ରାମ ମନ୍ଦିର ଉପରେ ବଡ଼ ଆତଙ୍କବାଦୀ ଆକ୍ରମଣ ନେଇ ବ୍ଲୁ-ପ୍ରିଣ୍ଟ୍, କର୍ଣ୍ଣାଟକରୁ ଗିରଫ ହେଲା ସନ୍ଦିଗ୍ଧ ଆତଙ୍କୀ

ଅଯୋଧ୍ୟା: ଭବ୍ୟ ରାମ ମନ୍ଦିରକୁ ଟାର୍ଗେଟ କରି ଏକ ବଡ଼ ଧରଣର ଆତଙ୍କବାଦୀ ଆକ୍ରମଣ ଷଡ଼ଯନ୍ତ୍ରର ପର୍ଦ୍ଦାଫାଶ ।  ଘଟଣା ପରେ ସମସ୍ତ ସୁରକ୍ଷା ଏଜେନ୍ସି ହାଇ-ଆଲର୍ଟ । କର୍ଣ୍ଣାଟକରୁ ଗିରଫ ହେଲା ସନ୍ଦିଗ୍ଧ ଆତଙ୍କବାଦୀ ସୁହେଲ୍। ଜାତୀୟ ତଦନ୍ତକାରୀ ସଂସ୍ଥା, କେନ୍ଦ୍ରୀୟ ଗୋଇନ୍ଦା ସଂସ୍ଥା ଓ କର୍ଣ୍ଣାଟକ ପୋଲିସର ମିଳିତ ଚଢ଼ାଉରେ ଧରାପଡ଼ିଛି ଏହି ସନ୍ଦିଗ୍ଧ ଜିହାଦୀ। ପାକିସ୍ତାନର ଆତଙ୍କବାଦୀ ସଂଗଠନ ସହ ସୁହେଲ୍‌ର ସିଧାସଳଖ ସମ୍ପର୍କ ଥିବା ନେଇ ସାଙ୍ଘାତିକ ତଥ୍ୟ ସାମ୍ନାକୁ ଆସିଛି। କିନ୍ତୁ ଆତଙ୍କବାଦୀଙ୍କ ଏହି ଭୟଙ୍କର ବ୍ଲୁ-ପ୍ରିଣ୍ଟ୍‌କୁ ପଣ୍ଡ କରିଦେଇଛନ୍ତି ଦେଶର ସୁରକ୍ଷାକର୍ମୀ। କର୍ଣ୍ଣାଟକର ଦାବଣଗେରେ ଜିଲ୍ଲା ରୁ ସାହାରନପୁରର ଜଣେ ୨୦ ବର୍ଷୀୟ ସନ୍ଦିଗ୍ଧ ଆତଙ୍କବାଦୀ ଗିରଫ ହୋଇଛି । ଯାହାର ନାଁ ସୁହେଲ୍‌। ଉତ୍ତର ପ୍ରଦେଶର ମୂଳ ବାସିନ୍ଦା ସୁହେଲ୍‌ କର୍ଣ୍ଣାଟକର ଏକ ଗାଁରେ ନିଜ ପରିଚୟ ଲୁଚାଇ ଜଣେ ରଙ୍ଗ ମିସ୍ତ୍ରୀ ବା ପେଣ୍ଟର ଭାବେ କାମ କରୁଥିଲା। କେନ୍ଦ୍ରୀୟ ଗୋଇନ୍ଦା ସଂସ୍ଥା ଏବଂ ସ୍ଥାନୀୟ ପୋଲିସର ମିଳିତ ଅପରେସନରେ ଶେଷରେ ଧରାପଡ଼ିଛି ଏହି ସନ୍ଦିଗ୍ଧ। ସବୁଠାରୁ ଚାଞ୍ଚଲ୍ୟକର ବିଷୟ ହେଉଛି, ଗିରଫ ସୁହେଲ୍‌ର ମୋବାଇଲ୍ ଫୋନ୍‌ରୁ ମିଳିଛି ଅନେକ ଆପତ୍ତିଜନକ ତଥ୍ୟ। ସେ ଏନକ୍ରିପ୍ଟେଡ୍ ସୋସିଆଲ ମିଡିଆ ପ୍ଲାଟଫର୍ମ ଜରିଆରେ ପାକିସ୍ତାନୀ ଆତଙ୍କବାଦୀ ନେଟୱର୍କ ସହ ସିଧାସଳଖ ଯୋଗାଯୋଗରେ ଥିଲା। ସୁହେଲ୍‌ର ଚାଟ୍ ରେକର୍ଡ ଏବଂ ଫୋନ୍‌ରୁ +୯୨ କୋଡ୍‌ ଥିବା ଅନେକ ପାକିସ୍ତାନୀ ନମ୍ବର ଜବତ କରାଯାଇଛି। ଭାରତ ବିରୋଧୀ କାର୍ଯ୍ୟକଳାପରେ ଲିପ୍ତ ଥିବା କିଛି ଅନଲାଇନ୍ ଆତଙ୍କବାଦୀ ଗ୍ରୁପ୍ ସହ ମଧ୍ୟ ସେ ଜଡ଼ିତ ଥିଲା। ତଦନ୍ତକାରୀ ସଂସ୍ଥାର ସୂଚନା ଅନୁଯାୟୀ, ଅଯୋଧ୍ୟାର ଭବ୍ୟ ରାମ ମନ୍ଦିରକୁ ଟାର୍ଗେଟ୍ କରିବା ନେଇ ସୁହେଲ୍ ନିଜର ଭୟଙ୍କର ଇଚ୍ଛା ପ୍ରକାଶ କରିଥିଲା। କେବଳ ସେତିକି ନୁହେଁ, ତାର ମୋବାଇଲ୍‌ରୁ ଏଭଳି କିଛି ଗ୍ରାଫିକ୍ସ ଏବଂ ଫଟୋ ମିଳିଛି, ଯେଉଁଥିରେ ସେ ଅତ୍ୟାଧୁନିକ ମାରାତ୍ମକ ଅସ୍ତ୍ରଶସ୍ତ୍ର ଧରି ଉଗ୍ରବାଦୀଙ୍କ ଭଳି ପୋଜ୍ ଦେଇ ଫଟୋସୁଟ୍ କରିଥିବା ଦେଖିବାକୁ ମିଳିଛି। ଚଳିତ ମାସ ଆରମ୍ଭରେ କର୍ଣ୍ଣାଟକରୁ ଗିରଫ ହୋଇଥିବା ଅନ୍ୟ କିଛି ସନ୍ଦିଗ୍ଧଙ୍କୁ ଜେରା ବେଳେ ସୁହେଲ୍‌ର ନାଁ ସାମ୍ନାକୁ ଆସିଥିଲା, ଯାହା ପରେ ଏହି ସଫଳ ଅପରେସନ କରାଯାଇଛି। ସୁହେଲ୍‌କୁ ବର୍ତ୍ତମାନ ଏକ ସ୍ୱତନ୍ତ୍ର ସ୍ଥାନରେ ରଖି ଘନ ଘନ ଜେରା କରାଯାଉଛି। ତାର ମୋବାଇଲ୍ ଏବଂ ଡିଜିଟାଲ୍ ପ୍ରମାଣଗୁଡ଼ିକୁ ଫୋରେନ୍ସିକ୍ ଯାଞ୍ଚ ପାଇଁ ପଠାଯାଇଛି। ଭାରତର ସୁରକ୍ଷା ଓ ସଂପ୍ରଭୁତା ପ୍ରତି ବିପଦ ସୃଷ୍ଟି କରୁଥିବା ଏହି ଆତଙ୍କବାଦୀ ନେଟୱର୍କର ଚେର କେଉଁ ପର୍ଯ୍ୟନ୍ତ ଲମ୍ବିଛି ଏବଂ ଏଥିରେ ଆଉ କେଉଁମାନେ ସାମିଲ ଅଛନ୍ତି, ସେ ନେଇ ଜାତୀୟ ସୁରକ୍ଷା ସଂସ୍ଥାଗୁଡ଼ିକ ଅଧିକ ଖୋଳତାଡ଼ ଜାରି ରଖିଛନ୍ତି।