ଏଲ୍ଇଡି ଷ୍ଟ୍ରିଟ୍ ଲାଇଟ୍ ଦୁର୍ନୀତି: ଠିକାଦାର ଗିରଫ, ୩ କୋଟି ଟଙ୍କା ଆତ୍ମସାତ ଅଭିଯୋଗ

କେନ୍ଦୁଝର: ଏଲ୍ଇଡି ଷ୍ଟ୍ରିଟ୍ ଲାଇଟ୍ ଦୁର୍ନୀତି । ଠିକାଦାର ଗିରଫ, ୩ କୋଟି ଟଙ୍କା ଆତ୍ମସାତ ଅଭିଯୋଗ। କେନ୍ଦୁଝର ଜିଲ୍ଲାରେ ଏଲ୍ଇଡି ଷ୍ଟ୍ରିଟ୍ ଲାଇଟ୍ ଲଗାଇବା ନାମରେ ହୋଇଥିବା ବଡ ଦୁର୍ନୀତି ମାମଲାରେ ଭିଜିଲାନ୍ସ ବିଭାଗ ଜଣେ ଠିକାଦାରଙ୍କୁ ଗିରଫ କରି କୋର୍ଟ ଚାଲାଣ କରିଛି। ଗିରଫ ହୋଇଥିବା ଠିକାଦାର ହେଲେ ମାୟା ଟ୍ରେଡର୍ସର ପ୍ରୋପାଇଟର ବିଭୂତି ଭୂଷଣ ବିଶ୍ୱାଳ। କୋର୍ଟରେ ତାଙ୍କ ଜାମିନ ନାମଞ୍ଜୁର ହେବା ପରେ ସେ ଜେଲକୁ ପଠାଯାଇଛନ୍ତି। ଭିଜିଲାନ୍ସର ପ୍ରାରମ୍ଭିକ ତଦନ୍ତରେ ପ୍ରାୟ ୩ କୋଟି ଟଙ୍କା ଆତ୍ମସାତ ହୋଇଥିବା ତଥ୍ୟ ସାମ୍ନାକୁ ଆସିଛି। ୨୦୨୧ ରୁ ୨୦୨୩ ମଧ୍ୟରେ ପଞ୍ଚମ ଅର୍ଥ କମିଶନ ଅର୍ଥରେ ବିନା ଟେଣ୍ଡର ଓ ନିୟମ ଉଲ୍ଲଂଘନ କରି ଏଲ୍ଇଡି ଷ୍ଟ୍ରିଟ୍ ଲାଇଟ୍ ଲଗାଯାଇଥିବା ଅଭିଯୋଗ ରହିଛି। ଭିଜିଲାନ୍ସ ବିଭାଗ ୮ଟି ଟିମ୍ ଗଠନ କରି ୪୦ ଜଣ ଅଧିକାରୀଙ୍କ ସହ କେନ୍ଦୁଝରର ବାଂଶପାଳ, ତେଲକୋଇ, ପାଟଣା, ସାହାରପଡା ଓ ସଦର ବ୍ଲକରେ ଚଢାଉ କରୁଛି। ଏହି ସମୟରେ ଜିଲ୍ଲା ପରିଷଦ କାର୍ଯ୍ୟାଳୟରୁ ଗୁରୁତ୍ୱପୂର୍ଣ୍ଣ ଫାଇଲ ମଧ୍ୟ ଜବତ କରାଯାଇଛି। ଅଭିଯୋଗ ଅନୁସାରେ ଅନେକ ସ୍ଥାନରେ ଷ୍ଟ୍ରିଟ୍ ଲାଇଟ୍ ଅଚଳ ହୋଇ ପଡ଼ିଥିଲେ ମଧ୍ୟ ରକ୍ଷଣାବେକ୍ଷଣ ନ ହୋଇ, ଠିକା ସଂସ୍ଥାକୁ କୋଟି କୋଟି ଟଙ୍କା ଦିଆଯାଇଥିଲା। ଏହି ମାମଲା ନେଇ ଭିଜିଲାନ୍ସ ଆଗାମୀ ଦିନରେ ଅଧିକ ଖୋଜଖବର ଜାରି ରଖିଛି।