୨ ବର୍ଷରେ ୧୨୧ ନୂଆ ଯୋଜନା, ସମୃଦ୍ଧ ଓଡ଼ିଶା ଲକ୍ଷ୍ୟରେ ସରକାର: ମୋହନ ମାଝୀ

ରାଜ୍ୟରେ ବିଜେପି ସରକାର ଦୁଇ ବର୍ଷ ପୂରଣ କରିଥିବା ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ରାଜ୍ୟବାସୀଙ୍କୁ ସମ୍ବୋଧିତ କରି ସରକାରଙ୍କ ଦୁଇ ବର୍ଷର ସଫଳତା ଓ ଆଗାମୀ ଲକ୍ଷ୍ୟ ବିଷୟରେ ମତ ରଖିଛନ୍ତି। ସେ କହିଛନ୍ତି ଯେ, ଠିକ୍ ଦୁଇ ବର୍ଷ ପୂର୍ବେ ଆଜିର ଦିନରେ ପ୍ରଧାନମନ୍ତ୍ରୀଙ୍କ ଉପସ୍ଥିତିରେ ରାଜ୍ୟରେ ନୂଆ ସରକାର ଦାୟିତ୍ୱ ଗ୍ରହଣ କରିଥିଲା ଏବଂ ସେହି ଦିନଠାରୁ ଓଡ଼ିଶାରେ “ଲୋକଙ୍କ ସରକାର”ର ଆରମ୍ଭ ହୋଇଥିଲା। ମୁଖ୍ୟମନ୍ତ୍ରୀ କହିଛନ୍ତି ଯେ, ୨୦୩୬ ସୁଦ୍ଧା ‘ସମୃଦ୍ଧ ଓଡ଼ିଶା’ ଗଠନର ଲକ୍ଷ୍ୟ ନେଇ ସରକାର କାର୍ଯ୍ୟ କରୁଛି। ଏହି ଲକ୍ଷ୍ୟ ହାସଲ କରିବା ଦିଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ଓଡ଼ିଶାକୁ ପୂର୍ଣ୍ଣ ସହଯୋଗ ଯୋଗାଇ ଦେଉଛନ୍ତି। ଡବଲ୍ ଇଞ୍ଜିନ୍ ସରକାରର ଡବଲ୍ ଇମ୍ପାକ୍ଟ ରାଜ୍ୟର ପ୍ରତ୍ୟେକ ଗାଁ ଓ ସହରରେ ଦୃଶ୍ୟମାନ ହେଉଥିବା ସେ କହିଛନ୍ତି। ସେ କହିଛନ୍ତି, ଗତ ଦୁଇ ବର୍ଷ ମଧ୍ୟରେ ସରକାରଙ୍କ ବିଭିନ୍ନ ପଦକ୍ଷେପ ଫଳରେ ବିକାଶ ଓ ସଶକ୍ତିକରଣ କ୍ଷେତ୍ରରେ ଉଲ୍ଲେଖନୀୟ ପରିବର୍ତ୍ତନ ଆସିଛି। ଓଡ଼ିଶାବାସୀ ଏବେ ପୂର୍ବ ଅପେକ୍ଷା ନିଜର ଭବିଷ୍ୟତକୁ ନେଇ ଅଧିକ ଆଶାବାଦୀ ଏବଂ ଆତ୍ମବିଶ୍ୱାସୀ ହୋଇପାରିଛନ୍ତି। ମୁଖ୍ୟମନ୍ତ୍ରୀ ଜୋର ଦେଇ କହିଛନ୍ତି ଯେ, ସରକାରଙ୍କ ମୂଳ ନୀତି ହେଉଛି ବିକାଶର ସୁଫଳରେ ସମସ୍ତଙ୍କ ଭାଗିଦାରି। ବିଶେଷ କରି ଗରିବ ଲୋକଙ୍କର ବିକାଶ ଉପରେ ପ୍ରଥମ ଅଧିକାର ରହିଛି ଏବଂ ସରକାର ସେହି ଦିଗରେ କାର୍ଯ୍ୟ କରୁଛି। ଦୁଇ ବର୍ଷର ସଫଳତା ଉପସ୍ଥାପନ କରି ସେ କହିଛନ୍ତି ଯେ, ଏହି ସମୟ ମଧ୍ୟରେ ରାଜ୍ୟ ସରକାର ୧୨୧ଟି ନୂଆ ଯୋଜନା, କାର୍ଯ୍ୟକ୍ରମ ଓ ପଦକ୍ଷେପ ଘୋଷଣା କରିଛନ୍ତି। ଏହି ସବୁ ଯୋଜନା ଓ କାର୍ଯ୍ୟକ୍ରମ ଓଡ଼ିଶାକୁ ‘ସମୃଦ୍ଧ ଓଡ଼ିଶା’ ଲକ୍ଷ୍ୟ ନିକଟତର କରୁଥିବା ସେ ଦାବି କରିଛନ୍ତି।