Kuno National Park: ୫ଟି ଛୁଆଙ୍କୁ ଜନ୍ମ ଦେଇଛି ଚିତା 'KJP21'

ମଧ୍ୟପ୍ରଦେଶ/ସ୍ୟାଓପୁର:ଭାରତ ସରକାରଙ୍କ ବନ୍ୟପ୍ରାଣୀ ସଂରକ୍ଷଣ ନିମନ୍ତେ ନିଆଯାଇଥିବା ପ୍ରକଳ୍ପ 'ପ୍ରୋଜେକ୍ଟ ଚିତା'କୁ ଆଜି ଆଉ ଏକ ଐତିହାସିକ ସଫଳତା ମିଳିଛି। ମଧ୍ୟପ୍ରଦେଶର କୁନୋ ଜାତୀୟ ଉଦ୍ୟାନ ରେ ଭାରତୀୟ ମାଟିରେ ଜନ୍ମଗ୍ରହଣ କରିଥିବା ୩୨ ମାସର ଏକ ମାଈ ଚିତା 'KJP21' ଏକାସଙ୍ଗେ ୫ଟି ସୁସ୍ଥ ଶାବକଙ୍କୁ ଜନ୍ମ ଦେଇଛି। ସୋମବାର, ୫ ଅକ୍ଟୋବର ୨୦୨୬ ରେ ଜନ୍ମ ନେଇଥିବା ଏହି ୫ଟି ଚିତା ଶାବକଙ୍କୁ ମିଶାଇବା ପରେ ଏବେ ଭାରତରେ ସମୁଦାୟ ଚିତା ସଂଖ୍ୟା ବୃଦ୍ଧି ପାଇ ୬୦ ରେ ପହଞ୍ଚିଛି। ସବୁଠାରୁ ଗର୍ବର କଥା ହେଉଛି, ଏହି ୬୦ଟି ଚିତା ମଧ୍ୟରୁ ୪୧ଟି ଚିତା ଏବେ ଭାରତୀୟ ମାଟିରେ ହିଁ ଜନ୍ମ ଗ୍ରହଣ କରିଛନ୍ତି।

କେନ୍ଦ୍ର ପରିବେଶ ଏବଂ ବନ ମନ୍ତ୍ରୀ ଭୂପେନ୍ଦ୍ର ଯାଦବ ସୋସିଆଲ ମିଡିଆ ପ୍ଲାଟଫର୍ମ 'X' ରେ ଏହି ବିଶେଷ ଖବର ସେୟାର କରି କୁନୋର ଡାକ୍ତରୀ ଦଳ ଏବଂ ବନ ବିଭାଗର କର୍ମଚାରୀମାନଙ୍କୁ ଶୁଭେଚ୍ଛା ଜଣାଇଛନ୍ତି। ସେ କହିଛନ୍ତି ଯେ 'ମୁଖୀ' ଏବଂ 'KGP12' ପରେ 'KJP21' ହେଉଛି ତୃତୀୟ ଭାରତୀୟ ଚିତା, ଯିଏ ଶାବକମାନଙ୍କୁ ଜନ୍ମ ଦେଇଛି। ଏହି ନୂତନ ଶାବକମାନଙ୍କ ପିତା ହେଉଛନ୍ତି ଭାରତରେ ଚିତାମାନଙ୍କର ଏକ ନୂଆ ବଂଶାବଳୀ ଆରମ୍ଭ କରିଥିବା ବୋତ୍ସୱାନାରୁ ଅଣାଯାଇଥିବା ଏକ ପୁରୁଷ ଚିତା।

୧୯୫୨ ମସିହାରେ ଭାରତରୁ ଚିତା ସମ୍ପୂର୍ଣ୍ଣ ବିଲୁପ୍ତ ହୋଇଯିବା ପରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ୨୦୨୨ ମସିହାରେ ଏହି ପ୍ରକଳ୍ପ 'ପ୍ରୋଜେକ୍ଟ ଚିତା' ଆରମ୍ଭ କରାଯାଇଥିଲା। ବିଦେଶରୁ ଚିତା ଆଣି ସେମାନଙ୍କ ବଂଶ ବୃଦ୍ଧି କରିବା ଏହି ପ୍ରକଳ୍ପର ଲକ୍ଷ୍ୟ ଥିଲା। ବର୍ତ୍ତମାନ ଏହି ୬୦ଟି ଚିତା ମଧ୍ୟରୁ ୫୩ଟି କୁନୋରେ ଏବଂ ୩ଟି ଗାନ୍ଧୀ ସାଗର ଅଭୟାରଣ୍ୟରେ ସୁରକ୍ଷିତ ଭାବେ ରହିଛନ୍ତି। ନୂଆ ୫ ଶାବକ ଓ ମା' ଚିତା ସମ୍ପୂର୍ଣ୍ଣ ସୁସ୍ଥ ଥିବା ବେଳେ ବନ ବିଭାଗ ସେମାନଙ୍କ ସ୍ୱାସ୍ଥ୍ୟ ଯାଞ୍ଚ କରିବା ସହ ସେମାନଙ୍କ ଉପରେ ତୀକ୍ଷ୍ଣ ନଜର ରଖିଛି।