଇଥିଲା | ଟିମ୍ ଇଣ୍ଡିଆ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା | କିନ୍ତୁ ଏହାର କିଛି ସମୟ ପରେ ପୁଣି ବର୍ଷା ଆରମ୍ଭ ହୋଇଯିବାରୁ ଖେଳ ଆରମ୍ଭ ହୋଇପାରି ନଥିଲା | ଶେଷରେ ଭାରତୀୟ ସମୟ ରାତି ପ୍ରାୟ ୧୧ଟା ୧୫ ମିନିଟ୍‌ରେ ମ୍ୟାଚ୍ ବାତିଲ ଘୋଷଣା କରାଯାଇଥିଲା | ଏହି ମ୍ୟାଚ୍ ପାଇଁ ଭାରତୀୟ ଦଳ ନିଜର ପ୍ଲେଇଂ ଇଲେଭେନ୍‌ରେ କୌଣସି ପରିବର୍ତ୍ତନ କରିନଥିଲା | ଅନ୍ୟପକ୍ଷରେ ନ୍ୟୁଜିଲାଣ୍ଡ ଦଳରେ ଗୋଟିଏ ପରିବର୍ତ୍ତନ ହୋଇଥିଲା | ଦ୍ୱିତୀୟ ମ୍ୟାଚ୍‌ରେ ହେଲମେଟ୍‌ରେ ବଲ୍ ବାଜିବା ପରେ ବ୍ଲେୟର ଟିକନର୍ ୭ ଦିନର ଷ୍ଟାଣ୍ଡ-ଡାଉନ୍ ପିରିୟଡ୍‌ରେ ଥିବାରୁ ତାଙ୍କ ସ୍ଥାନରେ ମ୍ୟାଟ୍ ଫିସରଙ୍କୁ ଚୂଡ଼ାନ୍ତ ଏକାଦଶରେ ସାମିଲ କରାଯାଇଥିଲା |

ଇତିହାସ ରଚି ପାଇଲା ନାହିଁ ଟିମ ଇଣ୍ଡିଆ

ନିଜ ଘରୋଇ ମାଟିରେ ନ୍ୟୁଜିଲାଣ୍ଡକୁ ଶେଷ ଥର ପାଇଁ ODI ସିରିଜ୍‌ରେ ପରାସ୍ତ କରିଥିବା ଦେଶ ହେଉଛି ଭାରତ | ୨୦୧୯ରେ ଟିମ୍ ଇଣ୍ଡିଆ ନ୍ୟୁଜିଲାଣ୍ଡ ଗସ୍ତରେ ଯାଇ କିୱି ଦଳକୁ ତାଙ୍କ ନିଜ ମାଟିରେ ୪-୧ରେ ପରାସ୍ତ କରିଥିଲା | ଏହା ପରେ ଅନେକ ଦଳ ନ୍ୟୁଜିଲାଣ୍ଡ ଗସ୍ତ କରିଥିଲେ, କିନ୍ତୁ ପ୍ରତ୍ୟେକ ଥର କିୱି ଦଳ ସମସ୍ତଙ୍କୁ ହରାଇ ଫେରାଇ ଦେଇଥିଲା | ୨୦୨୬ରେ ଭାରତ ପୁଣିଥରେ ନ୍ୟୁଜିଲାଣ୍ଡକୁ ତା'ର ଘରୋଇ ମାଟିରେ ପରାସ୍ତ କରିବାର ଅତି ନିକଟତର ହୋଇଛି | ଆଜିର ମ୍ୟାଚ୍ ଜିତି ଟିମ୍ ଇଣ୍ଡିଆ ନ୍ୟୁଜିଲାଣ୍ଡର ଦୀର୍ଘ ୭ ବର୍ଷର ବିଜୟ ଧାରାରେ ବ୍ରେକ୍ ଲଗାଇ ପାରିଥାନ୍ତା |