Paris Fashion Week:ପ୍ୟାରିସ୍ ଫ୍ୟାଶନ ୱିକରେ ଚମକିଲେ ଐଶ୍ୱର୍ଯ୍ୟା:ରନୱେ ପରେ ଐଶ୍ୱର୍ଯ୍ୟାଙ୍କୁ ଟ୍ରୋଲ୍

ପ୍ୟାରିସ: ରେଡ୍ କାର୍ପେଟ୍ ହେଉ କି ରନୱେ,ଐଶ୍ୱର୍ଯ୍ୟା ରାଇ ବଚ୍ଚନ ଯେଉଁଠି ପାଦ ରଖନ୍ତି, ନଜର ତାଙ୍କ ଉପରେ ହିଁ ଅଟକିଯାଏ। ପ୍ୟାରିସ ଫ୍ୟାଶନ୍ ୱିକ୍‌ରେ ମଧ୍ୟ ଏହାର ବ୍ୟତିକ୍ରମ ହୋଇନାହିଁ। ଲ’ରିଆଲ୍ ପ୍ୟାରିସର ‘ଲେ ଡେଫିଲେ’ ଶୋ’ରେ ଐଶ୍ୱର୍ଯ୍ୟାଙ୍କ ରୟାଲ୍ ଲୁକ୍ ଏବେ ଇଣ୍ଟରନେଟ୍‌ରେ ଚର୍ଚ୍ଚାରେ। ହେଲେ ତାଙ୍କ ଲୁକ୍‌ର ଚର୍ଚ୍ଚା ସହ ଆଉ ଏକ ବିଷୟ ଟ୍ରେଣ୍ଡ କରିବାକୁ ଲାଗିଲା,ବଡି-ଶେମିଂ।

ସେପ୍ଟେମ୍ବର ୨୮ରେ ଆଇଫେଲ୍ ଟାୱାର୍‌ର ନିକଟରେ ଆୟୋଜିତ ଶୋ’ରେ ଐଶ୍ୱର୍ଯ୍ୟା କଳା ଭେଲଭେଟ୍ କାଉଚର୍ ଗାଉନ୍‌ରେ ନଜର ଆସିଥିଲେ। ତା’ ଉପରେ କ୍ରିଷ୍ଟାଲ୍‌ରେ ସଜା ଲମ୍ବା କେପ୍, ମୁଣ୍ଡରେ ଟିଆରା ଓ ବର୍ଗଣ୍ଡି ରଙ୍ଗର ହେୟାର, ପୁରା ରୟାଲ ଲୁକ୍‌। ତାଙ୍କ ରନୱେ ୱାକ୍‌ର ଭିଡିଓ ଆସିବା ମାତ୍ରେ ପ୍ରଶଂସକମାନେ କମେଣ୍ଟ୍‌ରେ ତାଙ୍କୁ ଭରିଭରି ପ୍ରଶଂସା କରିଥିଲେ।କିନ୍ତୁ ପ୍ରଶଂସା ସହ ଆସିଲା ଟ୍ରୋଲିଂ ମଧ୍ୟ। କିଛି ୟୁଜର୍ ଶରୀରର ଆକୃତିକୁ ନେଇ ମନ୍ତବ୍ୟ କରିଥିଲେ। କିଛି ଲୋକ ଓଜନ କମାଇବା ନେଇ ଉପଦେଶ ଦେଇଥିଲେ। ଏପରିକି କିଛି କମେଣ୍ଟରେ ‘ଐଶ୍ୱର୍ଯ୍ୟା ଗର୍ଭବତୀ କି?’ ବୋଲି ପ୍ରଶ୍ନ ଉଠିଥିଲା। ତେବେ ଏହି ଅନୁମାନକୁ ନେଇ ଅଭିନେତ୍ରୀ କିମ୍ବା ତାଙ୍କ ପରିବାର ପକ୍ଷରୁ କୌଣସି ପୁଷ୍ଟି ମିଳିନାହିଁ।

ମଜାର କଥା ହେଉଛି, ଏହି ଶୋ’ର ଥିମ୍ ଥିଲା ‘ଏକ୍ସପ୍ରେସ୍ ୟୋର୍ ୱର୍ଥ’, ବୟସ, ଶରୀର କିମ୍ବା ଲୁକ୍‌ର ନିର୍ଦ୍ଦିଷ୍ଟ ମାନଦଣ୍ଡ ଅପେକ୍ଷା ନିଜକୁ ନିଜ ଭାବରେ ପ୍ରକାଶ କରିବା ଥିଲା ଏହାର ମୁଖ୍ୟ ବାର୍ତ୍ତା। ଏଭଳି ସ୍ଥିତିରେ ଐଶର୍ଯ୍ୟାଙ୍କୁ ଟ୍ରୋଲ୍ ଏହି ଚର୍ଚ୍ଚା ଫ୍ୟାଶନ୍‌ଠାରୁ ଆଗକୁ ବଢ଼ି ମହିଳାଙ୍କ ଶରୀରକୁ ନେଇ ସୋସିଆଲ୍ ମିଡିଆର ଆଭିମୁଖ୍ୟକୁ ମଧ୍ୟ ସାମ୍ନାକୁ ଆଣିଛି।ଏହି ଶୋ’ରେ କେଣ୍ଡାଲ୍ ଜେନର୍, ଇଭା ଲଙ୍ଗୋରିଆ, ସିମୋନ୍ ଆଶ୍ଲି, କାରା ଡେଲେଭିନ୍ ଓ ଜେନ୍ ଫୋଣ୍ଡାଙ୍କ ଭଳି ଅନ୍ତର୍ଜାତୀୟ ତାରକା ମଧ୍ୟ ଥିଲେ। ସେଲିନ୍ ଡିଅନ୍‌ଙ୍କ ସହ ଐଶ୍ୱର୍ଯ୍ୟାଙ୍କ ଆନନ୍ଦମୟ ମୁହୂର୍ତ୍ତ ମଧ୍ୟ ଶୋ’ର ଅନ୍ୟତମ ଆକର୍ଷଣ ପାଲଟିଥିଲା।ତେବେ,ଫ୍ୟାଶନ୍‌ଠାରୁ ଅଧିକ ତାଙ୍କ ଶରୀରକୁ ନେଇ ହେଉଥିବା ମନ୍ତବ୍ୟ ପୁଣିଥରେ ସେଲିବ୍ରିଟି ବଡି-ଶେମିଂକୁ ଚର୍ଚ୍ଚାର ମଝିକୁ ଆଣିଛି।