ଚାମେଲୀ ଓଝାଙ୍କୁ ନ୍ୟାୟ ଦାବିରେ ପୁରୀ ଜିଲ୍ଲା ସରପଞ୍ଚ ମହାସଂଘର ବିକ୍ଷୋଭ

ପୁରୀ:ଚାମେଲୀ ଓଝାଙ୍କୁ ନ୍ୟାୟ ଦେବା ଦାବିରେ ପୁରୀ ଜିଲ୍ଲା ସରପଞ୍ଚ ମହାସଂଘ ପକ୍ଷରୁ ବିକ୍ଷୋଭ। କେନ୍ଦ୍ରାପଡା ଜିଲ୍ଲାର ତିଖିରି ଗ୍ରାମପଞ୍ଚାୟତର ସରପଞ୍ଚ ଚାମେଲୀ ଓଝାଙ୍କୁ ନ୍ୟାୟ ପ୍ରଦାନ ଦାବିରେ ପୁରୀ ଜିଲ୍ଲା ସରପଞ୍ଚ ମହାସଂଘ ପକ୍ଷରୁ ଏକ ବିକ୍ଷୋଭ ପ୍ରଦର୍ଶନ ସହ ପଦଯାତ୍ରା ହୋଇଯାଇଛି। ମହାସଂଘର ସଦସ୍ୟମାନେ ଚାମେଲୀ ଓଝାଙ୍କ ପ୍ରତି ସମର୍ଥନ ଜଣାଇ ତାଙ୍କ ସହ ଘଟିଥିବା ଅନ୍ୟାୟର ପ୍ରତିବାଦ କରିଥିଲେ। ପୁରୀ ସହରର ସୁଭାଷ ବୋଷ ଛକରୁ ଏକ ପଦଯାତ୍ରାରେ ବାହାରି ସରପଞ୍ଚମାନେ ଜିଲ୍ଲାପାଳଙ୍କ କାର୍ଯ୍ୟାଳୟ ପର୍ଯ୍ୟନ୍ତ ଯାଇଥିଲେ। ସେଠାରେ ରାଜ୍ୟପାଳଙ୍କ ଉଦ୍ଦେଶ୍ୟରେ ଜିଲ୍ଲାପାଳଙ୍କ ଜରିଆରେ ଏକ ଦାବିପତ୍ର ପ୍ରଦାନ କରାଯାଇଥିଲା। ଏହି ଦାବିପତ୍ରରେ ଘଟଣା ସହ ଜଡିତ ବିଡିଓ ଏବଂ ଥାନା ଅଧିକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଚାମେଲୀ ଓଝାଙ୍କୁ ନ୍ୟାୟ ପ୍ରଦାନ କରିବାକୁ ଦାବି କରାଯାଇଛି। ବିକ୍ଷୋଭମାନେ କହିଥିଲେ ଯେ, ଜଣେ ଜନପ୍ରତିନିଧି ତଥା ମହିଳା ସରପଞ୍ଚଙ୍କ ସହ ଘଟିଥିବା ଏପରି ଘଟଣା ଗଣତନ୍ତ୍ର ପାଇଁ ଚିନ୍ତାଜନକ। ଏହାକୁ ଦୃଢ଼ ନିନ୍ଦା କରିବା ସହ ରାଜ୍ୟର ସମସ୍ତ ସରପଞ୍ଚଙ୍କ ସୁରକ୍ଷା ସୁନିଶ୍ଚିତ କରିବାକୁ ମଧ୍ୟ ଦାବି ଉଠିଥିଲା। ସରପଞ୍ଚ ମହାସଂଘ ପକ୍ଷରୁ କୁହାଯାଇଛି ଯେ, ଚାମେଲୀ ଓଝାଙ୍କୁ ନ୍ୟାୟ ମିଳିବା ପର୍ଯ୍ୟନ୍ତ ସେମାନଙ୍କ ଆନ୍ଦୋଳନ ଜାରି ରହିବ।