ଚମେଲୀ ଓଝାଙ୍କ ସହ ଅନ୍ୟାୟ ପ୍ରତିବାଦ, ଝାରସୁଗୁଡ଼ା ଜିଲ୍ଲା ସରପଞ୍ଚ ସଂଘ ପକ୍ଷରୁ ରାଜ୍ୟପାଳଙ୍କୁ ଦାବିପତ୍ର

ଝାରସୁଗୁଡ଼ା: ସରପଞ୍ଚ ଚମେଲୀ ଓଝାଙ୍କ ସହ ଅନ୍ୟାୟ ପ୍ରତିବାଦରେ ସରପଞ୍ଚ ସଂଘ, ଦୋଷୀଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଦାବି । ଝାରସୁଗୁଡ଼ା ଜିଲ୍ଲା ସରପଞ୍ଚ ସଂଘ ପକ୍ଷରୁ ରାଜ୍ୟପାଳଙ୍କୁ ଦାବିପତ୍ର ଓ ସିସିଟିଭି ଯାଞ୍ଚ ପାଇଁ ଦାବି। କେନ୍ଦ୍ରାପଡ଼ା ଜିଲ୍ଲା ତୀଖରା ଗ୍ରାମ ପଞ୍ଚାୟତର ସରପଞ୍ଚ ସୁଶ୍ରୀ ଚମେଲୀ ଓଝାଙ୍କ ସହ ଘଟିଥିବା ଅନ୍ୟାୟପୂର୍ଣ୍ଣ ବ୍ୟବହାରକୁ ନେଇ ଏବେ ସାରା ରାଜ୍ୟରେ ନିଆଁ ଜଳୁଛି। ଜଣେ ନିର୍ବାଚିତ ମହିଳା ଜନପ୍ରତିନିଧିଙ୍କ ପ୍ରତି ହୋଇଥିବା ଅସଦାଚରଣ ଓ ଅସମ୍ମାନକୁ ନେଇ ସାଧାରଣ ଜନତାଙ୍କଠାରୁ ଆରମ୍ଭ କରି ପ୍ରତିନିଧିଙ୍କ ପର୍ଯ୍ୟନ୍ତ ସମସ୍ତଙ୍କ ମଧ୍ୟରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ଏହି ଘଟଣାର ପ୍ରତିବାଦର ସ୍ୱର ଏବେ କେନ୍ଦ୍ରାପଡ଼ାର ସୀମା ଡେଇଁ ଝାରସୁଗୁଡ଼ା ଜିଲ୍ଲା ପର୍ଯ୍ୟନ୍ତ ପହଞ୍ଚିଛି। ଘଟଣାକୁ ନେଇ ଝାରସୁଗୁଡ଼ା ଜିଲ୍ଲା ସରପଞ୍ଚ ସଂଘ ପକ୍ଷରୁ କଡ଼ା ଆଭିମୁଖ୍ୟ ଗ୍ରହଣ କରାଯାଇଛି। ସଂଘର ସଦସ୍ୟମାନେ ଏକତ୍ରିତ ହୋଇ ଜିଲ୍ଲାପାଳଙ୍କ ଜରିଆରେ ରାଜ୍ୟପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର ପ୍ରଦାନ କରିଛନ୍ତି। ସଂଘର ସ୍ପଷ୍ଟ ଅଭିଯୋଗ ଯେ, ଗଣତାନ୍ତ୍ରିକ ପଦ୍ଧତିରେ ନିର୍ବାଚିତ ଜଣେ ମହିଳା ପ୍ରତିନିଧିଙ୍କ ସହ ଏଭଳି ବ୍ୟବହାର ଆମର ପଞ୍ଚାୟତିରାଜ ବ୍ୟବସ୍ଥାର ମର୍ଯ୍ୟାଦା ଉପରେ ଏକ ବଡ଼ ଆଘାତ। ଘଟଣାର ସଠିକ୍, ନିରପେକ୍ଷ ଏବଂ ତୁରନ୍ତ ତଦନ୍ତ କରାଯାଉ। ସଂପୃକ୍ତ ସ୍ଥାନର ସିସିଟିଭି (CCTV) ଫୁଟେଜ ଏବଂ ସମସ୍ତ ଡିଜିଟାଲ ପ୍ରମାଣକୁ ସାମ୍ନାକୁ ଅଣାଯାଉ। ଦୋଷୀଙ୍କ ବିରୋଧରେ ଦୃଢ଼ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ। ଏହି ପ୍ରସଙ୍ଗରେ ଝାରସୁଗୁଡ଼ା ଜିଲ୍ଲା ସରପଞ୍ଚ ସଂଘର ସଭାପତି ସଞ୍ଜୟ ପ୍ରଧାନ ନିଜର ତୀବ୍ର ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି ଯେ, ଏହି ସମ୍ବେଦନଶୀଳ ଘଟଣାରେ ରାଜ୍ୟପାଳ ତୁରନ୍ତ ହସ୍ତକ୍ଷେପ କରନ୍ତୁ। ଯଦି ପ୍ରଶାସନ ଚମେଲୀ ଓଝାଙ୍କୁ ନ୍ୟାୟ ଦେବାରେ ବିଫଳ ହୁଏ, ତେବେ ଆଗାମୀ ଦିନରେ ଏହି ପ୍ରତିବାଦ ଭୟଙ୍କର ରୂପ ନେବ। ଯଦି ସରପଞ୍ଚ ଚମେଲୀ ଓଝାଙ୍କୁ ଉଚିତ ନ୍ୟାୟ ନମିଳେ, ତେବେ ରାଜ୍ୟର ସମସ୍ତ ସରପଞ୍ଚ ଏକାଠି ହୋଇ ସରକାରୀ କାର୍ଯ୍ୟକ୍ରମରୁ ଦୂରେଇ ରହିବେ। ଆବଶ୍ୟକ ପଡ଼ିଲେ ସମଗ୍ର ପଞ୍ଚାୟତିରାଜ କାର୍ଯ୍ୟକୁ ସମ୍ପୂର୍ଣ୍ଣ ଅଚଳ କରିଦିଆଯିବ। ଏହି ଘଟଣା ସାରା ଓଡ଼ିଶାର ସରପଞ୍ଚମାନଙ୍କ ମଧ୍ୟରେ ଏକତା ଏବଂ କ୍ଷୋଭ ବୃଦ୍ଧି କରିଛି। ଜଣେ ଜନପ୍ରତିନିଧିଙ୍କ ସୁରକ୍ଷା ଓ ସମ୍ମାନକୁ ନେଇ ଉଠିଥିବା ଏହି ବଡ଼ ପ୍ରଶ୍ନବାଚୀ ଭିତରେ ସରକାର ଓ ପ୍ରଶାସନ ଆଗକୁ କି ପଦକ୍ଷେପ ନେଉଛନ୍ତି, ତାହା ଉପରେ ଏବେ ସାରା ରାଜ୍ୟର ନଜର ରହିଛି।